ಶರಾಣುರ್ಜುನ ವಿಜಯ

Team Udayavani, Nov 5, 2019, 6:04 AM IST

ಚಿತ್ರರಂಗದಲ್ಲಿ ಸಾಕಷ್ಟು ಹಿಟ್‌ ಜೋಡಿಗಳು ಸಿಗುತ್ತವೆ. ಅದು ನಾಯಕ-ನಾಯಕಿ ಇರಬಹುದು, ನಿರ್ಮಾಪಕ, ನಿರ್ದೇಶಕ ಇರಬಹುದು ಅಥವಾ ನಾಯಕ-ನಿರ್ದೇಶಕರಾಗಿರಬಹುದು. ಸದ್ಯ ಈ ತರಹದ ಹಿಟ್‌ ಕಾಂಬಿನೇಶನ್‌ ಮೂಲಕ ಗಮನ ಸೆಳೆಯುತ್ತಿರುವ ಜೋಡಿ ಎಂದರೆ ಶರಣ್‌ ಹಾಗೂ ಅರ್ಜುನ್‌ ಜನ್ಯಾ. ನಾಯಕ ಹಾಗೂ ಸಂಗೀತ ನಿರ್ದೇಶಕರಾಗಿ ಈ ಜೋಡಿ ಕನ್ನಡ ಚಿತ್ರರಂಗದ ಹಿಟ್‌ ಕಾಂಬಿನೇಶನ್‌ ಲಿಸ್ಟ್‌ಗೆ ಸೇರಿದೆ.

ಹೌದು, ಶರಣ್‌ ಹಾಗೂ ಅರ್ಜುನ್‌ ಜನ್ಯಾ ಕಾಂಬಿನೇಶನ್‌ನಲ್ಲಿ ಬಂದ ಚಿತ್ರಗಳ ಹಾಡುಗಳು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿವೆ. “ರ್‍ಯಾಂಬೋ’, “ವಿಕ್ಟರಿ’,”ಅಧ್ಯಕ್ಷ’, “ಬುಲೆಟ್‌ ಬಸ್ಯಾ’, “ಜೈ ಮಾರುತಿ 800′, “ವಿಕ್ಟರಿ -2′, “ರ್‍ಯಾಂಬೋ- 2′ ಹೀಗೆ ಶರಣ್‌ ಅವರ ಬಹುತೇಕ ಸಿನಿಮಾಗಳಿಗೆ ಅರ್ಜುನ್‌ ಜನ್ಯಾ ಸಂಗೀತ ಸಂಯೋಜಿಸಿದ್ದಾರೆ. ಆ ಚಿತ್ರಗಳ ಹಾಡುಗಳು ಹಿಟ್‌ ಆಗುವ ಮೂಲಕ ಇವರಿಬ್ಬರು ಯಶಸ್ವಿ ಜೋಡಿ ಎನಿಸಿಕೊಂಡಿದ್ದರು. ಈಗ “ಅವತಾರ್‌ ಪುರುಷ’ ಚಿತ್ರದಲ್ಲೂ ಶರಣ್‌ ಹಾಗೂ ಅರ್ಜುನ್‌ ಜನ್ಯಾ ಕಾಂಬಿನೇಶನ್‌ ಮುಂದುವರೆಯುತ್ತಿದೆ.

ಪುಷ್ಕರ್‌ ನಿರ್ಮಾಣದ “ಅವತಾರ್‌ ಪುರುಷ’ ಸಿನಿಮಾವನ್ನು ಸುನಿ ನಿರ್ದೇಶಿಸುತ್ತಿದ್ದಾರೆ. ಆರಂಭದಲ್ಲಿ ಈ ಚಿತ್ರಕ್ಕೆ ಚರಣ್‌ ರಾಜ್‌ ಸಂಗೀತ ಎನ್ನಲಾಗಿತ್ತು. ಆದರೆ, ಈಗ ಅರ್ಜುನ್‌ ಜನ್ಯಾ ಸಂಗೀತ ಸಂಯೋಜಿಸುತ್ತಿದ್ದಾರೆ. ಅದಕ್ಕೆ ಕಾರಣ, ಹಿಟ್‌ ಕಾಂಬಿನೇಶನ್‌. ಯಶಸ್ವಿಯಾಗಿ ಸಾಗುತ್ತಿರುವ ಜೋಡಿಯನ್ನು ಬ್ರೇಕ್‌ ಮಾಡಬಾರದೆಂಬ ಕಾರಣಕ್ಕೆ ಪುಷ್ಕರ ಹಾಗೂ ತಂಡ ಅರ್ಜುನ್‌ ಜನ್ಯಾ ಅವರೊಂದಿಗೆ ಕೆಲಸ ಮಾಡಲು ಮುಂದಾಗಿದೆ. ಈ ಮೂಲಕ ಮತ್ತೊಂದು ಹಿಟ್‌ ಆಲ್ಬಂ ಹೊರಬರುವ ನಿರೀಕ್ಷೆ ಚಿತ್ರತಂಡಕ್ಕಿದೆ.