ರಾಮನ ಬಳಗದಲ್ಲಿ ಪ್ರಣೀತಾ
Team Udayavani, Dec 18, 2018, 11:27 AM IST
ಕೆಲ ದಿನಗಳ ಹಿಂದಷ್ಟೇ ಟೈಟಲ್ ಟೀಸರ್ ಮೂಲಕ ಹೊರಬಂದು, ಒಂದಷ್ಟು ಕುತೂಹಲಕ್ಕೆ ಕಾರಣವಾಗಿರುವ “ರಾಮನ ಅವತಾರ’ ಚಿತ್ರತಂಡದ ಕಡೆಯಿಂದ ಮತ್ತೂಂದು ಸುದ್ದಿ ಹೊರಬಿದ್ದಿದೆ. ಅದೇನಪ್ಪ ಅಂದ್ರೆ, ರಿಷಿ, ರಾಜ್. ಬಿ ಶೆಟ್ಟಿ ಮತ್ತು ಡ್ಯಾನಿಶ್ ಸೇಠ್ ಇರುವ ರಾಮನ ಬಳಗಕ್ಕೆ ಮತ್ತೂಂದು ಹೊಸ ಎಂಟ್ರಿಯಾಗಿದೆ. ಅದೇ ಪ್ರಣೀತಾ ಸುಭಾಷ್.
ಹೌದು, ಕಳೆದ ಒಂದೂವರೆ ತಿಂಗಳಿನಿಂದ ರಾಮನ ಅವತಾರ ಚಿತ್ರಕ್ಕೆ ನಾಯಕಿಯ ಹುಡುಕಾಟದಲ್ಲಿದ್ದ ಚಿತ್ರತಂಡಕ್ಕೆ ಕೊನೆಗೂ ಪ್ರಣೀತಾ ನಾಯಕಿಯಾಗಿ ಸಿಕ್ಕಿದ್ದಾರೆ. ಚಿತ್ರದಲ್ಲಿ ನಟ ರಿಷಿ ಅವರಿಗೆ ನಾಯಕಿಯಾಗಿ ಪ್ರಣೀತಾ ಜೋಡಿಯಾಗಲಿದ್ದು, “ಇಲ್ಲಿಯವರೆಗೂ ಸಿಕ್ಕಿರದಂಥ ಪಾತ್ರ ಈ ಚಿತ್ರದಲ್ಲಿ ನನಗೆ ಸಿಕ್ಕಿದೆ’ ಎನ್ನುತ್ತಾರೆ ಪ್ರಣೀತಾ.
“ಸಾಮಾನ್ಯವಾಗಿ ಬಹುತೇಕ ಸಿನಿಮಾಗಳಲ್ಲಿ ಹೀರೋಯಿನ್ ಅಂದ್ರೆ ಹೀರೋಗೆ ಜೋಡಿಯಾಗಿ ಒಂದೆರಡು ಹಾಡುಗಳಲ್ಲಿ ಅವರ ಜೊತೆ ಹೆಜ್ಜೆ ಹಾಕೋದಕ್ಕಷ್ಟೇ ಸೀಮಿತವಾಗಿರುತ್ತದೆ. ಆದ್ರೆ ಕೆಲವೊಂದು ಸಿನಿಮಾಗಳಲ್ಲಿ ಪಾತ್ರಗಳು ಅದಕ್ಕಿಂತಲೂ ವಿಭಿನ್ನವಾಗಿರುತ್ತದೆ. ಹೊಸದೇನಾದರೂ ಬಯಸುವಂತಿರುತ್ತವೆ. ಅಂಥದ್ದೇ ಪಾತ್ರ ಈ ಚಿತ್ರದಲ್ಲೂ ಸಿಕ್ಕಿದೆ.
ಇದರಲ್ಲಿ ನನ್ನದು ಇಂಡಿಪೆಂಡೆಂಟ್ ಹುಡುಗಿಯ ಪಾತ್ರ, ಚಿತ್ರದಲ್ಲಿ ನನ್ನ ಪಾತ್ರ ಅನೇಕ ತಿರುವುಗಳಿಗೆ ಕಾರಣವಾಗುತ್ತದೆ. ಚಿತ್ರದಲ್ಲಿ ಬರುವ ಪ್ರತಿಯೊಂದು ಪಾತ್ರಗಳನ್ನೂ ವಿಭಿನ್ನವಾಗಿ ತೋರಿಸಬೇಕು ಎಂಬ ಉದ್ದೇಶದಿಂದ ಹೊಸತರನಾಗಿ ಪಾತ್ರಗಳನ್ನು ಹಣೆಯಲಾಗಿದೆ. ಪ್ರತಿ ಪಾತ್ರಗಳೂ ಆಡಿಯನ್ಸ್ಗೆ ಹೊಸದಾಗಿ ಕಾಣುತ್ತವೆ. ಪಾತ್ರದ ಬಗ್ಗೆ ಇನ್ನೂ ಹೆಚ್ಚೇನಾದರೂ ಹೇಳಿದ್ರೆ, ಅದರ ಗುಟ್ಟು ರಟ್ಟಾಗಬಹುದು.
ಹಾಗಾಗಿ ಸದ್ಯಕ್ಕೆ ಇದಕ್ಕಿಂತ ಹೆಚ್ಚಾಗಿ ಚಿತ್ರದ ಬಗ್ಗೆಯಾಗಲಿ, ನನ್ನ ಪಾತ್ರದ ಬಗ್ಗೆಯಾಗಲಿ ಗುಟ್ಟು ಬಿಟ್ಟು ಕೊಡಲಾರೆ’ ಎನ್ನುತ್ತಾರೆ ಪ್ರಣೀತಾ. ಚಿತ್ರದ ಬಗ್ಗೆ ಮಾತನಾಡುವ ಪ್ರಣೀತಾ, “ನನಗೆ ಅನಿಸುವಂತೆ ಈ ಚಿತ್ರದ ನಿರೂಪಣೆ ಬೇರೆಯ ಶೈಲಿಯಲ್ಲಿರುವುದರಿಂದ, ನನಗೆ ಸಿಕ್ಕಿರುವ ಪಾತ್ರ ನನ್ನ ವೃತ್ತಿ ಬದುಕಿಗೆ ಹೊಸ ಆಯಾಮವನ್ನು ತಂದುಕೊಡಲಿದೆ ಎಂಬ ನಿರೀಕ್ಷೆಯಲ್ಲಿದ್ದೇನೆ.
ಇಡೀ ಟೀಮ್ ಯಂಗ್ ಆ್ಯಂಡ್ ಎನರ್ಜಿಟಿಕ್ ಅಗಿರುವುದರಿಂದ, ಚಿತ್ರದಲ್ಲಿ ಕೂಡ ಅದೇ ಎನರ್ಜಿ ಇರಲಿದೆ ಎನ್ನುವುದು ನನ್ನ ಭಾವನೆ’ ಎನ್ನುತ್ತಾರೆ. ಕಳೆದ ವರ್ಷ ತೆರೆಕಂಡ “ಮಾಸ್ ಲೀಡರ್’ ಚಿತ್ರದ ಬಳಿಕ ಪ್ರಣೀತಾ ಯಾವುದೇ ಕನ್ನಡ ಚಿತ್ರಗಳಲ್ಲಿ ಕಾಣಿಸಿಕೊಂಡಿರಲಿಲ್ಲ. ಸುಮಾರು ಒಂದು ವರ್ಷದ ಬಳಿಕ ಮತ್ತೆ ಕಂ ಬ್ಯಾಕ್ ಆಗುತ್ತಿರುವ ಪ್ರಣೀತಾ,”ರಾಮನ ಅವತಾರ’ದಲ್ಲಿ ಎಷ್ಟರ ಮಟ್ಟಿಗೆ ಪ್ರೇಕ್ಷರಿಗೆ ಇಷ್ಟವಾಗಲಿದ್ದಾರೆ ಅನ್ನೋದು ಚಿತ್ರ ತೆರೆಗೆ ಬಂದ ಮೇಲಷ್ಟೇ ಗೊತ್ತಾಗಲಿದೆ.