ಸಾಲ ಮನ್ನಾ: ಕೇಂದ್ರದಿಂದ ವಿವೇಕದ ನಡೆ ಅವಶ್ಯ

Team Udayavani, Dec 14, 2018, 6:00 AM IST

ಪಂಚ ರಾಜ್ಯ ಚುನಾವಣೆಯಲ್ಲಿ ಬಿಜೆಪಿ ಯಾವೊಂದೂ ರಾಜ್ಯದಲ್ಲಿಯೂ ಅಧಿಕಾರ ಪಡೆಯುವಲ್ಲಿ ಯಶಸ್ವಿ ಆಗಿಲ್ಲ. ಈ ಹಿನ್ನೆಲೆಯಲ್ಲಿ ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರಕಾರ ಮುಂಬರುವ ಲೋಕಸಭಾ ಚುನಾವಣೆಯನ್ನು ಎದುರಿಸುವ ಬಗೆಗಿನ ತನ್ನ ಕಾರ್ಯತಂತ್ರ ಬದಲಾಯಿಸುವ ಅನಿವಾರ್ಯತೆಯಲ್ಲಿದೆ. ತನ್ನ ಭದ್ರ ನೆಲೆ ಎಂದೇ ಪರಿಗಣಿಸಿದ್ದ ಹಿಂದಿ ಭಾಷೆಯ ಪ್ರಾಬಲ್ಯದ ರಾಜ್ಯಗಳಲ್ಲಿ ವಿಫ‌ಲವಾದದ್ದು ಸಹಜವಾಗಿಯೇ ಬಿಜೆಪಿಗೆ ದಿಗಿಲು ಹುಟ್ಟಿಸಿದೆ. ಮೇಲ್ನೋಟಕ್ಕೆ ಇದು ಆಡಳಿತ ವಿರೋಧಿ ಅಲೆ ಮತ್ತು ಆಯಾ ರಾಜ್ಯಗಳಲ್ಲಿನ ಪ್ರಸಕ್ತ ರಾಜಕೀಯ ಪರಿಸ್ಥಿತಿಯ ಪರಿಣಾಮ ಎಂದು ವ್ಯಾಖ್ಯಾನಿಸಬಹುದು. ಇದು ತೇಪೆಯಷ್ಟೇ. ವಾಸ್ತವವಾಗಿ ಫ‌ಲಿತಾಂಶ ಬಿಜೆಪಿ ನಾಯಕರ ನಿದ್ದೆಗೆಡಿಸಿ ರುವುದು ಸ್ಪಷ್ಟ. ಹಲವು ವಿಶಿಷ್ಟ ಯೋಜನೆಗಳ ಮೂಲಕ ಮೋದಿ ನೇತೃತ್ವದ ಸರಕಾರ ರಾಷ್ಟ್ರ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿರಬಹುದು. ಆದರೆ ರೈತರು, ಕಾರ್ಮಿಕರು, ಮಧ್ಯಮ ವರ್ಗಗಳಿಗೆ ಸರಕಾರದ ಕಾರ್ಯವೈಖರಿ ಸಂಪೂರ್ಣ ತೃಪ್ತಿ ತಂದಿಲ್ಲ ಎಂಬುದಕ್ಕೆ ಈಗಿನ ಫ‌ಲಿತಾಂಶ ನಿದರ್ಶನ. ಹೀಗಾಗಿ ದೀರ್ಘಾವಧಿಯಲ್ಲಿ ಪರಿಣಾಮ ಬೀರುವ ಯೋಜನೆಗಳ ಜತೆಗೇ ಜನಪ್ರಿಯ ಯೋಜನೆ ಗಳತ್ತ ಚಿಂತನೆ ಆರಂಭಿಸಿದೆ. ಸಾಲ ಮನ್ನಾ, ಮಹಿಳಾ ಪರ ಯೋಜನೆಗಳಂಥ ಕ್ಷಿಪ್ರ ಅವಧಿಯಲ್ಲಿ ಜನರಿಗೆ ನೇರ ಲಾಭ ಸಿಗುವ ಯೋಜನೆಗಳತ್ತ ಕಣ್ಣು ಹಾಯಿಸಿದೆ. 

ದೇಶದ ರೈತರ ಬದುಕು ಇನ್ನೂ ಹಸನಾಗಿಲ್ಲ. ಆಡಳಿತಾರೂಢ ಸರಕಾರಗಳು ಸಾಲ ಮನ್ನಾ ಸಹಿತ ಹಲವು ತಾತ್ಕಾಲಿಕ ಪರಿಹಾರಕ್ಕೆ ಮುಂದಾಗುತ್ತಿವೆ,ಶಾಶ್ವತ ಪರಿಹಾರ ಕ್ರಮಗಳತ್ತ ಅಲ್ಲ. ಪ್ರತಿ ಚುನಾವಣೆ ಸಂದರ್ಭದಲ್ಲೂ ಪಕ್ಷಗಳು ಸಾಲ ಮನ್ನಾ ವಿಚಾರವನ್ನು ಪ್ರಸ್ತಾಪಿಸುತ್ತವೆ. ಪಕ್ಷಗಳಿಗೆ ಮತದಾರರನ್ನು ಸೆಳೆಯಲು ಇದೊಂದು ಅಸ್ತ್ರವಷ್ಟೇ. ಇದಕ್ಕೆ ಬಿಜೆಪಿಯೂ ಹೊರತಾಗಿಲ್ಲ. ಈ ಬಾರಿ ಪ್ರಧಾನಿ ಮೋದಿ ಅವರು ಸಾಲ ಮನ್ನಾ ಸಾಧ್ಯವೇ ಇಲ್ಲ ಎಂದಿದ್ದರು. ಅದರ ಬದಲಿಗೆ ಶಾಶ್ವತ ಪರಿಹಾರ ಕಲ್ಪಿಸಬಹುದಾದ ಫ‌ಸಲ್‌ ಬಿಮಾ ಯೋಜನೆ, 2022ರ ವೇಳೆಗೆ ಕೃಷಿಕರ ಆದಾಯ ದುಪ್ಪಟ್ಟುಗೊಳಿಸುವುದು, ಹೊಸ ರಫ್ತು ನೀತಿ-ಸಹಿತ ಹಲವು ಯೋಜನೆಗಳನ್ನು ಘೋಷಿಸಿದ್ದರೂ ರೈತರ ಸಂಕಷ್ಟ ದೂರವಾಗಿಲ್ಲ. ಇದುವೇ ಪಂಚ ರಾಜ್ಯ ಚುನಾವಣೆ ಮೇಲೆ ಪರಿಣಾಮ ಬೀರಿತು ಎಂಬುದು ವಿಶ್ಲೇಷಣೆಯ ಸಾರ. ಈಗ ಬಿಜೆಪಿಯೂ ರೈತರ ಸಾಲ ಮನ್ನಾದತ್ತ ಯೋಚಿಸುತ್ತಿದೆ. ಅಂದಾಜಿನ ಪ್ರಕಾರ, ಕೃಷಿಯನ್ನೇ ಅವಲಂಬಿಸಿದ ಕುಟುಂಬಗಳಲ್ಲಿನ ಮತದಾರರ ಸಂಖ್ಯೆ 50 ಕೋಟಿ. ಇಷ್ಟೊಂದು ದೊಡ್ಡ ಸಂಖ್ಯೆಯ ಮತದಾರರನ್ನು ಸೆಳೆಯಲು ತಂತ್ರ ರೂಪಿಸುತ್ತಿದೆ. ಸಾಲ ಮನ್ನಾ ಯೋಜನೆ ಅನುಷ್ಠಾನಗೊಂಡಲ್ಲಿ ಅಂದಾಜು 26 ಕೋಟಿ ರೈತರ 4 ಲಕ್ಷ ಕೋ. ರೂ. ಸಾಲ ಮನ್ನಾವಾಗಲಿದೆ. ಇದರಿಂದ ಈಗಾಗಲೇ 10.5 ಲ. ಕೋ. ರೂ. ಗಳಷ್ಟು ಸಾಲ ಬಾಕಿಯನ್ನು ಹೊಂದಿರುವ ರಾಷ್ಟ್ರೀಕೃತ ಬ್ಯಾಂಕ್‌ಗಳು ಇನ್ನಷ್ಟು ಸಂಕಷ್ಟಕ್ಕೆ ಗುರಿಯಾಗಬಹುದು. ಜತೆಗೆ ಇದಕ್ಕಾಗಿ ಆರ್‌ಬಿಐನ ಮೀಸಲು ನಿಧಿ ಬಳಸಿದರೆ ದೇಶದ ಆರ್ಥಿಕತೆಗೂ ಸಂಕಷ್ಟ ಎದುರಾಗ ಬಹುದು. ಈ ಹಣಕಾಸು ವರ್ಷದಲ್ಲಿ ದೇಶದ ಒಟ್ಟಾರೆ ಜಿಡಿಪಿ 6. 24 ಲ. ಕೋ. ರೂ. ಗಳೆಂದಿದ್ದು, ವಿತ್ತೀಯ ಕೊರತೆ 6.67 ಲ. ಕೋ. ರೂ. ನಷ್ಟಿದೆ. ಜಿಡಿಪಿಗೆ ಹೋಲಿಸಿದರೆ ವಿತ್ತೀಯ ಕೊರತೆ ಪ್ರಮಾಣ ಶೇ. 3.5 ರಷ್ಟು ಹೆಚ್ಚಿದ್ದು, ಇದನ್ನು ಶೇ. 3.3ಕ್ಕೆ ನಿಲ್ಲಿಸಲು ಸರಕಾರ ಪರದಾಡುತ್ತಿದೆ. ಇಂಥ ಸಂದರ್ಭದಲ್ಲಿ ರೈತರ ಸಾಲ ಮನ್ನಾ ನಿರ್ಧಾರ ಹೊಸ ಸಮಸ್ಯೆ ಸೃಷ್ಟಿಸೀತು ಎಂಬುದು ಆರ್ಥಿಕ ತಜ್ಞರ ಆತಂಕ. ರಾಜಕೀಯ ಪಕ್ಷಗಳು ಚುನಾವಣಾ ಕಾರ್ಯತಂತ್ರ ಬದಲಾಯಿಸುವುದರಲ್ಲಿ ತಪ್ಪಿಲ್ಲ. ರೈತರ ಸಂಕಷ್ಟಗಳಿಗೆ ಸ್ಪಂದಿಸುವುದೂ ಇಂದಿನ ತುರ್ತು ಅಗತ್ಯವೂ ಹೌದು. ಆದರೆ ದೇಶದ ಆರ್ಥಿಕತೆಯನ್ನು ಸಂಕಷ್ಟಕ್ಕೆ ಸಿಲುಕಿಸದೇ ಹಣದ ಕ್ರೋಢೀಕರಣಕ್ಕೆ ಕೇಂದ್ರ ಸರಕಾರ ಪರ್ಯಾಯ ಮಾರ್ಗವನ್ನೂ ಹುಡುಕುವುದು ಒಳಿತು.