ಆಂಜನೇಯ ದರ್ಶನ!

Team Udayavani, Jan 16, 2020, 7:06 AM IST

ದರ್ಶನ್‌ ಅಭಿನಯದ “ರಾಬರ್ಟ್‌’ ಆರಂಭದಿಂದಲೂ ಜೋರು ಸುದ್ದಿ ಮಾಡುತ್ತಲೇ ಬಂದಿದೆ. ಕಳೆದ ಕ್ರಿಸ್‌ಮಸ್‌ ಹಬ್ಬಕ್ಕೊಂದು ಹೊಸ ಪೋಸ್ಟರ್‌ ಬಿಡುವ ಮೂಲಕ ಸಾಕಷ್ಟು ಕುತೂಹಲ ಕೆರಳಿಸಿತ್ತು. ಹೊಸ ವರ್ಷಕ್ಕೂ ಹೊಸದೊಂದು ಪೋಸ್ಟರ್‌ ರಿಲೀಸ್‌ ಮಾಡಿ ಇನ್ನಷ್ಟು ನಿರೀಕ್ಷೆ ಹೆಚ್ಚಿಸಿತ್ತು. ಈಗ ಸಂಕ್ರಾಂತಿ ಹಬ್ಬಕ್ಕೂ ರಿಲೀಸ್‌ ಮಾಡಿರುವ “ರಾಬರ್ಟ್‌’ ಚಿತ್ರದ ಪೋಸ್ಟರ್‌ ಎಲ್ಲರಲ್ಲೂ ಮತ್ತಷ್ಟು ಹೆಚ್ಚಿನ ನಿರೀಕ್ಷೆಗೆ ಕಾರಣವಾಗಿದೆ.

ಹೌದು, ಚಿತ್ರದ ಎರಡನೇ ಮೋಷನ್‌ ಪೋಸ್ಟರ್‌ ಬಿಡುಗಡೆಯಾಗಿದ್ದು, ದರ್ಶನ್‌ ಹೊಸ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆಂಜನೇಯ ಗೆಟಪ್‌ನಲ್ಲಿ ದರ್ಶನ್‌ ಕಾಣಿಸಿಕೊಂಡರೆ, ಹೆಗಲ ಮೇಲೆ “ಬಾಲ’ರಾಮನಾಗಿ ಮುಂಬೈ ಹುಡುಗ ಕಾಣಿಸಿಕೊಂಡಿದ್ದಾನೆ. ಆ ಹುಡುಗನ ಹೆಸರು ಜೇಸನ್‌. ಮುಂಬೈ ಮೂಲದ ಜೇಸನ್‌ಗೆ ಹತ್ತು ವರ್ಷ. ಬಾಲಿವುಡ್‌ನ‌ ಕೆಲ ಹಿಂದಿ ಚಿತ್ರಗಳು ಮತ್ತು ಜಾಹಿರಾತುಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಶಾರುಖ್‌ ಖಾನ್‌, ಅಕ್ಷಯ್‌ಕುಮಾರ್‌ ಜೊತೆಯಲ್ಲೂ ಅಭಿನಯಿಸಿದ ಅನುಭವ ಜೇಸನ್‌ಗಿದೆ. “ರಾಬರ್ಟ್‌’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೂ ಜೇಸನ್‌ ಆಗಮನವಾಗಿದೆ. ಚಿತ್ರದಲ್ಲಿ ಜೇಸನ್‌ ಅವರ ಪಾತ್ರಕ್ಕೆ ಹೆಚ್ಚು ಆದ್ಯತೆ ಕೊಡಲಾಗಿದೆಯಂತೆ. ಹಾಗಾಗಿಯೇ, ಪ್ರತಿಭಾವಂತ ಬಾಲಕನಿಗೆ ಚಿತ್ರತಂಡ ಹುಡುಕಾಟ ನಡೆಸಿತ್ತು. ಆಡಿಷನ್‌ ಕೂಡ ಮಾಡಿತ್ತು. ಅಂತಿಮವಾಗಿ ಜೇಸನ್‌ ಆಯ್ಕೆಯಾಗಿದ್ದಾನೆ.

ಇನ್ನು, “ರಾಬರ್ಟ್‌’ನಲ್ಲಿ ದರ್ಶನ್‌ ಮೂರು ಶೇಡ್‌ ಪಾತ್ರ ಮಾಡಿದ್ದಾರೆ ಎನ್ನಲಾಗುತ್ತಿದೆ. ವಿನೋದ್‌ಪ್ರಭಾಕರ್‌ ಅವರೂ ಇಲ್ಲಿ ಕಾಣಿಸಿಕೊಂಡಿದ್ದಾರೆ. ತರುಣ್‌ ಸುಧೀರ್‌ ಚಿತ್ರವನ್ನು ನಿರ್ದೇಶಿಸಿದ್ದು, ಉಮಾಪತಿ ಅವರ ನಿರ್ಮಾಣವಿದೆ. ಸದ್ಯಕ್ಕೆ ಹಾಡುಗಳ ಚಿತ್ರೀಕರಣ ಬಾಕಿ ಇದ್ದು, ಎಲ್ಲವೂ ಅಂದುಕೊಂಡಂತೆ ನಡೆದರೆ ಬೇಸಿಗೆ ವೇಳೆಗೆ “ರಾಬರ್ಟ್‌’ ಆಗಮನವಾಗುವ ಸಾಧ್ಯತೆ ಇದೆ. ಚಿತ್ರದಲ್ಲಿ ದರ್ಶನ್‌ಗೆ ಆಶಾ ಭಟ್‌ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.