ಒಕ್ಲಹೋಮಾ: ಮಾಲ್‌ಗ‌ಳಿಗೂ ಓಕೆ

Team Udayavani, May 3, 2020, 11:50 AM IST

ಸಾಂದರ್ಭಿಕ ಚಿತ್ರ

ಒಕ್ಲಹೋಮಾ : ಕಳೆದ ಒಂದೂವರೆ ತಿಂಗಳಿನಿಂದ ಸ್ಥಗಿತಗೊಂಡಿದ್ದ ಯುಸ್‌ನ ಒಕ್ಲಹೋಮಾ ನಗರದಲ್ಲಿ ಮಾಲ್‌ಗ‌ಳು, ಹೊಟೇಲ್‌ಗ‌ಳು ಪುನರಾರಂಭಗೊಂಡಿವೆ.
ಲಾಕ್‌ಡೌನ್‌ ಸಡಿಲಿಕೆ ಮಾಡಿ, ಅಂಗಡಿ-ಮುಗ್ಗಟ್ಟುಗಳನ್ನು ತೆರೆಯಲು ಸರಕಾರ ಅನುಮತಿ ನೀಡಿದೆ.

ಕಳೆದ ವಾರವಷ್ಟೇ ಸಲೂನ್‌, ಬ್ಯೂಟಿಪಾರ್ಲರ್‌, ಸ್ಪಾ ಸೇರಿದಂತೆ ಇತರೆ ಸಣ್ಣಪುಟ್ಟ ಉದ್ಯಮಗಳ ಕಾರ್ಯಾಚರಣೆಗೆ ಅವಕಾಶ ಕೊಟ್ಟಿದ್ದ ಸರಕಾರ ಇದೀಗ ಮಾಲ್‌ಗ‌ಳ ಪುನರಾರಂಭಕ್ಕೂ ಹಸಿರು ನಿಶಾನೆ ತೋರಿದೆ.  ಈ ಹಿನ್ನೆಲೆಯಲ್ಲಿ ನಗರದ ಪೆನ್‌ ಸ್ಕ್ವೆರ್‌ಮಾಲ್‌ಗ‌ಳು ಶುಕ್ರವಾರ ಎಂದಿನಂತೆ ಕಾರ್ಯಾಚರಣೆ ಪ್ರಾರಂಭಿಸಿದ್ದು, ಜನರು ಸುರಕ್ಷಾ ಕ್ರಮಗಳನ್ನು ಪಾಲಿಸುವ ಮೂಳಕ ಶಾಪಿಂಗ್‌ ಮಾಲ್‌ ಅತ್ತ ಧಾವಿಸಿದ್ದಾರೆ. ಸರಕಾರ ಸೂಚಿಸಿದಂತೆ ಮಾಸ್ಕ್ ಧರಿಸುವುದಲ್ಲದೇ, ಸಾಮಾಜಿಕ ಅಂತರ ನಿಯಮವನ್ನು ಗ್ರಾಹಕರು ಕಾಯ್ದುಕೊಂಡಿದ್ದಾರೆ. ಹಾಗಾಗಿ ಸರಕಾರದ ಮಾರ್ಗಸೂಚಿಗಳ ಪಾಲನೆ ತೃಪ್ತಿಕರವಾಗಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಪ್ರಾರಂಭದಲ್ಲಿ ಸುಮಾರು 150 ಅಂಗಡಿಗಳ ಪೈಕಿ ಇಡೀ ಮಾಲ್‌ನಲ್ಲಿ ಕೇವಲ 45 ಅಂಗಡಿಗಳು ತೆರೆದರೂ, ಕ್ರಮೇಣ ಇವುಗಳ ಸಂಖ್ಯೆ ಹೆಚ್ಚಾಗಿದೆ. ಸುರಕ್ಷತೆಯ ದೃಷ್ಟಿಯಿಂದ ಮಾಲ್‌ಗ‌ಳಲ್ಲಿನ ಶೌಚಾಲಯಗಳ ಬಳಕೆಗೆ ನಿಷೇಧ ಹೇರಲಾಗಿದೆ. ಕೇವಲ ಮೂರನೇ ಒಂದು ಭಾಗದಷ್ಟು ಹೊಟೇಲ್‌ಗ‌ಳ ಕಾರ್ಯಾಚರಣೆಗೆ ಅವಕಾಶ ನೀಡಲಾಗಿದೆ.
ಮುಂಬರುವ ವಾರಗಳಲ್ಲಿ ರೆಸ್ಟೋರೆಂಟ್‌, ಚಿತ್ರಮಂದಿರಗಳು ಸೇರಿದಂತೆ ಇತರ ವ್ಯವಹಾರಗಳ ಪ್ರಾರಂಭಕ್ಕೆ ಅನುಮತಿ ನೀಡುವ ನಿರೀಕ್ಷೆಯಿದೆ.

ಶುಕ್ರವಾರ ರಾಜ್ಯಾದ್ಯಂತ ವ್ಯಾವಹಾರಿಕ ಚಟುವಟಿಕೆಗಳು ಆರಂಭಗೊಂಡಿರುವ ಬೆನ್ನಲ್ಲೇ ಒಂದೇ ದಿನ 3,748 ಸೋಂಕು ಪ್ರಕರಣಗಳು ದೃಢಪಟ್ಟಿದ್ದು, 230 ಮಂದಿ ಬಲಿಯಾಗಿದ್ದಾರೆ ಎಂದು ವರದಿಯಾಗಿದೆ.