ಯುಎಸ್ ಓಪನ್: ಕೊರಿಯದ ಲೀ ಹ್ಯುನ್ಗೆ ಆಘಾತ: ಕಶ್ಯಪ್ ಮುನ್ನಡೆ
Team Udayavani, Jul 21, 2017, 8:58 AM IST
ಅನಾಹೇಮ್ (ಅಮೆರಿಕ): ಭಾರತದ ಪಾರುಪಳ್ಳಿ ಕಶ್ಯಪ್ ಅವರು ಯುಎಸ್ ಓಪನ್ ಗ್ರ್ಯಾನ್ ಪ್ರಿ ಗೋಲ್ಡ್ ಬ್ಯಾಡ್ಮಿಂಟನ್ ಕೂಟದ ಮೊದಲ ಸುತ್ತಿನಲ್ಲಿ ಅಗ್ರ ಶ್ರೇಯಾಂಕದ ಕೊರಿಯದ ಲೀ ಹ್ಯುನ್ ಅವರನ್ನು ಕೆಡಹಿ ಆಘಾತಗೊಳಿಸಿದ್ದಾರೆ.
ಭುಜದ ಗಾಯದಿಂದ ಚೇತರಿಸಿಕೊಂಡಿರುವ ಕಶ್ಯಪ್ ಅಮೋಘ ಆಟದ ಪ್ರದರ್ಶನ ನೀಡಿ ವಿಶ್ವದ 15ನೇ ರ್ಯಾಂಕಿನ ಹ್ಯುನ್ ಅವರನ್ನು 21-16, 10-21, 21-19 ಗೇಮ್ಗಳಿಂದ ಉರುಳಿಸಿದರು. ಈ ಹೋರಾಟ ಒಂದು ತಾಸು ಮತ್ತು 3 ನಿಮಿಷಗಳವರೆಗೆ ಸಾಗಿತ್ತು. ದ್ವಿತೀಯ ಸುತ್ತಿನಲ್ಲಿ ವಿಶ್ವದ 59ನೇ ರ್ಯಾಂಕಿನ ಕಶ್ಯಪ್ ಹಂಗೇರಿಯ ಗಾಗ್ಲೆì ಕ್ರುಝ್ ಅವರನ್ನು ಎದುರಿಸಲಿದ್ದಾರೆ.
ಪ್ರಚಂಡ ಫಾರ್ಮ್ನಲ್ಲಿರುವ ಎಚ್ಎಸ್ ಪ್ರಣಯ್ ಆಸ್ಟ್ರೀಯದ ಲುಕಾ ವ್ರಾಬೆರ್ ಅವರನ್ನು 21-12, 21-16 ಗೇಮ್ಗಳಿಂದ ಕೆಡಹಿ ಮುನ್ನಡೆದರು. ದ್ವಿತೀಯ ಶ್ರೇಯಾಂಕದ ಇಂಡೋನೇಶ್ಯ ಸೂಪರ್ ಸೀರೀಸ್ನ ವಿಜೇತ ಪ್ರಣಯ್ ಮುಂದಿನ ಸುತ್ತಿನಲ್ಲಿ ಅಯರ್ಲ್ಯಾಂಡಿನ ಜೋಶುವಾ ಮಾಗೀ ಅವರೆದುರು ಸೆಣಸಾಡಲಿದ್ದಾರೆ.
ಭುಜದ ಸಮಸ್ಯೆಯಿಂದ ಚೇತರಿಸಿಕೊಂಡಿರುವ 5ನೇ ಶ್ರೇಯಾಂಕದ ಸಮೀರ್ ವರ್ಮ ಮೊದಲ ಸುತ್ತಿನಲ್ಲಿ ವಿಯೆಟ್ನಾಂನ ಹೋವಾಂಗ್ ನಾಮ್ ಗುಯೆಯನ್ರನ್ನು 21-5, 21-10 ಗೇಮ್ಗಳಿಂದ ಸುಲಭವಾಗಿ ಮಣಿಸಿ ದರು. ಮಾಜಿ ರಾಷ್ಟ್ರೀಯ ಚಾಂಪಿಯನ್ ಆಗಿರುವ ಸಮೀರ್ ಮುಂದಿನ ಸುತ್ತಿನಲ್ಲಿ ಕ್ರೊವೇಶಿಯದ ಝೋನಿ ಮಿರ್ ಡುರ್ಕಿಂಜಾಕ್ ಅವರನ್ನು ಎದುರಿಸಲಿದ್ದಾರೆ.
ರಿತುಪರ್ಣ ದಾಸ್ ಮುನ್ನಡೆ
ವನಿತೆಯರ ಸಿಂಗಲ್ಸ್ನಲ್ಲಿ ರಿತುಪರ್ಣ ದಾಸ್ ಅವರು ಕೆನಡದ ರಚೆಲ್ ಹೊಂಡೆರಿಚ್ ಅವರನ್ನು 21-16, 21-18 ಗೇಮ್ಗಳಿಂದ ಕೆಡಹಿದರೆ ಶ್ರೀಕೃಷ್ಣ ಪ್ರೀಯ ಕುಡರವಲ್ಲಿ ಅಮೆರಿಕದ ಮಾಯಾ ಚೆನ್ ಅವರನ್ನು 21-13, 21-16 ಗೇಮ್ಗಳಿಂದ ಸೋಲಿಸಿ ಮುನ್ನಡೆದರು. ಆದರೆ ಲಖಾನಿ ಸಾರಂಗ್, ಅಭಿಷೇಕ್ ಯೆಳೆಗಾರ್, ಸಾಯಿ ಉತ್ತೇಜಿತಾ ರಾವ್ ಚುಕ್ಕ, ರೇಶ್ಮಾ ಕಾರ್ತಿಕ್ ಮತ್ತು ರುತ್ವಿಕಾ ಶಿವಾನಿ ಗಾಡೆ ಮೊದಲ ಸುತ್ತಿನಲ್ಲಿ ಸೋತು ಹೊರಬಿದ್ದಿದ್ದಾರೆ.
ಪುರುಷರ ಡಬಲ್ಸ್ನಲ್ಲಿ ಮನು ಅತ್ರಿ ಮತ್ತು ಬಿ. ಸುಮೀತ್ ರೆಡ್ಡಿ ಅವರು ಕೆನಡದ ಜಾಸನ್ ಅಂತೋನಿ ಹೊ-ಶುಯಿ ಮತ್ತು ನಿಲ್ ಯಾಕುರ ಅವರನ್ನು 21-15, 21-19 ಗೇಮ್ಗಳಿಂದ ಸೋಲಿಸಿದರೆ ಫ್ರಾನ್ಸಿಸ್ ಅಲ್ವಿನ್ ಮತ್ತು ತರುಣ್ ಕೋನ ಅವರು ಸ್ಥಳೀಯ ಪ್ರತಿಭೆ ಯಾನ್ ಟಕ್ ಚಾನ್ ಮತ್ತು ಬ್ರಿಯಾನ್ ಚಿ ಚೆಂಗ್ ಅವರನ್ನು 21-3, 21-10 ಗೇಮ್ಗಳಿಂದ ಮಣಿಸಿದರು.
ಮಿಕ್ಸೆಡ್ ಡಬಲ್ಸ್ನಲ್ಲಿ ಮನು ಮತ್ತು ಮನೀಷಾ ಅವರು ಕೆನಡದ ನಿಲ್ ಯಾಕುರ ಮತ್ತು ಬ್ರಿಟ್ನಿ ಟಾಮ್ ಅವರನ್ನು21-13, 21-15 ಗೇಮ್ಗಳಿಂದ ಪರಾಭವಗೊಳಿಸಿದರೆ ಮೂರನೇ ಶ್ರೇಂಯಾಂಕದ ಪ್ರಣವ್ ಜೆರ್ರಿ ಚೋಪ್ರಾ ಮತ್ತು ಎನ್. ಸಿಕ್ಕಿ ರೆಡ್ಡಿ ಅವರು ಇಂಗ್ಲೆಂಡಿನ ಬೆನ್ ಲೇನ್ ಮತ್ತು ಜೆಸ್ಸಿಕಾ ಪುಗ್ ಅವರಿಗೆ 21-19, 19-21, 17-21 ಗೇಮ್ಗಳಿಂದ ಶರಣಾದರು.