ಜುಲೈ TO ಡಿಸೆಂಬರ್ ‘ಡಾಲಿ’ ರೈಡ್; ಧನಂಜಯ್ ಚಿತ್ರೋತ್ಸವ!
Team Udayavani, Jun 13, 2022, 10:12 AM IST
“ಡಾಲಿ’ ಧನಂಜಯ್ ಅಭಿಮಾನಿಗಳು ಫುಲ್ ಖುಷಿಯಾಗಿದ್ದಾರೆ. ಆ ಖುಷಿಗೆ ಜುಲೈನಿಂದ ನವೆಂಬರ್ವರೆಗೆ ಧನಂಜಯ್ ಚಿತ್ರೋತ್ಸವ!
ಹೀಗೆಂದರೆ ನಿಮಗೆ ಆಶ್ಚರ್ಯವಾಗಬಹುದು. ಧನಂಜಯ್ ನಟನೆಯ ಸಿನಿಮಾಗಳು ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಜುಲೈನಿಂದ ಆರಂಭವಾಗಿ ಡಿಸೆಂಬರ್ವರೆಗೆ ತಿಂಗಳಿಗೊಂದರಂತೆ ಬಿಡುಗಡೆಯಾಗಲಿದೆ. ಈ ಮೂಲಕ ಪ್ರತಿ ತಿಂಗಳು ಧನಂಜಯ್ ತೆರೆಮೇಲೆ ಅಬ್ಬರಿಸಲಿದ್ದಾರೆ.
ಸದ್ಯ ಬಿಡುಗಡೆಯ ದಿನಾಂಕವನ್ನು ಘೋಷಿಸಿಕೊಂಡಿರುವ ಧನಂಜಯ್ ನಟನೆಯ ಸಿನಿಮಾಗಳನ್ನು ನೋಡುವುದಾದರೆ “ಬೈರಾಗಿ’, “ಮಾನ್ಸೂನ್ ರಾಗ’, “ಜಮಾಲಿಗುಡ್ಡ’, “ಹೆಡ್ಬುಷ್’ ಚಿತ್ರಗಳು ಈಗಾಗಲೇ ಬಿಡುಗಡೆಯ ದಿನಾಂಕ ಘೋಷಿಸಿವೆ. ಇದರ ಜೊತೆಗೆ “ತೋತಾಪುರಿ’ ಹಾಗೂ “ಹೊಯ್ಸಳ’ ಚಿತ್ರಗಳು ಕೂಡಾ ಈ ವರ್ಷವೇ ಬಿಡುಗಡೆಯಾಗುವ ಸಾಧ್ಯತೆ ಇದೆ. ಈ ಮೂಲಕ ಬ್ಯಾಕ್ ಟು ಬ್ಯಾಕ್ ಧನಂಜಯ್ ಚಿತ್ರಗಳು ಬಿಡುಗಡೆಯಾದಂತಾಗುತ್ತವೆ.
ಜುಲೈ 1 ಬೈರಾಗಿ: ಶಿವರಾಜ್ಕುಮಾರ್ ನಾಯಕರಾಗಿ ನಟಿಸಿರುವ “ಬೈರಾಗಿ’ ಚಿತ್ರ ಜು.01ರಂದು ಬಿಡುಗಡೆಯಾಗಲಿದೆ. ಈ ಚಿತ್ರದಲ್ಲಿ ಧನಂಜಯ್ ಪ್ರಮುಖ ಪಾತ್ರ ಮಾಡುತ್ತಿದ್ದು, ಮತ್ತೂಮ್ಮೆ ನೆಗೆಟಿವ್ ಶೇಡ್ನಲ್ಲಿ ಅಬ್ಬರಿಸಿದ್ದಾರೆ. “ಟಗರು’ ನಂತರ ಶಿವಣ್ಣ ಹಾಗೂ ಧನಂಜಯ್ ಕಾಂಬಿನೇಶನ್ನಲ್ಲಿ ಬರುತ್ತಿರುವ ಮತ್ತೂಂದು ಸಿನಿಮಾ ಆಗಿರುವುದರಿಂದ ಚಿತ್ರದ ಮೇಲೆ ನಿರೀಕ್ಷೆ ಇದೆ.
ಇದನ್ನೂ ಓದಿ:ಬೆಂಗಳೂರಿನಲ್ಲಿ ಡ್ರಗ್ ಪಾರ್ಟಿ: ನಟಿ ಶ್ರದ್ಧಾ ಕಪೂರ್ ಸಹೋದರ ಸಿದ್ದಾಂತ್ ಕಪೂರ್ ಬಂಧನ
ಆಗಸ್ಟ್ 12 ಮಾನ್ಸೂನ್ ರಾಗ: ಧನಂಜಯ್ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಮತ್ತೂಂದು ಸಿನಿಮಾ ಎಂದರೆ “ಮಾನ್ಸೂನ್ ರಾಗ’. ಈ ಚಿತ್ರ ಕೂಡಾ ಬಿಡುಗಡೆಯ ದಿನಾಂಕ ಅನೌನ್ಸ್ ಮಾಡಿದ್ದು, ಆಗಸ್ಟ್ 12ರಂದು ಬಿಡುಗಡೆಯಾಗಲಿದೆ. ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಫಸ್ಟ್ಲುಕ್ಗೆ ಮೆಚ್ಚುಗೆ ವ್ಯಕ್ತವಾಗಿದೆ.
ಸೆಪ್ಟೆಂಬರ್ 09 ಜಮಾಲಿಗುಡ್ಡ: “ಒನ್ಸ್ ಅಪಾನ್ ಎ ಟೈಮ್ ಇನ್ ಜಮಾಲಿಗುಡ್ಡ’ ಚಿತ್ರ ಕೂಡಾ ಬಿಡುಗಡೆಯ ದಿನಾಂಕ ಘೋಷಿಸಿದೆ. ಸೆಪ್ಟೆಂಬರ್ 09ರಂದು ಈ ಚಿತ್ರ ಬಿಡುಗಡೆಯಾಗಲಿದ್ದು, ಈ ಚಿತ್ರದಲ್ಲೂ ಧನಂಜಯ್ ಲುಕ್ ವಿಭಿನ್ನವಾಗಿದೆ.
ಅಕ್ಟೋಬರ್ 2 1ಹೆಡ್ ಬುಷ್: ಧನಂಜಯ್ ಔಟ್ ಅಂಡ್ ಔಟ್ ರಗಡ್ ಲುಕ್ನಲ್ಲಿ ಕಾಣಿಸಿಕೊಂಡಿರುವ “ಹೆಡ್ಬುಷ್’ ಚಿತ್ರ ಅಕ್ಟೋಬರ್ 21ರಂದು ಬಿಡುಗಡೆಯಾಲಿದೆ. ಡಾನ್ ಜಯರಾಜ್ ಸುತ್ತ ಹೆಣೆದಿರುವ ಈ ಚಿತ್ರದ ನಿರ್ಮಾಣದಲ್ಲೂ ಧನಂಜಯ್ ಕೈ ಜೋಡಿಸಿದ್ದಾರೆ.
ಜುಲೈನಿಂದ ಆರಂಭವಾಗಿ ಅಕ್ಟೋಬರ್ವರೆಗೆ ಸತತ 4 ತಿಂಗಳು 4 ಸಿನಿಮಾಗಳು ಬಿಡುಗಡೆಯಾದರೆ, “ತೋತಾಪುರಿ’ ಚಿತ್ರದಲ್ಲೂ ಧನಂಜಯ್ ನಟಿಸಿದ್ದು, ಈ ಚಿತ್ರ ಕೂಡಾ ಬಿಡುಗಡೆಯ ಹಂತಕ್ಕೆ ಬಂದಿದೆ. ಅಲ್ಲಿಗೆ 2022ರಲ್ಲಿ ಅತಿ ಹೆಚ್ಚು ಸಿನಿಮಾ ಬಿಡುಗಡೆಯಾದ ನಾಯಕ ನಟರ ಪಟ್ಟಿಯಲ್ಲಿ ಧನಂಜಯ್ ಮುಂದಿರುವ ಸಾಧ್ಯತೆ ಇದೆ.