ಬೆಂಗಳೂರು ವಿವಿಗೆ 417 ಕೋಟಿ ರೂ.ಬಜೆಟ್‌

Team Udayavani, Mar 26, 2017, 12:22 PM IST

ಬೆಂಗಳೂರು: 2017-18ನೇ ಸಾಲಿನ ಬೆಂಗಳೂರು ವಿಶ್ವವಿದ್ಯಾಲಯದ ಬಜೆಟ್‌ ಮಂಡಿಸಲಾಗಿದ್ದು, 417 ಕೋಟಿ ರೂ.ಬಜೆಟ್‌ಗೆ ಅನುಮೋದನೆ ಪಡೆಯಲಾಗಿದೆ. ಜ್ಞಾನಭಾರತಿ ಆವರಣದಲ್ಲಿ ನಡೆದ ಅಕಾಡೆಮಿ ಪರಿಷತ್‌ ಸಭೆಯಲ್ಲಿ ಶನಿವಾರ ಬಜೆಟ್‌ ಮಂಡನೆಯಾಗಿದ್ದು, ಈ ಬಾರಿ 3 ಕೋಟಿ ರೂ.ಗಳ ಕೊರತೆ ಬಜೆಟ್‌ ಮಂಡಿಸಲಾಗಿದೆ.

ಅನುಮೋ ದನೆ ಪಡೆಯಲಾದ ಒಟ್ಟು ಬಜೆಟ್‌ನಲ್ಲಿ 417 ಕೋಟಿ ರೂ.ಗಳ ಮೊತ್ತದಲ್ಲಿ 135 ಕೋಟಿಯನ್ನು ರಾಜ್ಯ ಸರ್ಕಾರ ಹಾಗೂ ಬಾಕಿ ಹಣವನ್ನು ವಿವಿಯ ವಿವಿಧ ಆರ್ಥಿಕ ಮೂಲಗಳಿಂದ ಸಂಗ್ರಹಿಸಲು ನಿರ್ಧರಿಸಿದೆ. ಜತೆಗೆ ಯುಜಿಸಿ ಪಂಚವಾರ್ಷಿಕ ಯೋಜನೆಗಳಲ್ಲಿ ವಿವಿಗೆ ಬರುವ ಅನು ದಾನ ಬಳಸಿಕೊಂಡು ಹಣ ಕೊರತೆ ನೀಗಿಸಿಕೊಳ್ಳಲು ತೀರ್ಮಾನಿಸಲಾಗಿದೆ. 

ವಿವಿಗೆ 165 ಕೋಟಿ ಹಣ ಒದಗಿಸುವಂತೆ ರಾಜ್ಯ ಸರ್ಕಾರಕ್ಕೆ ಬೆಂಗಳೂರು ವಿವಿವಿ ಪ್ರಸ್ತಾವನೆ ಸಲ್ಲಿಸಿತ್ತು. ಆದರೆ ಸರ್ಕಾರ 135 ಕೋಟಿ ನೀಡಿದ್ದು,  ವೇತನಕ್ಕಾಗಿ 95 ಕೋಟಿ ರೂ, ಪಿಂಚಣಿಗೆ 28 ಕೋಟಿ ರೂ. ಹಾಗೂ 12 ಕೋಟಿ ರೂ. ವಿವಿ ಅಭಿವೃದ್ಧಿಗೆ ಮೀಸಲಿಡಲಾಗಿದೆ.

ಬಿಎ ಪದವಿ ಸ್ಥಗಿತಕ್ಕೆ ಅನುಮತಿ: ಬಸವಗುಡಿಯ ಬಿಎಂಎಸ್‌ ಮಹಿಳಾ ಕಾಲೇಜಿನಲ್ಲಿ ದಾಖಲಾತಿಯ ಕೊರತೆ ಹಿನ್ನೆಲೆಯಲ್ಲಿ ಬಿಎ ಪದವಿ ಸ್ಥಗಿತಗೊಳಿಸಲು ಆಡಳಿತ ಮಂಡಳಿ ಅನುಮತಿ ಕೋರಿದೆ. ಈ ಹಿನ್ನೆಲೆಯಲ್ಲಿ ವಿವಿ ಪ್ರತ್ಯೇಕ ಸಮಿತಿ ರಚಿಸಿ, ಪ್ರವೇಶ ಕಡಿಮೆಯಾಗಲು ಕಾರಣ ಹಾಗೂ ಸದ್ಯವಿರುವ ಹಾಜರಾತಿ ಬಗ್ಗೆ ಮಾಹಿತಿ ಪಡೆದು, ನಂತರ ಕೋರ್ಸ್‌ ಮುಚ್ಚುವ ಬಗ್ಗೆ ನಿರ್ಧರಿಸಲಿದೆ ಎಂದು ವಿವಿ ಮೂಲಗಳು ತಿಳಿಸಿವೆ.