ಕನ್ನಡಕ್ಕೆ ಡಬ್‌ ಮಾಡಲ್ಲ: ರಜನಿ

Team Udayavani, Jan 14, 2019, 6:17 AM IST

ಎಲ್ಲರಿಗೂ ಒಂದು ಕುತೂಹಲವಿತ್ತು. ರಜನೀಕಾಂತ್‌ “ಪೇಟಾ’ ಚಿತ್ರಕ್ಕೆ ಡಬ್ಬಿಂಗ್‌ ಮಾಡ್ತಾರಾ ಎಂಬುದೇ ಆ ಕುತೂಹಲದ ಪ್ರಶ್ನೆ. ಅದಕ್ಕೆ ಉತ್ತರ, ಯಾವುದೇ ಕಾರಣಕ್ಕೂ ಕನ್ನಡದಲ್ಲಿ ಡಬ್ಬಿಂಗ್‌ ಮಾಡುವುದಿಲ್ಲ ಎಂದು ರಜನೀಕಾಂತ್‌ ಸ್ಪಷ್ಟಪಡಿಸಿದ್ದಾರೆ. ಹೌದು, ಇತ್ತೀಚೆಗೆ ಖಾಸಗಿ ವಾಹಿನಿಯಲ್ಲಿ ಸ್ವತಃ ರಜನೀಕಾಂತ್‌ ಅವರೇ ಇದನ್ನು ಸ್ಪಷ್ಟಪಡಿಸಿದ್ದಾರೆ.

ಇದಕ್ಕೂ ಮುನ್ನ, ಕನ್ನಡದಲ್ಲಿ ವಿತರಣೆ ಹಕ್ಕು ಪಡೆದಿದ್ದ ವಿತರಕ ಜಾಕ್‌ ಮಂಜು ಅವರು, ರಜನೀಕಾಂತ್‌ ಅವರು ಕನ್ನಡ ಡಬ್‌ ಮಾಡಿದರೆ ಮಾತ್ರ ವಿತರಣೆ ಮಾಡುವುದಾಗಿ ಹೇಳಿದ್ದರು. ರಜನೀಕಾಂತ್‌ ಅವರ ಧ್ವನಿ ಇದ್ದರೆ, ಹೆಚ್ಚು ತಲುಪುತ್ತದೆ ಎಂಬ ಕಾರಣಕ್ಕೆ ಜಾಕ್‌ಮಂಜು ಹಾಗೆ ಹೇಳಿದ್ದರು. ಆದರೆ, ಚಿತ್ರ ಕಳೆದ ಶುಕ್ರವಾರ ತೆರೆಕಂಡಿದೆ. ಅದು ರಜನಿಕಾಂತ್‌ ತಮಿಳು ಭಾಷೆಯಲ್ಲೇ ಇದೆ.

ಅಷ್ಟಕ್ಕೂ ರಜನಿಕಾಂತ್‌ ಅವರು ಕನ್ನಡ ಡಬ್‌ ಮಾಡುತ್ತಾರೋ, ಇಲ್ಲವೋ ಎಂಬ ಸಾಕಷ್ಟು ಚರ್ಚೆ ಕೂಡ ನಡೆದಿತ್ತು. ಆದರೆ, ರಜನೀಕಾಂತ್‌, ಕನ್ನಡಕ್ಕೆ ಡಬ್‌ ಮಾಡುವುದಿಲ್ಲ ಎಂದು ಸ್ಪಷ್ಟವಾಗಿ ಹೇಳುವ ಮೂಲಕ ಎಲ್ಲಾ ಅಂತೆ, ಕಂತೆಗಳಿಗೆ ತೆರೆ ಎಳೆದಿದ್ದಾರೆ. ಅಂದಹಾಗೆ, “ಪೇಟಾ’ ಚಿತ್ರಕ್ಕೆ ಎಲ್ಲೆಡೆಯಂದ ಮೆಚ್ಚುಗೆ ಸಿಗುತ್ತಿದೆ ಎಂದು ಹೇಳುವ ವಿತರಕ ಜಾಕ್‌ಮಂಜು, “ಎರಡನೇ ದಿನ ತುಂಬಾ ಡಲ್‌ ಆಗಿತ್ತು.

ಇನ್ನೇನು ಸಿನಿಮಾ ಅಷ್ಟಕ್ಕಷ್ಟೇ ಎಂದು ಭಾವಿಸಿದ ಬೆನ್ನಲ್ಲೇ, ಚಿತ್ರಕ್ಕೆ ಒಳ್ಳೆಯ ಮೆಚ್ಚುಗೆ ಸಿಕ್ಕಿತು. ಅವರ ಹಿಂದಿನ ಚಿತ್ರಗಳಂತೆ ಇದಕ್ಕೂ ಹಾಗೆಯೇ ಪ್ರತಿಕ್ರಿಯೆ ಸಿಗುತ್ತಾ ಎಂಬ ಪ್ರಶ್ನೆ ಇತ್ತು. ಆದರೆ, ಜನರು ಅವರ ಶೈಲಿಯ ಚಿತ್ರ ಎಂಬುದನ್ನು ಒಪ್ಪಿ ಅಪ್ಪಿದ್ದಾರೆ. ಈ ಚಿತ್ರದಲ್ಲಿ ಪೂರ್ಣ ಪ್ರಮಾಣ ರಜನೀಕಾಂತ್‌ ಅವರ ಶೈಲಿಯ ಪಾತ್ರ ಇದೆ. ಅದೇ ಚಿತ್ರದ ಹೈಲೈಟ್‌ ಎಂದು ವಿವರ ಕೊಡುವ ಜಾಕ್‌ಮಂಜು, ಊರ್ವಶಿ ಚಿತ್ರಮಂದಿರದಲ್ಲಿ ಎರಡು ಪ್ರದರ್ಶನ ಬದಲು ನಾಲ್ಕು ಪ್ರದರ್ಶನಕ್ಕೆ ಏರಿಸಲಾಗಿದೆ.