“ಫ್ಯಾಂಟಮ್‌’ಗಾಗಿ ಗನ್‌ ಹಿಡಿದ ಸುದೀಪ್‌

ಕಿಚ್ಚನ ಚಿತ್ರಕ್ಕೆ ಚಾಲನೆ

Team Udayavani, Mar 3, 2020, 7:04 AM IST

ಸುದೀಪ್‌ ಅಭಿನಯದ “ಫ್ಯಾಂಟಮ್‌’ ಚಿತ್ರಕ್ಕೆ ಸೋಮವಾರ ಅಧಿಕೃತವಾಗಿ ಚಾಲನೆ ಸಿಕ್ಕಿದೆ. ಇಷ್ಟು ದಿನಗಳ ಕಾಲ ಸುದೀಪ್‌ ಅವರ “ಫ್ಯಾಂಟಮ್‌’ ಯಾವಾಗ ಶುರುವಾಗುತ್ತೆ ಎಂಬ ಪ್ರಶ್ನೆ ಓಡಾಡುತ್ತಿತ್ತು. ಚಿತ್ರತಂಡ, ದೇವನಹಳ್ಳಿ ಸಮೀಪದ ಸ್ಟುಡಿಯೋ 9ರಲ್ಲಿ ಚಿತ್ರೀಕರಣಕ್ಕೆ ಚಾಲನೆ ಕೊಟ್ಟಿದೆ. ಸುದೀಪ್‌ ಹಾಗೂ ಇತರೆ ಕಲಾವಿದರ ಕಾಂಬಿನೇಷನ್‌ ದೃಶ್ಯಗಳನ್ನು ನಿರ್ದೇಶಕ ಅನೂಪ್‌ ಭಂಡಾರಿ ಸೆರೆಹಿಡಿದಿದ್ದಾರೆ.

ಶಾಲಿಟಿ ಆರ್ಟ್ಸ್ ಬ್ಯಾನರ್‌ನಲ್ಲಿ ಶಾಲಿನಿ ಮಂಜುನಾಥ್‌ ಗೌಡ ಹಾಗು “ಜಾಕ್‌’ ಮಂಜು ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ತಮ್ಮ ನಿರ್ಮಾಣದ ಸಿನಿಮಾ ಕುರಿತು “ಉದಯವಾಣಿ’ಗೆ ಮಾಹಿತಿ ನೀಡಿದ ನಿರ್ಮಾಪಕ “ಜಾಕ್‌’ ಮಂಜು, “ಬಹು ನಿರೀಕ್ಷೆಯ “ಫ್ಯಾಂಟಮ್‌’ ಚಿತ್ರಕ್ಕೆ ಸೋಮವಾರ ಚಾಲನೆ ಸಿಕ್ಕಿದೆ. ಸದ್ಯ ಬೆಂಗಳೂರಲ್ಲಿ ಸುಮಾರು 25 ದಿನಗಳ ಕಾಲ ಚಿತ್ರೀಕರಣ ನಡೆಯಲಿದೆ. ಆ ಬಳಿಕ ಹೈದರಾಬಾದ್‌ನಲ್ಲಿ 70 ದಿನಗಳ ಕಾಲ ಚಿತ್ರೀಕರಣ ನಡೆಸಿ, ಕೇರಳದ ವಿಶೇಷ ತಾಣಗಳಲ್ಲಿ ಸುಮಾರು 30 ದಿನಗಳ ಕಾಲ ಚಿತ್ರೀಕರಿಸುವ ಯೋಜನೆ ಹಾಕಿಕೊಳ್ಳಲಾಗಿದೆ.

ಈಗಾಗಲೇ ಹೈದರಾಬಾದ್‌ನಲ್ಲಿ ಫಾರೆಸ್ಟ್‌ ಸೆಟ್‌ ಹಾಕಲಾಗುತ್ತಿದೆ. ಕಳೆದ ಒಂದು ತಿಂಗಳಿನಿಂದಲೂ ಸೆಟ್‌ ಕೆಲಸ ಜೋರಾಗಿ ನಡೆಯುತ್ತಿದೆ. ಈಗ ಬೆಂಗಳೂರಲ್ಲಿ ಕೆಲ ದೃಶ್ಯಗಳನ್ನು ಚಿತ್ರೀಕರಿಸಿದ ನಂತರ, ಚಿತ್ರತಂಡ ಹೈದರಾಬಾದ್‌ಗೆ ಶಿಫ್ಟ್ ಆಗಲಿದೆ’ ಎಂದು ವಿವರ ಕೊಡುತ್ತಾರೆ. ಸುದೀಪ್‌ ಮತ್ತು ಅನೂಪ್‌ ಭಂಡಾರಿ ಕಾಂಬಿನೇಷನ್‌ ಚಿತ್ರದ ಶುರುವಿಗೆ ಸುದೀಪ್‌ ಅಭಿಮಾನಿಗಳು ಕಾಯುತ್ತಿದ್ದರು. ಆ ಕುತೂಹಲಕ್ಕೆ ಸೋಮವಾರ ತೆರೆ ಬಿದ್ದಿದೆ.

ಇನ್ನು, “ಫ್ಯಾಂಟಮ್‌’ ಚಿತ್ರದ ಫ‌ಸ್ಟ್‌ಲುಕ್‌ವೊಂದನ್ನು ನಿರ್ದೇಶಕರು ಬಿಡುಗಡೆ ಮಾಡಿದ್ದು, ಆ ಫೋಟೋ ಸಾಕಷ್ಟು ವೈರಲ್‌ ಆಗಿದೆ. ಪೋಸ್ಟರ್‌ನಲ್ಲಿ ಸುದೀಪ್‌ ಗನ್‌ ಹಿಡಿದು, ರಗಡ್‌ ಲುಕ್‌ನಲ್ಲಿ ಪೋಸ್‌ ಕೊಟ್ಟಿದ್ದಾರೆ. ಅವರ ಹೇರ್‌ಸ್ಟೈಲ್‌ ಕೂಡ ವಿಭಿನ್ನವಾಗಿದೆ. ಚಿತ್ರದ ಸಣ್ಣದ್ದೊಂದು ಟೀಸರ್‌ ಕೂಡ ಚಿತ್ರೀಕರಿಸಿದ್ದು, ಅದನ್ನು ಯಾವಾಗ ಬಿಡುಗಡೆ ಮಾಡುತ್ತಾರೆಂಬ ಕುತೂಹಲ ಸದ್ಯಕ್ಕಿದೆ.

ಮುಂದಿನ ದಿನಗಳಲ್ಲಿ ಚಿತ್ರದ ಫೋಟೋ ಶೂಟ್‌ ವಿಶೇಷವಾಗಿ ಮಾಡಿಸುವ ಪ್ಲ್ರಾನ್‌ ಮಾಡಿರುವ ಚಿತ್ರತಂಡ, ಪ್ರೋಮೋ ಕೂಡ ಹೊಸದಾಗಿರಬೇಕೆಂಬ ಕಾರಣಕ್ಕೆ ಸಾಕಷ್ಟು ತಯಾರಿ ನಡೆಸಿದೆಯಂತೆ. ಇದೊಂದು ಪ್ಯಾನ್‌ ಇಂಡಿಯಾ ಸಿನಿಮಾ ಆಗಿದ್ದು, ಎಲ್ಲವನ್ನೂ ಸ್ಪೆಷಲ್‌ ಆಗಿಯೇ ತೋರಿಸುವ ಉದ್ದೇಶ ಚಿತ್ರತಂಡದ್ದು. ಸದ್ಯಕ್ಕೆ ಸುದೀಪ್‌ಗೆ ನಾಯಕಿ ಯಾರೆಂಬುದು ಪಕ್ಕಾ ಆಗಿಲ್ಲ. ಈ ಹಿಂದೆ ಸಮಂತಾ ಅಕ್ಕಿನೇನಿ ಅವರು ನಾಯಕಿ ಆಗುತ್ತಾರೆ ಎಂದು ಹೇಳಲಾಗಿತ್ತು.

ಆದರೆ, “ಫ್ಯಾಂಟಮ್‌’ ಶುರುವಿಗೆ ತಡವಾಗಿದ್ದರಿಂದ ಅತ್ತ ಸಮಂತಾ ಅವರು ಬೇರೆ ಕೆಲಸಗಳಲ್ಲಿ ಬಿಝಿ ಆಗಿರುವ ಹಿನ್ನೆಲೆಯಲ್ಲಿ ಬೇರೆ ನಾಯಕಿಯ ಆಯ್ಕೆಯತ್ತ ಚಿತ್ರತಂಡ ಗಮನಹರಿಸಿದೆ. ಅದೇನೆ ಇರಲಿ, ಸುದೀಪ್‌ ಅಭಿನಯದ “ಕೋಟಿಗೊಬ್ಬ 3′ ಬಿಡುಗಡೆಗೆ ಸಜ್ಜಾಗಿದೆ. ಅದರ ಬೆನ್ನಲ್ಲೇ ಅವರೀಗ “ಫ್ಯಾಂಟಮ್‌’ ನಲ್ಲಿ ತೊಡಗಿದ್ದಾರೆ. ಈ ವರ್ಷವೇ “ಫ್ಯಾಂಟಮ್‌’ ಅಭಿಮಾನಿಗಳಿಗೆ ದರ್ಶನ ಕೊಟ್ಟರೂ ಅಡ್ಡಿಯಿಲ್ಲ.