ಹಣ್ಣಾಗಿಲ್ಲ ತೋತಾಪುರಿ! : 45 ದಿನಗಳ ಚಿತ್ರೀಕರಣ ಬಾಕಿ

Team Udayavani, Dec 6, 2020, 1:09 PM IST

ತೋತಾಪುರಿ ಸಿನಿಮಾ ಎಲ್ಲಿಗೆ ಬಂತು? – ಸಿನಿಮಾ ಪ್ರೇಮಿಗಳಲ್ಲಿ ಹೀಗೊಂದು ಪ್ರಶ್ನೆ ಹುಟ್ಟಿಕೊಂಡಿದೆ. ಅದಕ್ಕೆಕಾರಣ ಆ ಸಿನಿಮಾದ ಮೇಲಿದ್ದ ನಿರೀಕ್ಷೆ. “ನೀರ್‌ ದೋಸೆ’ಯಂತಹ ಹಿಟ್‌ ಚಿತ್ರಕೊಟ್ಟ ನಟ ಜಗ್ಗೇಶ್‌ ಹಾಗೂ ನಿರ್ದೇಶಕ ವಿಜಯ ಪ್ರಸಾದ್‌ ಮತ್ತೆ ಒಂದಾದ ಸಿನಿಮಾ “ತೋತಾಪುರಿ’. “ಶಿವಲಿಂಗ’ದಂತಹ ಹಿಟ್‌ ಸಿನಿಮಾ ನಿರ್ಮಿಸಿರುವ ಕೆ.ಎ.ಸುರೇಶ್‌ ಈ ಸಿನಿಮಾದ ನಿರ್ಮಾಪಕರು. ಸಿನಿಮಾ ಆರಂಭವಾಗಿ ಎರಡು ವರ್ಷ ಕಳೆದರೂ ಸಿನಿಮಾ ಇನ್ನೂ ಪೂರ್ತಿಯಾಗಿಲ್ಲ.

ಆರಂಭದಲ್ಲಿ ಒಂದು ಭಾಗವಾಗಿ ಚಿತ್ರೀಕರಣಕ್ಕೆ ಮುಂದಾಗಿದ್ದ ತಂಡ ಈಗ ಎರಡು ಭಾಗಗಳಲ್ಲಿ ಚಿತ್ರ ತರಲು ಮುಂದಾಗಿದೆ. ಆದರೆ, ಸದ್ಯ ಚಿತ್ರೀಕರಣ ನಿಂತಿದೆ. ನಿರ್ದೇಶಕ ವಿಜಯ ಪ್ರಸಾದ್‌ “ಪೆಟ್ರೋಮ್ಯಾಕ್ಸ್‌’ನಲ್ಲಿ ಬಿಝಿಯಾಗಿದ್ದಾರೆ. ಕೇವಲ 15 ದಿನದಲ್ಲೇ ಮೊದಲ ಹಂತವನ್ನು ಮುಗಿಸಿ, ಈಗ ಎರಡನೇ ಹಂತದ ಚಿತ್ರೀಕರಣಕ್ಕೆ ಅಣಿಯಾಗಿದ್ದಾರೆ.

ಇದನ್ನೂ ಓದಿ : ಪ್ರಜ್ವಲ್‌ ಅಬ್ಬರಕ್ಕೆ ಶಿವಣ್ಣ ಸಾಥ್‌

“ತೋತಾಪುರಿ’ ಚಿತ್ರದಕುರಿತು ಇತ್ತೀಚೆಗೆ ಮಾಧ್ಯಮದವರು ಜಗ್ಗೇಶ್‌ ಅವರನ್ನುಕೇಳಿದಾಗ ಅವರು ನೇರವಾಗಿ ಉತ್ತರಿಸಿದ್ದಾರೆ. “ಆ ಚಿತ್ರಯಾವಾಗ ಮುಗಿಯುತ್ತದೋ ಗೊತ್ತಿಲ್ಲ.ಕಲಾವಿದನಾಗಿ ನನ್ನಕೆಲಸ ಮಾಡಿ ಮುಗಿಸೋದು ನನ್ನ ಜವಾಬ್ದಾರಿ.ಅದನ್ನು ಮಾಡಿದ್ದೇನೆ. ಇದುವರೆಗೆ140 ದಿನಗಳ ಚಿತ್ರೀಕರಣವಾಗಿದೆ.16ಕೋಟಿ ಖರ್ಚಾಗಿದೆ. ಇನ್ನೂ45 ದಿನಗಳ ಚಿತ್ರೀಕರಣ ಬಾಕಿ ಇದೆ. ಆದರೆ, ನಿರ್ದೇಶಕರು ಅಷ್ಟರಲ್ಲಿ ಇನ್ನೊಂದು ಸಿನಿಮಾದ ಚಿತ್ರೀಕರಣ ಶುರು ಮಾಡಿ, ಮೊದಲ ಹಂತವನ್ನು15 ದಿನದಲ್ಲೇ ಮುಗಿಸಿದ್ದಾರೆ. ಮತ್ತೆ ಯಾವಾಗ ಈ ಸಿನಿಮಾ ಶುರುವಾಗುತ್ತದೋ ಗೊತ್ತಿಲ್ಲ. ಮೊದಲ ಭಾಗ ಸಂಪೂರ್ಣ ಮುಗಿದಿದೆ. ಅದನ್ನಾದರೂ ಬಿಡುಗಡೆ ಮಾಡಿ ಎಂದೆ’ ಎನ್ನುವುದು ಜಗ್ಗೇಶ್‌ ಮಾತು.

ಇತ್ತೀಚೆಗೆ ಡಬ್ಬಿಂಗ್‌ ಮಾಡಿರುವ ಜಗ್ಗೇಶ್‌ಗೆ ಸಿನಿಮಾ ಮೂಡಿಬಂದಿರುವ ರೀತಿ ಬಗ್ಗೆ ಖುಷಿ ಇದೆ. “ಸಿನಿಮಾ ಅದ್ಭುತವಾಗಿ ಮೂಡಿಬಂದಿದೆ. ಆದರೆ, ಬುಟ್ಟಿಯಲ್ಲಿ ಹಾವು ಇಟ್ಟುಕೊಂಡು, ಅಷ್ಟುದ್ದ ಇದೆ, ಇಷ್ಟುದ್ದ ಇದೆ ಎಂದರೆ ಹೇಗೆ. ಹೊರಗೆ ಬಿಟ್ಟ ಮೇಲಷ್ಟೇ ಗೊತ್ತಾಗೋದು’ ಎಂದು ನೇರವಾಗಿ ಹೇಳುತ್ತಾರೆ.