ಕನ್ನಡತಿ ಧನ್ಯಾಗೆ ಸಿಕ್ಕ ಸುವರ್ಣಾವಕಾಶ!

Team Udayavani, Dec 18, 2019, 2:30 PM IST

ಆಪರೇಷನ್ ಅಲಮೇಲಮ್ಮ ಖ್ಯಾತಿಯ ರಿಷಿ ನಾಯಕನಾಗಿ ನಟಿಸಿರುವ ಚಿತ್ರ ಸಾರ್ವಜನಿಕರಿಗೆ ಸುವರ್ಣಾವಕಾಶ. ಅನೂಪ್ ರಾಮಸ್ವಾಮಿ ನಿರ್ದೇಶನ ಮಾಡಿರುವ ಈ ಚಿತ್ರ ಆರಂಭದಿಂದಲೇ ತನ್ನ ಶೀರ್ಷಿಕೆಯ ಮೂಲಕ ಗಮನ ಸೆಳೆದುಕೊಂಡಿತ್ತು. ಆ ನಂತರದಲ್ಲಿ ಹಾಡುಗಳು ಮತ್ತು ಟ್ರೇಲರ್‌ನೊಂದಿಗೆ ಈ ಚಿತ್ರ ಸಮಸ್ತ ಪ್ರೇಕ್ಷಕರನ್ನೂ ತನ್ನತ್ತ ಸೆಳೆದುಕೊಳ್ಳುವಲ್ಲಿ ಯಶ ಕಂಡಿದೆ. ಇದೇ ವಾರ ಬಿಡುಗಡೆಯಾಗುತ್ತಿರೋ ಈ ಸಿನಿಮಾ ಮೂಲಕ ಬಹುಭಾಷಾ ತಾರೆ ಧನ್ಯಾ ರಾಮಕೃಷ್ಣರಿಗೆ ತಮ್ಮ ತವರು ನೆಲಕ್ಕೆ ಮರಳುವ ಸುವರ್ಣಾವಕಾಶವೊಂದನ್ನು ಕಲ್ಪಿಸಿದೆ.

ದೇವರಾಜ್, ಪ್ರಶಾಂತ್ ರೆಡ್ಡಿ ಮತ್ತು ಜನಾರ್ದನ್ ಚಿಕ್ಕಣ್ಣ ನಿರ್ಮಾಣ ಮಾಡಿರುವ ಈ ಚಿತ್ರದಲ್ಲಿ ಧನ್ಯಾ ನಾಯಕಿಯಾಗಿ ವಿಶೇಷವಾದ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಈ ಮೂಲಕವೇ ಅವರು ಕನ್ನಡಕ್ಕೆ ಆಗಮಿಸುತ್ತಿದ್ದಾರೆ. ಧನ್ಯಾ ಈಗಾಗಲೇ ತಮಿಳು ಮತ್ತು ತೆಲುಗು ಚಿತ್ರರಂಗದಲ್ಲಿ ಹಲವಾರು ಚಿತ್ರಗಳಲ್ಲಿ ನಟಿಸಿ ಮುಖ್ಯ ನಾಯಕಿಯಾಗಿ ಗುರುತಿಸಿಕೊಂಡಿರುವವರು. ಈಗ ಬಹುಭಾಷಾ ತಾರೆಯಾಗಿರೋ ಧನ್ಯಾ ಕನ್ನಡದವರೇ ಎಂಬ ವಿಚಾರ ಅನೇಕರಿಗೆ ಗೊತ್ತಿರಲಿಕ್ಕಿಲ್ಲ. ಧನ್ಯಾ ಮೂಲತಃ ಬೆಂಗಳೂರಿನಲ್ಲಿಯೇ ಹುಟ್ಟಿ ಬೆಳೆದು ಅಲ್ಲಿಯೇ ವಿದ್ಯಾಭ್ಯಾಸ ಪೂರೈಸಿಕೊಂಡಿದ್ದ ಅಪ್ಪಟ ಕನ್ನಡದ ಹುಡುಗಿ. ಅವರೀಗ ಈ ಸಿನಿಮಾ ಮೂಲಕ ಕನ್ನಡಿಗರನ್ನು ಮುಖಾಮುಖಿಯಾಗುವ ಖುಷಿಯಿಂದಿದ್ದಾರೆ.

ಕನ್ನಡ ಚಿತ್ರರಂಗಕ್ಕೆ ಪರಭಾಷಾ ನಟಿಯರ ಆಗಮನವಾಗುವುದೇನು ಹೊಸಾ ವಿಚಾರವಲ್ಲ. ಆದರೆ ಕನ್ನಡದವರೇ ಆಗಿದ್ದುಕೊಂಡು ಪರಭಾಷಾ ಚಿತ್ರರಂಗದಲ್ಲಿ ಮಿಂಚುತ್ತಲೇ ಕನ್ನಡಕ್ಕೆ ಆಗಮಿಸೋ ನಟಿಯರು ಇಲ್ಲವೇ ಇಲ್ಲ ಎಂಬಷ್ಟು ವಿರಳ. ಆ ಸಾಲಿಗೆ ಧನ್ಯಾ ಬಾಲಕೃಷ್ಣ ಸೇರಿಕೊಳ್ಳುತ್ತಾರೆ. ಬೆಂಗಳೂರಿನಲ್ಲಿಯೇ ಹುಟ್ಟಿ ಬೆಳೆದು, ಅಲ್ಲಿಯೇ ವಿದ್ಯಾಭ್ಯಾಸ ಪೂರೈಸಿಕೊಂಡಿದ್ದ ಧನ್ಯಾಗೆ ಕನ್ನಡದಲ್ಲಿಯೇ ನಾಯಕಿಯಾಗಿ ಪ್ರಸಿದ್ಧಿ ಪಡೆಯ ಬೇಕೆಂಬ ಹಂಬಲವಿತ್ತಂತೆ. ಆದರೆ ಅವರ ಮುಂದೆ ಅಚ್ಚರಿದಾಯಕವಾಗಿ ತಮಿಳು ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸೋ ಅವಕಾಶ ಕೂಡಿ ಬಂದಿತ್ತು.

ಹಾಗೆ ತಾನಾಗಿಯೇ ಬಂದ ಅವಕಾಶಗಳನ್ನು ಅನುಸರಿಸಿಕೊಂಡು ಹೊರಟಿದ್ದ ಧನ್ಯಾಗೆ ಮತ್ತೆಂದೂ ತಿರುಗಿ ನೋಡಲು ಅವಕಾಶವೇ ಸಿಗದಷ್ಟು ಸಿನಿಮಾಗಳು ಅರಸಿ ಬರಲಾರಂಭಿಸಿದ್ದವು. ಆದರೆ ತೆಲುಗು ಮತ್ತು ತಮಿಳು ಚಿತ್ರಗಳಲ್ಲಿ ಬೇಡಿಕೆಯ ನಟಿಯಾಗಿ ಗುರುತಿಸಿಕೊಂಡ ಮೇಲೆಯೂ ಕನ್ನಡದತ್ತ ಸೆಳೆತ ಮಾತ್ರ ಅವರಲ್ಲಿ ಕಡಿಮೆಯಾಗಿರಲಿಲ್ಲ. ತನ್ನ ಮಾತೃಭಾಷೆಯ ಸಿನಿಮಾಗಳಲ್ಲಿ ನಟಿಸಲು ಸಾಧ್ಯವಾಗಲಿಲ್ಲ ಎಂಬ ಕೊರಗು ಅವರಲ್ಲಿ ಇದ್ದೇ ಇತ್ತು. ಅದನ್ನು ಪರಿಹರಿಸುವಂತೆ ಅವರಿಗೆ ಸಾರ್ವಜನಿಕರಿಗೆ ಸುವರ್ಣಾವಕಾಶ ಸಿನಿಮಾ ನಾಯಕಿಯಾಗೋ ಅವಕಾಶ ಸಿಕ್ಕಿದೆ. ಅವರಿಲ್ಲಿ ಮಧ್ಯಮವರ್ಗದ ಹುಡುಗಿಯಾಗಿ ಚೆಂದದ ಪಾತ್ರದಲ್ಲಿ ನಟಿಸಿದ್ದಾರೆ. ಅದು ಈ ವಾರವೇ ನಿಮ್ಮೆಲ್ಲರ ಮುಂದೆ ಅನಾವರಣಗೊಳ್ಳಲಿದೆ.