ವಿಕ್ರಮ್ಗೆ “ಕೆಜಿಎಫ್’ ಶ್ರೀನಿಧಿ ನಾಯಕಿ
ತಮಿಳು ಚಿತ್ರದಲ್ಲಿ ಕರಾವಳಿ ಬೆಡಗಿ
Team Udayavani, Oct 17, 2019, 3:01 AM IST
“ಕೆಜಿಎಫ್’ ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಬಂದ ಶ್ರೀನಿಧಿ ಶೆಟ್ಟಿ ಈಗ ತಮಿಳು ಸಿನಿಮಾವೊಂದನ್ನು ಒಪ್ಪಿಕೊಂಡಿದ್ದಾರೆ. ವಿಕ್ರಮ್ ನಾಯಕರಾಗಿರುವ ಹೊಸ ಚಿತ್ರದಲ್ಲಿ ಶ್ರೀನಿಧಿ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಈ ಸುದ್ದಿಯನ್ನು ಶ್ರೀನಿಧಿ ಹಾಗೂ ಚಿತ್ರ ನಿರ್ಮಾಣ ಸಂಸ್ಥೆ ಅಧಿಕೃತಗೊಳಿಸಿದೆ. ವಿಕ್ರಮ್ 58 ಸಿನಿಮಾದಲ್ಲಿ ಶ್ರೀನಿಧಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇನ್ನು, “ಕೆಜಿಎಫ್’ ಚಿತ್ರ ಅನೇಕರಿಗೆ ದೊಡ್ಡ ಅವಕಾಶಗಳ ಬಾಗಿಲನ್ನು ತೆರೆದಿದ್ದು ಸುಳ್ಳಲ್ಲ.
ಅದು ಕಲಾವಿದರಿಂದ ಹಿಡಿದು ತಾಂತ್ರಿಕ ವರ್ಗದವರಿಗೂ ಬೇರೆ ಬೇರೆ ಸಿನಿಮಾಗಳಿಂದ, ಬೇರೆ ಬೇರೆ ಭಾಷೆಗಳಿಂದ ಅವಕಾಶಗಳು ಬರಲಾರಂಭಿಸಿತ್ತು. ಅದರಲ್ಲಿ ನಾಯಕಿ ಶ್ರೀನಿಧಿ ಶೆಟ್ಟಿ ಕೂಡಾ ಒಬ್ಬರು. “ಕೆಜಿಎಫ್’ ಚಿತ್ರದ ಮೂಲಕ ಸಿನಿಮಾ ಲೋಕಕ್ಕೆ ಎಂಟ್ರಿಕೊಟ್ಟ ಶ್ರೀನಿಧಿಗೆ ಆ ಚಿತ್ರದ ನಂತರ ಬೇರೆ ಬೇರೆ ಭಾಷೆಗಳಿಂದ ಅವಕಾಶ ಬಂದಿತ್ತು. ಆದರೆ, ಶ್ರೀನಿಧಿ ಮಾತ್ರ “ಕೆಜಿಎಫ್-2’ನತ್ತ ಗಮನ ಹರಿಸಿದ್ದು,
ಆ ಸಿನಿಮಾ ಮುಗಿಯುವವರೆಗೆ ಬೇರೆ ಸಿನಿಮಾ ಮಾಡುವುದಿಲ್ಲ ಎಂದಿದ್ದ ಶ್ರೀನಿಧಿ ಈಗ, “ಕೆಜಿಎಫ್-2′ ಜೊತೆಗೆ ಹೊಸ ಸಿನಿಮಾ ಒಪ್ಪಿಕೊಂಡಿದ್ದಾರೆ. ಅಂದಹಾಗೆ, “ಕೆಜಿಎಫ್’ನ ಮೊದಲ ಭಾಗಕ್ಕೆ ಹೋಲಿಸಿದರೆ “ಕೆಜಿಎಫ್-2’ನಲ್ಲಿ ಶ್ರೀನಿಧಿಗೆ ದೊಡ್ಡ ಪಾತ್ರವಿದೆಯಂತೆ. ಆಕೆಯ ಪಾತ್ರ ಚಾಪ್ಟರ್ 2ನ ಅಚ್ಚರಿಯಂತೆ. ಮೊದಲ ಭಾಗ ನೋಡಿದವರು ಏನು ಬೇಸರ ಮಾಡಿಕೊಂಡಿದ್ದರೋ, ಅದಕ್ಕೆಲ್ಲಾ ಉತ್ತರ ಚಾಪ್ಟರ್ 2ನಲ್ಲಿ ಸಿಗಲಿದೆಯಂತೆ.