ಎಚ್ಚರ…ಎಚ್ಚರ…ಕೇವಲ 2 ದಿನದಲ್ಲಿ ಭಾರತದಲ್ಲಿ 25 ಸಾವಿರ ಕೋವಿಡ್ ಕೇಸ್ ಪತ್ತೆ: ಅಂಕಿ-ಅಂಶ

Team Udayavani, Jun 5, 2020, 2:06 PM IST

ನವದೆಹಲಿ:ಕೋವಿಡ್ 19 ವೈರಸ್ ಗೆ ಸಂಬಂಧಿಸಿದ ಅಂಕಿಅಂಶವನ್ನು ಕೇಂದ್ರ ಸರ್ಕಾರ ಕಲೆಹಾಕಲು ಆರಂಭಿಸಿದ್ದ 48 ದಿನಗಳಲ್ಲಿ ಭಾರತದಲ್ಲಿ ಮೊದಲ ಬಾರಿಗೆ ಕೋವಿಡ್ ನಿಂದ ಒಂದು ಸಾವಿರ ಮಂದಿ ಸಾವನ್ನಪ್ಪಿದ್ದರು. ಇದೀಗ ಪ್ರತಿ ನಾಲ್ಕು ದಿನಗಳಿಗೊಮ್ಮೆ ಈ ಅಂಕಿಅಂಶ ಲಭ್ಯವಾಗುತ್ತಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯದ ಅಂಕಿಅಂಶ ವಿವರಿಸಿದೆ.

ವಾರಗಳಿಂದ ಕೋವಿಡ್ 19 ವೈರಸ್ ದೇಶದಲ್ಲಿ ಕ್ಷಿಪ್ರವಾಗಿ ಹರಡತೊಡಗಿದೆ. ನಾಟಕೀಯ ಎಂಬಂತೆ ಕೇವಲ ಎರಡು ದಿನಗಳಲ್ಲಿ 25ಸಾವಿರ ಕೋವಿಡ್ 19 ಪ್ರಕರಣಗಳು ಪತ್ತೆಯಾಗಿದೆ. 87 ದಿನಗಳಲ್ಲಿ ಭಾರತದಲ್ಲಿ 25ಸಾವಿರ ಕೋವಿಡ್ 19 ಪ್ರಕರಣ(ಏಪ್ರಿಲ್ 26) ವರದಿಯಾಗಿತ್ತು. ಆದರೆ ಈ ಅಂಕಿ ಅಂಶ ಇದೀಗ ಎರಡು ದಿನಗಳಿಗೊಮ್ಮೆ ಲಭ್ಯವಾಗತೊಡಗಿದೆ ಎಂದು ತಿಳಿಸಿದೆ. ಒಟ್ಟು ಆರು ವಾರಗಳಲ್ಲಿ ಈ ಸಂಖ್ಯೆ 2,26,770ಕ್ಕೆ ತಲುಪಿದೆ ಎಂದು ಹೇಳಿದೆ.

ಮಾರ್ಚ್ 12ರಂದು ದೇಶದಲ್ಲಿ ಕೋವಿಡ್ 19 ವೈರಸ್ ನಿಂದ ಸಾವನ್ನಪ್ಪಿರುವ ಮೊದಲ ಪ್ರಕರಣ ವರದಿಯಾಗಿತ್ತು. ಈ ಸಾವಿನ ಸಂಖ್ಯೆ ಒಂದು ಸಾವಿರ ದಾಟಿದ್ದು ಏಪ್ರಿಲ್ 29ರಂದು. ನಂತರ ಈ ಸಂಖ್ಯೆ ವೇಗವಾಗಿ ಹೆಚ್ಚಳವಾಗತೊಡಗಿತ್ತು. ಕೆಲವೇ ವಾರಗಳಲ್ಲಿ ಸಾವಿನ ಸಂಖ್ಯೆ 6,075ಕ್ಕೆ ಏರಿಕೆಯಾಗಿದೆ. ಕಳೆದ ನಾಲ್ಕು ದಿನಗಳಲ್ಲಿ ಒಂದು ಸಾವಿರ ಮಂದಿ ಕೋವಿಡ್ ನಿಂದ ಸಾವನ್ನಪ್ಪಿದ್ದಾರೆ.