ಲಂಡನ್ : ಒಲಿಂಪಿಕ್ನಲ್ಲಿ ಅಮೆರಿಕ ನಿಯೋಗದ ನೇತೃತ್ವ ವಹಿಸುವುದು ನನ್ನ ಬಾಲ್ಯದ ಕನಸಾಗಿತ್ತು. ಅದೀಗ ನಿಜವಾಗುತ್ತಿರುವುದಕ್ಕೆ ಬಹಳ ಸಂತಸವಾಗುತ್ತಿದೆ ಎಂದಿದ್ದಾರೆ ಮಿಶೆಲ್ ಒಬಾಮ. ಅವರೀಗ ಅಮೆರಿಕದ ಆತ್ಲೀಟ್ಗಳೊಂದಿಗೆ ಬೆರೆತು ಕ್ರೀಡೆಯ ಒಂದು ಭಾಗವೇ ಆಗಿದ್ದಾರೆ.
ಕಠಿನ ಪರಿಶ್ರಮದಿಂದ ಒಂದಲ್ಲ ಒಂದು ದಿನ ಇಂಥ ಸಾಧನೆಗಳನ್ನು ಮಾಡಲು ಸಾಧ್ಯವಿದೆ ಎಂಬುದರ ಕುರಿತು ನಾನು ಹಾಗೂ ನನ್ನ ತಮ್ಮ ಕನಸು ಕಾಣುತ್ತಿದ್ದೆವು ಎಂದು ಹೇಳಿದ ಮಿಶೆಲ್, ಶಿಕಾಗೋದ ದಕ್ಷಿಣ ಪ್ರಾಂತ್ಯದ ಚಿಕ್ಕ ಚಿಕ್ಕ ಮನೆಗಳ ಮೇಲೆ ಈ ಕ್ರೀಡಾಕೂಟ ಭಾರೀ ದೊಡ್ಡ ಪರಿಣಾಮ ಬೀರುತ್ತಿದೆ ಎಂದು ಸಂಭ್ರಮಿಸಿದರು.
'ದೇಶವನ್ನು ಪ್ರತಿನಿಧಿಸುವ ನಿಮ್ಮಲ್ಲಿ ಅದೆಷ್ಟು ಹೆಮ್ಮೆ, ರೋಮಾಂಚನ ಮನೆ ಮಾಡಿಕೊಂಡಿದೆಯೋ ನಮ್ಮಲ್ಲೂ ಅಷ್ಟೇ ಕುತೂಹಲ ತುಂಬಿಕೊಂಡಿದೆ. ನಿಮ್ಮಿಂದ ನಾನೂ ಸ್ಫೂರ್ತಿ ಪಡೆದಿದ್ದೇನೆ...' ಎನ್ನುತ್ತ ಅಮೆರಿಕದ ಆತ್ಲೀಟ್ಗಳನ್ನು ಹುರಿದುಂಬಿಸಿದರು.