ದಾಖಲೆ!! ಮಲ್ಟಿಪ್ಲೆಕ್ಸ್‌ನಲ್ಲಿ ಗುರುವಾರ ರಾತ್ರಿ ಚಕ್ರವರ್ತಿಯ ದರ್ಶನ

Team Udayavani, Apr 13, 2017, 4:36 PM IST

ದರ್ಶನ್‌ ಅಭಿನಯದ “ಚಕ್ರವರ್ತಿ’ ಏಪ್ರಿಲ್‌ 14 (ನಾಳೆ) ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ. ವಿಶೇಷವೆಂದರೆ, ಇದೇ ಮೊದಲ ಬಾರಿಗೆ ಮಲ್ಟಿಪ್ಲೆಕ್ಸ್‌ನಲ್ಲಿ “ಚಕ್ರವರ್ತಿ’ ಗುರುವಾರ ರಾತ್ರಿಯಿಂದಲೇ ಪ್ರದರ್ಶನಗೊಳ್ಳಲಿದೆ. ಇದು ಭಾರತ ಇತಿಹಾಸದಲ್ಲೇ ದಾಖಲೆ ಎನ್ನಲಾಗುತ್ತಿದೆ. ಯಾವ ಮಲ್ಟಿಪ್ಲೆಕ್ಸ್‌ನಲ್ಲೂ ಚಿತ್ರ ಬಿಡುಗಡೆಯ ಹಿಂದಿನ ಮಲ್ಟಿಪ್ಲೆಕ್ಸ್‌ನಲ್ಲಿ ರಾತ್ರಿಯಿಡೀ ಯಾವ ಸಿನಿಮಾನೂ ಪ್ರದರ್ಶನ ಕಂಡಿಲ್ಲ. ಮೊದಲ ಬಾರಿಗೆ ದರ್ಶನ್‌ ಅಭಿನಯದ “ಚಕ್ರವರ್ತಿ’ ತೆರೆಕಾಣುತ್ತಿದೆ. ಮಲ್ಟಿಪ್ಲೆಕ್ಸ್‌ನಲ್ಲಿ ರಾತ್ರಿ 12 ರ ನಂತರ ಪ್ರದರ್ಶನ ಕಾಣುತ್ತಿರುವುದು ಇದು ವಿಶೇಷತೆಗಳಲ್ಲೊಂದು. ಇನ್ನು, ರಾಜ್ಯಾದ್ಯಂತ ಸುಮಾರು 400 ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ “ಚಕ್ರವರ್ತಿ’ಯ ದರ್ಶನವಾಗುತ್ತಿದೆ.

ಅಂದಹಾಗೆ, “ಚಕ್ರವರ್ತಿ’ ಸಿನಿಮಾಗೆ ಸೆನ್ಸಾರ್‌ ಮಂಡಳಿಯಿಂದ “ಎ’ ಪ್ರಮಾಣ ಪತ್ರ ಸಿಕ್ಕಿದೆ. ಮಲ್ಟಿಪ್ಲೆಕ್ಸ್‌ನಲ್ಲಿ ಬಿಡುಗಡೆ ಹಿಂದಿನ ದಿನದ ರಾತ್ರಿಯೇ ಪ್ರದರ್ಶನ ಕಾಣುತ್ತಿರುವ ಹಿನ್ನೆಲೆಯಲ್ಲಿ “ಎ’ ಪ್ರಮಾಣ ಪತ್ರ ಅಲ್ಲಿಗೆ ಬರುವ ಪ್ರೇಕ್ಷಕರ ಮೇಲೆ ಪರಿಣಾಮ ಬೀರುವುದಿಲ್ಲವೇ? ಈ ಪ್ರಶ್ನೆಗೆ, ಉತ್ತರಿಸುವ ದರ್ಶನ್‌, “ಚಿತ್ರದಲ್ಲಿ ಎರಡು ದೃಶ್ಯಗಳಿಗೆ ಕತ್ತರಿ ಹಾಕುವುದಾದರೆ, “ಯು/ಎ’ ಪ್ರಮಾಣ ಪತ್ರ ಕೊಡುವುದಾಗಿ ಸೆನ್ಸಾರ್‌ ಮಂಡಳಿ ಹೇಳಿತ್ತು. ಆದರೆ, ಆ ದೃಶ್ಯಗಳು ಸಿನಿಮಾದಲ್ಲಿ ಹೈಲೆಟ್‌ ಆಗಿವೆ. ಅಷ್ಟಕ್ಕೂ ಮಲ್ಟಿಪ್ಲೆಕ್ಸ್‌ನಲ್ಲಿ ಶೇ.12 ರಷ್ಟು ಮಂದಿ ಮಾತ್ರ ನನ್ನ ಸಿನಿಮಾ ನೋಡಲು ಬರುತ್ತಾರೆ. ಆ ಬಗ್ಗೆ ನಾನು ತಲೆಕೆಡಿಸಿಕೊಳ್ಳುವುದಿಲ್ಲ. ನನಗೆ ಮುಖ್ಯ ಚಿತ್ರಮಂದಿರಗಳು ಮತ್ತು ಸಿಂಗಲ್‌ ಸ್ಕ್ರೀನ್‌ ಮುಖ್ಯ. ಈಗಾಗಲೇ ರಾಜ್ಯಾದ್ಯಂತ ನನ್ನ ಚಿತ್ರಗಳು ಸಹಜವಾಗಿಯೇ ಪ್ರದರ್ಶನ ಕಾಣುವ ಮೂಲಕ ಸಕ್ಸಸ್‌ ಆಗಿರುವುದುಂಟು. “ಚಕ್ರವರ್ತಿ’ ಕೂಡ ಸಿಂಗಲ್‌ ಸ್ಕ್ರೀನ್‌ನಲ್ಲಿ ರಿಲೀಸ್‌ ಆಗುತ್ತಿದೆ. ನನಗೆ ಅದು ಮುಖ್ಯ. ಆದರೆ, ಇದೇ ಮೊದಲ ಬಾರಿಗೆ ಮಲ್ಟಿಪ್ಲೆಕ್ಸ್‌ನಲ್ಲಿ ಗುರುವಾರ ರಾತ್ರಿಯಿಂದಲೇ “ಚಕ್ರವರ್ತಿ’ ಪ್ರದರ್ಶನ ಕಾಣುತ್ತಿದೆ ಎಂಬುದನ್ನು ಕೇಳಿ ಖುಷಿಯಾಗುತ್ತಿದೆ. ನನಗೆ ತಿಳಿದ ಮಟ್ಟಿಗೆ ಬೇರೆ ಯಾವ ಚಿತ್ರಗಳೂ ಮಲ್ಪಿಪ್ಲೆಕ್ಸ್‌ನಲ್ಲಿ ಬಿಡುಗಡೆ ಹಿಂದಿನ ರಾತ್ರಿ ಪ್ರದರ್ಶನ ಕಂಡಿಲ್ಲ. ಇದು ವಿಶೇಷ’ ಎಂದಷ್ಟೇ ಹೇಳುತ್ತಾರೆ ದರ್ಶನ್‌.