ಮತ್ತೆ ಅಭಿನಯಕ್ಕೆ ಸಜ್ಜಾದ ರಾಗಿಣಿ…‘ಕರ್ವಾ 3’ ಚಿತ್ರದಲ್ಲಿ ತುಪ್ಪದ ಬೆಡಗಿ

2020 ಎಲ್ಲರ ಪಾಲಿಗೆ ಕಷ್ಟಕರವಾಗಿತ್ತು. ಕೆಲವೊಬ್ಬರು ಇದನ್ನು ಇನ್ನೂ ಕಠಿಣಗೊಳಿಸಿದರು.

Team Udayavani, Feb 25, 2021, 1:24 PM IST

ಬೆಂಗಳೂರು : ಚಂದನವನದ ತುಪ್ಪದ ಬೆಡಗಿ ರಾಗಿಣಿ ದ್ವಿವೇದಿ ಸಂಕಷ್ಟದ ಸಂಕೋಲೆ ತೊಡೆದು ಮತ್ತೆ ಮುಖಕ್ಕೆ ಬಣ್ಣ ಹಾಕೋಕೆ ರೆಡಿಯಾಗಿದ್ದಾರೆ. ಈ ವರ್ಷದ (2021) ಮೊದಲ ಚಿತ್ರದಲ್ಲಿ ನಟಿಸಲು ಅವರು ಒಪ್ಪಿಕೊಂಡಿದ್ದಾರೆ.

ಸ್ಯಾಂಡಲ್ ವುಡ್ ನಲ್ಲಿ 10 ವರ್ಷಗಳನ್ನು ಪೂರೈಸಿರುವ ರಾಗಿಣಿ ಹಲವು ಬಗೆಯ ಪಾತ್ರ ಪೋಷಣೆ ಮೂಲಕ ಕನ್ನಡ ಸಿನಿರಸಿಕರನ್ನು ರಂಜಿಸಿದವರು. ಕಳೆದ ವರ್ಷ ಕನ್ನಡ ಚಿತ್ರರಂಗಕ್ಕೆ ಕಪ್ಪು ಚುಕ್ಕೆಯಂತಾಗಿದ್ದ ಡ್ರಗ್ಸ್ ಪ್ರಕರಣದಲ್ಲಿ ಈ ನಟಿಯ ಹೆಸರು ತಳುಕುಹಾಕಿ ಕೊಂಡಿದೆ. ಈ ವಿವಾದದಲ್ಲಿ ಜೈಲು ವಾಸ ಅನುಭವಿಸಿ ಹೊರಬಂದಿರುವ ರಾಗಿಣಿ, ಸದ್ಯ ಮತ್ತೆ ಚಿತ್ರರಂಗದಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳುತ್ತಿದ್ದಾರೆ.

ಹೊಸ ನಿರ್ದೇಶಕ ವಿಶಾಲ್ ಶೇಖರ್ ಅವರ ‘ಕರ್ವಾ 3’ ಸಿನಿಮಾದಲ್ಲಿ ಅಭಿನಯಿಸಲು ರಾಗಿಣಿ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ. ಈ ಚಿತ್ರದಲ್ಲಿ ತಿಲಕ್ ಹಾಗೂ ಮೇಘನಾ ಗಾಂವ್ಕರ್ ಮುಖ್ಯಭೂಮಿಕೆಯಲ್ಲಿದ್ದಾರೆ. ಈ ಸಿನಿಮಾದಲ್ಲಿ ತಮ್ಮ ಹಾಗೂ ಮೇಘನಾ ಅವರ ಪಾತ್ರಗಳ ಬಗ್ಗೆ ಯಾವುದೇ ಮಾಹಿತಿ ಬಿಟ್ಟುಕೊಡದ ರಾಗಿಣಿ, ನಾನು ಪಾತ್ರಗಳಿಗಿಂತ ಕಥೆಗೆ ಪ್ರಾಮುಖ್ಯತೆ ನೀಡುತ್ತೇನೆ. ಮೊದಲಿಂದಲೂ ಕಥೆ ನಂಬಿಕೊಂಡು ಬಂದಿರುವುದರಿಂದ ಮುಖ್ಯ ನಟಿ ಇಲ್ಲವೆ ಸಹನಟಿ ಎನ್ನುವುದು ನನಗೆ ಮುಖ್ಯವಲ್ಲ ಎಂದಿದ್ದಾರೆ.

2020 ಎಲ್ಲರ ಪಾಲಿಗೆ ಕಷ್ಟಕರವಾಗಿತ್ತು. ಕೆಲವೊಬ್ಬರು ಇದನ್ನು ಇನ್ನೂ ಕಠಿಣಗೊಳಿಸಿದರು. ಈ ಅಗ್ನಿಪರೀಕ್ಷೆಯಲ್ಲಿ ನಾನು ಮತ್ತುಷ್ಟು ಗಟ್ಟಿ ಹಾಗೂ ವಿಜಯಶಾಲಿಯಾಗಿ ಹೊರಹೊಮ್ಮಿದ್ದೇನೆ ಎಂದಿದ್ದಾರೆ ರಾಗಿಣಿ. ಇನ್ನು ‘ಕರ್ವಾ 3’ ಸಿನಿಮಾ ಪ್ರೀ-ಪ್ರೊಡಕ್ಷನ್ ಕೆಲಸ ನಡೆಯುತ್ತಿದ್ದು, ಮಾರ್ಚ್ ತಿಂಗಳಿನಲ್ಲಿ ಚಿತ್ರೀಕರಣಕ್ಕೆ ರಾಗಿಣಿ ಹಾಜರಾಗುವ ಸಾಧ್ಯತೆ ಇದೆ.