ಬಾಲಿವುಡ್‌ನ‌ತ್ತ ಸೋನಾಲ್‌ ಮಾಂತೆರೋ

Team Udayavani, Jun 1, 2019, 3:11 AM IST

ಕನ್ನಡದ ಅನೇಕ ನಟಿಯರು, ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಬಳಿಕ ಮೆಲ್ಲನೆ ಪರಭಾಷೆಯತ್ತ ಮುಖ ಮಾಡುವುದು ಗೊತ್ತೇ ಇದೆ. ಆ ಸಾಲಿಗೆ ಈಗ ನಟಿ ಸೋನಾಲ್‌ ಮಾಂತೆರೋ ಕೂಡ ಸೇರಿದ್ದಾರೆ. ಹೌದು, ಯೋಗರಾಜ್‌ಭಟ್‌ ನಿರ್ದೇಶನದ “ಪಂಚತಂತ್ರ’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಸೋನಾಲ್‌ ಮಾಂತೆರೋ, ತುಳು ಚಿತ್ರವೊಂದರಲ್ಲೂ ನಟಿಸಿದ್ದರು.

ಬಳಿಕ “ಗಾಳಿಪಟ-2′ ಚಿತ್ರದಲ್ಲೂ ಅವಕಾಶ ಗಿಟ್ಟಿಸಿಕೊಂಡರು. ಇತ್ತೀಚೆಗಷ್ಟೇ ಉಪೇಂದ್ರ ಅಭಿನಯದ “ಬುದ್ಧಿವಂತ-2′ ಚಿತ್ರಕ್ಕೂ ಸೋನಾಲ್‌ ನಾಯಕಿಯಾಗಿ ಆಯ್ಕೆಯಾದರು. ಈಗ ಹೊಸ ಸುದ್ದಿಯೆಂದರೆ, ಬಾಲಿವುಡ್‌ ಕಡೆ ಮುಖ ಮಾಡಿದ್ದಾರೆ. ಇದೇ ಮೊದಲ ಸಲ ಹಿಂದಿ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿರುವ ಸೋನಾಲ್‌, ಟಾಲಿವುಡ್‌ಗೂ ಕಾಲಿಡಲಿದ್ದಾರೆ ಎಂಬುದು ವಿಶೇಷ.

ಅಂದಹಾಗೆ, ಸೋನಾಲ್‌ ಮಾಂತೆರೋ ಬಾಲಿವುಡ್‌ಗೆ ಎಂಟ್ರಿಕೊಟ್ಟಿರುವುದು “ಸಾಜನ್‌ ಚಲೆ ಸಸುರಾಲ್‌-2′ ಚಿತ್ರಕ್ಕೆ. ಹೌದು, 1996 ರಲ್ಲಿ ಬಿಡುಗಡೆಯಾಗಿದ್ದ “ಸಾಜನ್‌ ಚಲೆ ಸಸುರಾಲ್‌’ ಚಿತ್ರದಲ್ಲಿ ಗೋವಿಂದ ನಾಯಕರಾಗಿದ್ದರು. ಅವರಿಗೆ ಟಬು ಹಾಗು ಕರಿಷ್ಮಾ ನಾಯಕಿಯರಾಗಿ ನಟಿಸಿದ್ದರು. ಈಗ “ಸಾಜನ್‌ ಚಲೆ ಸಸುರಾಲ್‌-2′ ಚಿತ್ರ ಶುರುವಾಗಲಿದೆ. ಈ ಚಿತ್ರದಲ್ಲಿ ಸೋನಾಲ್‌ ಮಾಂತೆರೋ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿದೆ.

ಅದೇನೆ ಇರಲಿ, ಕನ್ನಡದಲ್ಲಿ ನಟಿಸುವ ಮೂಲಕ ಇತರೆ ಭಾಷೆಗಳಲ್ಲೂ ಗುರುತಿಸಿಕೊಳ್ಳುತ್ತಿರುವ ನಾಯಕಿಯರ ಸಾಲಿಗೆ ಸೋನಾಲ್‌ ಮಾಂತೆರೋ ಅವರೂ ಸೇರಿದ್ದಾರೆ. ಬಾಲಿವುಡ್‌ನ‌ “ಸಾಜನ್‌ ಚಲೆ ಸಸುರಾಲ್‌-2′ ಚಿತ್ರದಲ್ಲಿ ಸೋನಾಲ್‌ ಪಾತ್ರ ಹೇಗಿರುತ್ತೆ, ಯಾವಾಗ ಶುರುವಾಗುತ್ತೆ. ಅವರೊಂದಿಗೆ ಇನ್ನು ಯಾರೆಲ್ಲಾ ಇರುತ್ತಾರೆ ಎಂಬುದು ಇಷ್ಟರಲ್ಲೇ ಗೊತ್ತಾಗಲಿದೆ.