ಆಸ್ಟ್ರೇಲಿಯಾಗೆ ಕಿಸ್‌

Team Udayavani, Jul 24, 2018, 11:06 AM IST

ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ನಿರ್ದೇಶಕ ಎ.ಪಿ. ಅರ್ಜುನ್‌ ಅವರ ಹೊಸ ಚಿತ್ರ “ಕಿಸ್‌’ ಇಷ್ಟರಲ್ಲಿ ಬಿಡುಗಡೆಯಾಗಬೇಕಿತ್ತು. ಆದರೆ, ಕಾರಣಾಂತರಗಳಿಂದ ಚಿತ್ರ ತಡವಾಗಿದ್ದು, ಎರಡು ಹಾಡುಗಳನ್ನು ಬಿಟ್ಟರೆ ಮಿಕ್ಕಂತೆ ಚಿತ್ರೀಕರಣ ಮತ್ತು ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳನ್ನು ಮುಗಿಸಿದ್ದಾರೆ ಅರ್ಜುನ್‌.

ಇನ್ನು ಎರಡು ಹಾಡುಗಳ ಚಿತ್ರೀಕರಣಕ್ಕೆ ಅವರು ಸದ್ಯದಲ್ಲೇ ಆಸ್ಟ್ರೇಲಿಯಾಗೆ ಹೋಗುವ ಯೋಚನೆಯಲ್ಲಿದ್ದಾರೆ. ಅಲ್ಲಿಂದ ಬಂದ ನಂತರ, ಸೆಪ್ಟೆಂಬರ್‌ನಲ್ಲಿ ಚಿತ್ರ ಬಿಡುಗಡೆಯಾಗುವ ಸಾಧ್ಯತೆ ಇದೆ. ಇಷ್ಟಕ್ಕೂ ಚಿತ್ರ ತಡವಾಗುವುದಕ್ಕೆ ಕಾರಣವೇನು ಎಂಬ ಪ್ರಶ್ನೆ ಬರಬಹುದು. ಈ ಕುರಿತು ಅರ್ಜುನ್‌ ಅವರನ್ನು ಕೇಳಿದರೆ, ಎರಡು ಕಾರಣಗಳನ್ನು ಮುಂದಿಡುತ್ತಾರೆ.

“ನಾವು ಕಳೆದ ವರ್ಷ ಜುಲೈ 10 ರಂದು ಸಿನಿಮಾ ಆರಂಭಿಸಿದೆವು. ಚಿತ್ರೀಕರಣ ಆರಂಭವಾಗಿ ಸ್ವಲ್ಪ ದಿನದಲ್ಲೇ ನಮ್ಮ ನಾಯಕಿಯ ಎಕ್ಸಾಂ ಬಂತು. ಹಾಗಾಗಿ, ಆ ಸಮಯದಲ್ಲಿ ಚಿತ್ರೀಕರಣ ಮಾಡಲೇ ಇಲ್ಲ. ಇಡೀ ಸಿನಿಮಾ ನಾಯಕ-ನಾಯಕಿಯ ಸುತ್ತ ಸುತ್ತುವುದರಿಂದ ನಾಯಕಿಯನ್ನು ಬಿಟ್ಟು ಚಿತ್ರೀಕರಿಸುವಂತೆ ಇರಲಿಲ್ಲ.

ಎಕ್ಸಾಂ ಮುಗಿಯುತ್ತಿದ್ದಂತೆ ನಮ್ಮ ನಿರ್ಮಾಪಕರು ಚುನಾವಣೆಯಲ್ಲಿ ಬಿಝಿಯಾದರು. ಆ ಸಮಯದಲ್ಲೂ ನಾವು ಚಿತ್ರೀಕರಣ ಮಾಡಲಿಲ್ಲ. ಸುಮಾರು ಐದು ತಿಂಗಳು “ಕಿಸ್‌’ ಸಿನಿಮಾ ಚಿತ್ರೀಕರಣವಾಗಲೇ ಇಲ್ಲ. ಈ ಕಾರಣದಿಂದ ಸಿನಿಮಾ ಸ್ವಲ್ಪ ತಡವಾಗಿದೆ. ಈಗ ಬಹುತೇಕ ಎಲ್ಲಾ ಕೆಲಸಗಳು ಪೂರ್ತಿಯಾಗಿದ್ದು, ಎರಡು ಹಾಡಷ್ಟೇ ಬಾಕಿ ಇದೆ’ ಎಂದು ವಿವರ ಕೊಡುತ್ತಾರೆ ಅರ್ಜುನ್‌. 

ಚಿತ್ರದಲ್ಲಿ ಶ್ರೀಲೀಲಾ ಹಾಗೂ ವಿರಾಟ್‌ ನಾಯಕ-ನಾಯಕಿಯಾಗಿ ನಟಿಸಿದ್ದಾರೆ. ಇಬ್ಬರಿಗೂ ಇದು ಮೊದಲ ಸಿನಿಮಾ. ಚಿತ್ರದಲ್ಲಿ ಚಿಕ್ಕಣ್ಣ, ದತ್ತಣ್ಣ, ಸಾಧು ಕೋಕಿಲ ಸೇರಿದಂತೆ ಅನೇಕರು ನಟಿಸಿದ್ದಾರೆ. ಬೆಂಗಳೂರು, ಮಡಿಕೇರಿ, ಊಟಿ, ಗೋವಾ, ಹೃಷಿಕೇಶ, ಆಗ್ರಾ, ಜೈಸಲ್ಮೇರ್‌, ಕುದುರೆಮುಖ, ಕೇರಳ ಸುತ್ತಮುತ್ತ ಚಿತ್ರೀಕರಣ ನಡೆದಿದೆ. ಚಿತ್ರಕ್ಕೆ ವಿ. ಹರಿಕೃಷ್ಣ ಸಂಗೀತ ಸಂಯೋಜಿಸಿದರೆ, ರವಿಕುಮಾರ್‌ ಎನ್ನುವವರು ನಿರ್ಮಿಸುತ್ತಿದ್ದಾರೆ.

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ