‘ನಮ್ಮ ಜೊತೇಲಿ ಇರೋರನ್ನ ನಾವು ಚೆನ್ನಾಗಿ ನೋಡ್ಕಂಡ್ರೆ…’; ಏನ್ ಒಡೆಯ ಇದು!?

Team Udayavani, Dec 1, 2019, 7:23 PM IST

ಬೆಂಗಳೂರು: ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ‘ಒಡೆಯ’ ಟ್ರೈಲರ್ ಇವತ್ತು ರಿಲೀಸ್ ಆಗಿದೆ. ಎಂದಿನಂತೆ ದರ್ಶನ್ ಚಿತ್ರದ ಟ್ರೈಲರ್ ಗೆ ಸಿಗೋ ಪ್ರತಿಕ್ರಿಯೆನೇ ಯೂಟ್ಯೂಬ್ ನಲ್ಲಿ ‘ಒಡೆಯ’ ಚಿತ್ರದ ಟ್ರೈಲರ್ ಗೂ ಸಿಗುತ್ತಿದೆ. ಬಿಡುಗಡೆಗೊಂಡ 09 ಗಂಟೆಗಳಲ್ಲಿ 10 ಲಕ್ಷ ಬಾರಿ ವೀಕ್ಷಣೆಗೆ ಒಳಪಟ್ಟಿದೆ.

ದರ್ಶನ್ ಅವರ ಈ ಹಿಂದಿನ ಚಿತ್ರ ‘ಯಜಮಾನ’ದಂತೆ ಈ ಚಿತ್ರದಲ್ಲೂ ಖಡಕ್ ಡೈಲಾಗ್ ಗಳು ಮತ್ತು ರೋಮಾಂಚಕ ಸ್ಟಂಟ್ ಗಳಿರುವುದು ಟ್ರೈಲರ್ ನಿಂದಲೇ ಗೊತ್ತಾಗುತ್ತಿದೆ. ಇನ್ನು ಸಾಧುಕೋಕಿಲಾ, ಚಿಕ್ಕಣ್ಣ, ತಬಲಾ ನಾಣಿ ಸೇರಿದಂತೆ ಕನ್ನಡದ ಹಾಸ್ಯನಟರ ದಂಡೇ ಈ ಚಿತ್ರದಲ್ಲಿರುವುದರಿಂದ ಪ್ರೇಕ್ಷಕರಿಗೆ ನಗುವಿಗೇನೂ ಕೊರತೆ ಮಾಡಲಾರ ಈ ‘ಒಡೆಯ’!

‘ನಮ್ಮ ಜೊತೇಲಿ ಇರೋರನ್ನ ನಾವು ಚೆನ್ನಾಗಿ ನೋಡ್ಕೊಂಡ್ರೆ, ಮೆಲ್ಗಡೆ ಇರೋನು ನಮ್ಮನ್ನ ಚೆನ್ನಾಗಿ ನೋಡ್ಕೊತಾನೆ’, ‘ಆಳ್ ತರಾ ದುಡಿಯೋಕೂ ಗೊತ್ತು ಅರಸನ ತರ ಮೆರೆಯೋಕೂ ಗೊತ್ತಿರೋ ಅವ್ರ ತಾಕತ್ತ್ ಬಗ್ಗೆ ನಾನ್ ಎಷ್ಟು ಹೇಳಿದ್ರೂ ಕಡಿಮೇನೆ’ ‘ಅಧಿಕಾರ ಅನ್ನೋದು ಇವತ್ತು ಒಬ್ರ ಹತ್ರ ಇದ್ರೆ ನಾಳೆ ಇನ್ನೊಬ್ರ ಹತ್ರ ಇರುತ್ತೆ ; ಆದ್ರೆ ಅನ್ನ ಹಾಕೋ ರೈತನಿಗೆ ಮೋಸ ಆದ್ರೆ ನಾನು ಸುಮ್ನೆ ಇರೋದಿಲ್ಲ’ – ಹೀಗೆ ದರ್ಶನ್ ಬ್ರ್ಯಾಂಡ್ ನ ಡೈಲಾಗ್ ಗಳೇ ಟ್ರೈಲರ್ ಗೊಂದು ಮಾತಿನ ತೂಕ ಕೊಟ್ಟಿದೆ.

ಇನ್ನು ರವಿಶಂಕರ್, ಸನಾ ತಿಮ್ಮಯ್ಯ, ದೇವರಾಜ್, ಶರತ್ ಲೋಹಿತಾಶ್ವ, ಚಿತ್ರಾ ಶೆಣೈ ಸೇರಿದಂತೆ ಸ್ಯಾಂಡಲ್ ವುಡ್ ತಾರೆಗಳ ದಂಡೇ ಒಡೆಯನಿಗೆ ಈ ಚಿತ್ರದಲ್ಲಿ ಜೊತೆಯಾಗಿರುವುದು ಇನ್ನೊಂದು ವಿಶೇಷ.

ಅರ್ಜುನ್ ಜನ್ಯಾ ಅವರ ಸಂಗೀತ ನಿರ್ದೇಶನದಲ್ಲಿ ಜಯಂತ್ ಕಾಯ್ಕಿಣಿ, ನಾಗೇಂದ್ರ ಪ್ರಸಾದ್ ಮತ್ತು ಕವಿರಾಜ್ ಅವರ ಸಾಹಿತ್ಯದ ಗೀತೆಗಳು ದರ್ಶನ್ ಅಭಿಮಾನಿಗಳ ಬಾಯಲ್ಲಿ ಈಗಾಗಲೇ ನಲಿದಾಡುತ್ತಿವೆ.

ಸಂದೇಶ್ ಪ್ರೊಡಕ್ಷನ್ಸ್ ನಡಿಯಲ್ಲಿ ಎನ್. ಸಂದೇಶ್ ನಿರ್ಮಾಣದಲ್ಲಿ ಮೂಡಿಬಂದಿರುವ ಈ ಚಿತ್ರವನ್ನು ಎಂ.ಡಿ. ಶ್ರೀಧರ್ ನಿರ್ದೇಶಿಸಿದ್ದು ಇದೇ ಡಿಸೆಂಬರ್ 12ನೇ ತಾರೀಖಿಗೆ ಥಿಯೇಟರ್ ಗಳಲ್ಲಿ ‘ಒಡೆಯ’ನ ದರ್ಶನವಾಗಲಿದೆ.