ಮೇಘಾಲಯ: Covid-19 ಸೋಂಕಿಗೆ ವೈದ್ಯ ಸಾವು, 2000ಕ್ಕೂ ಅಧಿಕ ಜನರಿಗೆ ಸೋಂಕು ಹರಡಿರುವ ಶಂಕೆ?

Team Udayavani, Apr 15, 2020, 3:54 PM IST

ನವದೆಹಲಿ:ಕೋವಿಡ್ 19 ವೈರಸ್ ಗೆ ಮೇಘಾಲಯ ಬೆಥನಿ ಆಸ್ಪತ್ರೆಯ ನಿರ್ದೇಶಕ, ವೈದ್ಯರೊಬ್ಬರು (69ವರ್ಷ) ಬುಧವಾರ ಸಾವನ್ನಪ್ಪಿರುವುದಾಗಿ ವರದಿ ತಿಳಿಸಿದೆ. ಡಾ. ಜಾನ್ ಸೈಲೋ ರಾಜ್ಯದ ಕೋವಿಡ್ 19 ಸೋಂಕು ಪೀಡಿತ ಮೊದಲ ವ್ಯಕ್ತಿಯಾಗಿದ್ದಾರೆ ಎಂದು ವರದಿ ವಿವರಿಸಿದೆ.

ಸೈಲೋ ಕುಟುಂಬದ ಆರು ಮಂದಿಯನ್ನು ಪರೀಕ್ಷೆಗೊಳಪಡಿಸಲಾಗಿದ್ದು, ಪಾಸಿಟಿವ್ ವರದಿ ಬಂದಿದೆ ಎಂದು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ದಿಬ್ರುಗಢ್ ನಲ್ಲಿ ಸೈಲೋ ಅವರು ಎಂಬಿಬಿಎಸ್ ಪದವಿ ಪಡೆದಿದ್ದು, ಏಮ್ಸ್ ನಲ್ಲಿ ಮೆಡಿಸಿನ್ ನಲ್ಲಿ ಎಂಡಿ ಪದವಿ ಗಳಿಸಿದ್ದರು. ಡಾ.ಸೈಲೋ ಅವರು ಇಬ್ಬರು ಪುತ್ರಿ, ಇಬ್ಬರು ಪುತ್ರರು ಹಾಗೂ ಪತ್ನಿ ಅಚುಲಾ ಅವರನ್ನು ಅಗಲಿದ್ದಾರೆ.

ಡಾ.ಸೈಲೋ ಅವರ ನಿಧನಕ್ಕೆ ಮೇಘಾಲಯ ಮುಖ್ಯಮಂತ್ರಿ ಕೋನಾರ್ಡ್ ಸಂಗ್ಮಾ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. ಅವರು ಕುಟುಂಬಕ್ಕೆ ದುಃಖ ಭರಿಸುವ ಶಕ್ತಿ ದೊರೆಯಲಿ. ಡಾ.ಸೈಲೋ ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಟ್ವೀಟ್ ಮಾಡಿದ್ದಾರೆ.

ಡಾ.ಸೈಲೋ ಅವರು ಎಲ್ಲಿಯೂ ಪ್ರಯಾಣ ಮಾಡಿರಲಿಲ್ಲವಾಗಿತ್ತು. ಅವರಿಗೆ ನಿಗೂಢವಾಗಿ ಹೊತ್ತು ತಂದಿರುವ ವ್ಯಕ್ತಿಯಿಂದ ಈ ಸೋಂಕು ಹರಡಿರಬಹುದು ಎಂದು ವರದಿ ಶಂಕಿಸಿದೆ. ಮೇಘಾಲಯ ಸರ್ಕಾರ ಸೋಂಕಿತರನ್ನು ಪತ್ತೆ ಹಚ್ಚುವ ಕಾರ್ಯದಲ್ಲಿ ತೊಡಗದಿದೆ. ಡಾ.ಸೈಲೋ ಅವರ ಬಳಿ ಸುಮಾರು ಎರಡು ಸಾವಿರಕ್ಕೂ ಅಧಿಕ ಜನರು ಸಂಪರ್ಕಕ್ಕೆ ಬಂದಿದ್ದು, ಅವರನ್ನೆಲ್ಲಾ ಪತ್ತೆ ಹಚ್ಚಬೇಕಾಗಿದೆ ಎಂದು ಸರ್ಕಾರ ತಿಳಿಸಿದೆ.

ಭಾರತದಲ್ಲಿ ಈಗಾಗಲೇ ಕೋವಿಡ 19 ಸೋಂಕು ಪೀಡಿತರ ಸಂಖ್ಯೆ 11,439ಕ್ಕೆ ಏರಿದ್ದು, ಸಾವಿನ ಸಂಖ್ಯೆ 377ಕ್ಕೆ ಏರಿಕೆಯಾಗಿದೆ. ಇದರಲ್ಲಿ 1076 ಹೊಸ ಪ್ರಕರಣ ಪತ್ತೆಯಾಗಿದೆ ಎಂದು ಆರೋಗ್ಯ ಸಚಿವಾಲಯದ ಅಂಕಿಅಂಶ ತಿಳಿಸಿದೆ.