ಗಾಳಿಪಟ ಹಾರಿಸಲು ಯೂರೋಪ್ ನತ್ತ ಹಾರಿದ ಯೋಗರಾಜ್ ಭಟ್..!

Team Udayavani, Feb 17, 2021, 9:05 PM IST

ಬೆಂಗಳೂರು : ನಿರ್ದೇಶಕ ಯೋಗರಾಜ್ ಭಟ್ ಬೆಳ್ಳಿ ಪರದೆ ಮೇಲೆ ಮತ್ತೊಮ್ಮೆ ಗಾಳಿಪಟ ಹಾರಿಸಲು ಸಿದ್ಧತೆ ನಡೆಸಿರುವುದು ಸಿನಿಪ್ರೇಮಿಗಳಿಗೆ ಗೊತ್ತಿರುವ ವಿಚಾರ. ಸದ್ಯ ‘ಗಾಳಿಪಟ 2’ ಸಿನೆಮಾ ಶೂಟಿಂಗ್ ಎಲ್ಲಿಗೆ ಬಂತು ಎನ್ನುವ ಅಭಿಮಾನಿಗಳ ಪ್ರಶ್ನೆಗೆ ಉತ್ತರ ನೀಡಿದ್ದಾರೆ ಭಟ್ಟರು.

ಹೌದು, ಹಾಗೆ ನೋಡಿದ್ರೆ ಈಗಾಗಲೇ ಗಾಳಿಪಟ 2 ಚಿತ್ರದ ಶೂಟಿಂಗ್ ಮುಗಿಯಬೇಕಿತ್ತು. ಆದರೆ, ಕೋವಿಡ್ ಕರಿನೆರಳು ಈ ಚಿತ್ರದ ಮೇಲೂ ವಕ್ಕರಿಸಿತು. ಲಾಕ್ ಡೌನ್ ಹಿನ್ನೆಲೆ ಚಿತ್ರದ ಎಲ್ಲ ಚಟುವಟಿಕೆಗಳಿಗೆ ತಾತ್ಕಾಲಿಕ ವಿದಾಯ ಹೇಳಲಾಗಿತ್ತು. ಅದರಲ್ಲೂ ಈ ಚಿತ್ರದ ಶೂಟಿಂಗ್ ಹೊರದೇಶಗಳಲ್ಲಿ ನಡೆಯಬೇಕಿತ್ತು. ಆದರೆ, ಕೋವಿಡ್ ಹಿನ್ನೆಲೆ ಅದು ಸಾಧ್ಯವಾಗಿರಲಿಲ್ಲ. ಈಗ ಮತ್ತೆ ಹೊಸ ಹುರುಪಿನೊಂದಿಗೆ ಚಿತ್ರೀಕರಣಕ್ಕೆ ಅಣಿಯಾಗಿದ್ದಾರೆ ಭಟ್ಟರು ಆ್ಯಂಡ್ ಟೀಂ.

ಇಂದು (ಫೆ.17) ಗಾಳಿಪಟ 2 ಸಿನೆಮಾ ಕುರಿತು ಹೊಸ ಅಪ್ಡೇಟ್ ನೀಡಿದ್ದಾರೆ ಯೋಗರಾಜ್ ಭಟ್. ಚಿತ್ರೀಕರಣಕ್ಕೆ ಯೂರೋಪ್ ಖಂಡಕ್ಕೆ ತೆರಳುತ್ತಿರುವ ಫೋಟೊ ತಮ್ಮ ಫೇಸ್ ಬುಕ್ ನಲ್ಲಿ ಹಂಚಿಕೊಂಡಿದ್ದಾರೆ.

ಈ ಹಿಂದೆ ತೆರೆಕಂಡು ದಾಖಲೆ ಬರೆದ ‘ಗಾಳಿಪಟ’ ಚಿತ್ರದ ಬಹುತೇಕ ಚಿತ್ರೀಕರಣ ಮಲೆನಾಡಿನಲ್ಲಿ ನಡೆದಿತ್ತು. ಈಗ ಗಾಳಿಪಟ 2 ಚಿತ್ರದ ಶೂಟಿಂಗ್ ಕೂಡ ಕುದುರೆಮುಖದಲ್ಲಿ ನಡೆಸಲಾಗಿದೆ. ಇದರ ಜತೆಗೆ ವಿದೇಶದಲ್ಲಿಯೂ ನಡೆಯಲಿದೆ. ಯರೂಪೀನ ಜಾರ್ಜಿಯಾದಲ್ಲಿ ಚಿತ್ರೀಕರಣ ನಡೆಸಲಿದೆ ಚಿತ್ರತಂಡ.

ಇನ್ನು ಗಾಳಿಪಟ 2 ಚಿತ್ರದಲ್ಲಿ ಮಳೆ ಹುಡುಗ ಗೋಲ್ಡನ್ ಸ್ಟಾರ್ ಗಣೇಶ್, ಲೂಸಿಯಾ ಪವನ್ ಕುಮಾರ್, ಧೂದ್ ಪೇಡಾ ದಿಗಂತ್ ನಟಿಸಲಿದ್ದಾರೆ. ಇವರ ಜತೆಗೆ ಶರ್ಮಿಳಾ ಮಾಂಡ್ರೆ, ಸಂಯುಕ್ತ ಮೆನನ್ ನಿಶ್ವಿಕಾ ನಾಯ್ಡು ಹಾಗೂ ವೈಭವಿ ಶ್ಯಾಂಡಿಲ್ಯಾ ಮುಖ್ಯಭೂಮಿಕೆಯಲ್ಲಿರಲಿದ್ದಾರೆ. ರಮೇಶ್ ರೆಡ್ಡಿ ನಂಗ್ಲಿ ಈ ಚಿತ್ರದ ನಿರ್ಮಾಪಕರು.