ಗಂಟುಮೂಟೆ: ಪಾತ್ರವನ್ನು ತಿಂದುಕೊಂಡು ನಟಿಸಿದ್ದಾರಂತೆ ತೇಜು!
Team Udayavani, Oct 17, 2019, 7:16 PM IST
ಈಗಾಗಲೇ ಹಲವಾರು ಚಿತ್ರಗಳ ನಿರ್ದೇಶನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿ ಹಲವಾರು ಕಿರುಚಿತ್ರ ಮತ್ತು ವೆಬ್ ಸೀರೀಸ್ ಮೂಲಕವೂ ಹೆಸರು ಮಾಡಿರುವವರು ರೂಪಾ ರಾವ್. ಆ ಎಲ್ಲ ಅನುಭವಗಳನ್ನೂ ಒಟ್ಟುಗೂಡಿಸಿಕೊಂಡೇ ಅವರು ಗಂಟುಮೂಟೆ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಈ ಮೂಲಕವೇ ಸ್ವತಂತ್ರ ನಿರ್ದೇಶಕಿಯಾಗಿಯೂ ಪಾದಾರ್ಪಣೆ ಮಾಡಿದ್ದಾರೆ. ಇದರೊಂದಿಗೆ ಕನ್ನಡದಲ್ಲಿ ಕಡಿಮೆ ಸಂಖ್ಯೆಯಲ್ಲಿರೋ ಮಹಿಳಾ ನಿರ್ದೇಶಕರಿಯರ ಸಾಲಿಗೂ ಅವರು ಸೇರ್ಪಡೆಗೊಂಡಿದ್ದಾರೆ.
ಈಗಾಗಲೇ ಈ ಸಿನಿಮಾದ ಟ್ರೆÃಲರ್ ಭಾರೀ ಸದ್ದು ಮಾಡುತ್ತಿದೆ. ಈ ಮೂಲಕವೇ ಮಹಿಳಾ ನಿರ್ದೇಶಕಿಯಾಗಿ ರೂಪಾ ರಾವ್ ಮಡಿವಂತಿಕೆಯನ್ನು ಮೀರಿಕೊಂಡು ಈ ಚಿತ್ರದ ಕಥಾ ವಸ್ತುವನ್ನು ಆರಿಸಿಕೊಂಡಿದ್ದಾರೆಂಬ ವಿಚಾರವೂ ಜಾಹೀರಾಗಿದೆ. ಅಂದಹಾಗೆ ಈ ಚಿತ್ರದಲ್ಲಿ ತೇಜು ಬೆಳವಾಡಿ ಎಂಬ ಹುಡುಗಿ ನಾಯಕಿಯಾಗಿ ನಟಿಸಿದ್ದಾರೆ. ಈ ಪಾತ್ರಕ್ಕೆ ನಡೆದಿರೋ ಹುಡುಕಾಟ, ಅದಕ್ಕೆ ತೇಜು ಆಯ್ಕೆಯಾದ ರೀತಿ ಮತ್ತು ಅದನ್ನು ಆಕೆ ನಿರ್ವಹಿಸಿರೋ ರೀತಿಯ ಬಗ್ಗೆ ರೂಪಾ ರಾವ್ ಅನೇಕ ವಿಚಾರಗಳನ್ನು ಬಿಚ್ಚಿಟ್ಟಿದ್ದಾರೆ.
ತೇಜು ಬೆಳವಾಡಿ ಪ್ರಸಿದ್ಧ ರಂಗಭೂಮಿ ನಟ ಕಂ ಸಿನಿಮಾ ನಟ ಪ್ರಕಾಶ್ ಬೆಳವಾಡಿಯವರ ಮಗಳು. ತಂದೆಯ ಕಾರಣದಿಂದ ಸಿನಿಮಾ ವಾತಾವರಣದಲ್ಲಿಯೇ ಬೆಳೆದಿದ್ದ ತೇಜು ಪಾಲಿಗೆ ಅದೃಷ್ಟವೆಂಬಂತೆ ಈ ಪಾತ್ರ ಒಲಿದಿದೆ. ರೂಪಾ ರಾವ್ ಈ ಪಾತ್ರಕ್ಕಾಗಿ ವರ್ಷಾಂತರಗಳಿಂದಲೂ ಹುಡುಕಾಟ ನಡೆಸಿದ್ದರಂತೆ. ಆದರೆ ಅದಕ್ಕೆ ಸೂಟ್ ಆಗುವಂತೆ ಯಾರೂ ಸಿಕ್ಕಿರಲಿಲ್ಲ. ಕಡೆಗೂ ಪ್ರಕಾಶ್ ಬೆಳವಾಡಿಯವರ ಮಗಳು ತೇಜು ಇದಕ್ಕೆ ಆಯ್ಕೆಯಾಗಿದ್ದಳು. ಆ ನಂತರದಲ್ಲಿ ತೇಜು ನಿರೀಕ್ಷೆಗೂ ಮೀರಿ ಈ ಪಾತ್ರವನ್ನು ನುಂಗಿಕೊಂಡು ನಟಿಸಿದ್ದಾರಂತೆ. ಈ ಚಿತ್ರ ಇದೇ ಹದಿನೆಂಟರಂದು ತೆರೆಗಾಣುತ್ತಿದೆ.