ಬಿ.ಸಿರೋಡ್‌ ಬಸ್‌ ನಿಲ್ದಾಣ ಅ. 22ರಂದು ಸಿಎಂ ಉದ್ಘಾಟನೆ

Team Udayavani, Oct 21, 2017, 4:04 PM IST

ಬಂಟ್ವಾಳ : ರಾಷ್ಟ್ರೀಯ ಹೆದ್ದಾರಿ ಹಾದು ಹೋಗುವ ಬಿ.ಸಿ.ರೋಡ್‌ ಕೆಎಸ್‌ ಆರ್‌ಟಿಸಿ ಬಸ್‌ ನಿಲ್ದಾಣ 10. 07 ಕೋ.ರೂ. ವೆಚ್ಚದಲ್ಲಿ ನಿರ್ಮಾಣವಾಗಿದೆ. 1.50 ಎಕ್ರೆ ಜಮೀನಿನಲ್ಲಿ ಒಟ್ಟು 3,554. 16 ಚ.ಮೀ. ವಿಸ್ತೀರ್ಣ ಹೊಂದಿದ್ದು ನೆಲ ಮತ್ತು ಮೊದಲ ಅಂತಸ್ತನ್ನು ಹೊಂದಿದೆ.

ಬಸ್‌ ನಿಲ್ದಾಣ ಮೂಲ ಸೌಕರ್ಯಗಳಾದ ಉಪಹಾರ ಗೃಹ, ಮುಂಗಡ ಟಿಕೇಟ್‌ ಕೌಂಟರ್‌, ಪುರುಷರಿಗೆ, ಮಹಿಳೆಯರಿಗೆ ಪ್ರತ್ಯೇಕ ಶೌಚಾಲಯ, ಕುಡಿಯುವ ನೀರಿನ ವ್ಯವಸ್ಥೆ, ಕೆಳ ಅಂತಸ್ತಿನಲ್ಲಿ ವಾಹನ ಪಾರ್ಕಿಂಗ್‌, ಮಹಿಳಾ ವಿಶ್ರಾಂತಿ ಗೃಹ, ವಿಶ್ರಾಂತಿ ಆಸನಗಳು , ಲಗೇಜ್‌ ಕೊಠಡಿ ಹೊಂದಿದೆ.

ಬಿ.ಸಿ.ರೋಡ್‌ ತಲಪಾಡಿಯಲ್ಲಿ ಈಗಾಗಲೇ ಕೆಎಸ್‌ಆರ್‌ಟಿಸಿ ಬಸ್‌ ಡಿಪೋ ಹೊಂದಿದೆ. ಆದರೆ ಸುಸಜ್ಜಿತ ಬಸ್‌ ನಿಲ್ದಾಣ ಇರಲಿಲ್ಲ. ಇದೀಗ ಬಂಟ್ವಾಳಕ್ಕೆ ಅಂತಹ ಭಾಗ್ಯ ಬಂದಿದೆ. ಜಿಲ್ಲಾ ಉಸ್ತುವಾರಿ ಸಚಿವ ರಮಾನಾಥ ರೈ ಅವರಿಂದ ಶಿಲಾನ್ಯಾಸ ನಡೆದು ಕೇವಲ ಒಂದು ವರ್ಷದ ಅವಧಿಯಲ್ಲಿ ಬಸ್‌ ನಿಲ್ದಾಣ ಸುಸಜ್ಜಿತವಾಗಿ ನಿರ್ಮಾಣಗೊಂಡು ಸೇವೆಗೆ ಸಿದ್ದವಾಗಿದೆ. ಬಂಟ್ವಾಳ ವಿಧಾನಸಭಾ ಕ್ಷೇತ್ರವೊಂದರಲ್ಲಿಯೇ ಉಸ್ತುವಾರಿ ಸಚಿವರ ಪ್ರಯತ್ನದ ಫಲವಾಗಿ ಒಟ್ಟು 252.50 ಕೋ.ರೂ. ವೆಚ್ಚದ ವಿವಿಧ ಅಭಿವೃದ್ದಿ ಕಾಮಗಾರಿಗಳು ಅನುಷ್ಠಾನಕ್ಕೆ ಬರಲಿವೆ. ಇದರಲ್ಲಿ 148.29 ಕೋ. ರೂ. ವೆಚ್ಚದ ಕಾಮಗಾರಿಗಳ ಉದ್ಘಾಟನೆ, 104. 21 ಕೋ. ರೂ. ವೆಚ್ಚದ ಯೋಜನೆಗಳಿಗೆ ಶಿಲಾನ್ಯಾಸ ನಡೆಯುವ ಮೂಲಕ ಮುಂದಿನ ದಿನಗಳಲ್ಲಿ ವಿವಿಧ ಅಭಿವೃದ್ದಿ ಯೋಜನೆಗಳು ಅನುಷ್ಠಾನಕ್ಕೆ ಬರಲಿದೆ. ಈ ಎಲ್ಲಾ ಯೋಜನೆಗಳ ಲೋಕಾರ್ಪಣೆಗೆ ಅ. 22ರಂದು ಮುಹೂರ್ತ ಸಿದ್ದವಾಗಿದೆ.