ಸೈಕಲ್‌ ಲೇನ್‌ಗಳಿಂದ ಭರ್ಜರಿ ಆರ್ಥಿಕ ಲಾಭ

Team Udayavani, Aug 23, 2020, 6:20 PM IST

ಪ್ಯಾರಿಸ್‌: ಕೋವಿಡ್ ಸಾಂಕ್ರಾಮಿಕ ರೋಗದ ಕಾರಣ ಜಗತ್ತಿನಾದ್ಯಂತ ಲಾಕ್‌ ಡೌನ್‌ ಆಗಿದ್ದಾಗ ಜನರು ಹೆಚ್ಚು ಹೆಚ್ಚಾಗಿ ಸೈಕಲ್‌ಗ‌ಳನ್ನೇ ಬಳಸಿದರು. ಇದರಿಂದಾಗಿ ಯುರೋಪ್‌ ಸೇರಿದಂತೆ ವಿವಿಧ ದೇಶಗಳಲ್ಲಿ ಕೋವಿಡ್ ಸೈಕಲ್‌ ಮಾರ್ಗಗಳನ್ನು ಮಾಡಲಾಗಿದ್ದು, ಜನರೂ ಇದಕ್ಕೆ ಹೊಂದಿಕೊಂಡಿದ್ದಾರೆ.

ಇದರ ಪರಿಣಾಮ ಯುರೋಪ್‌ ಒಂದರಲ್ಲೇ ಸುಮಾರು 21 ಸಾವಿರ ಕೋಟಿ ರೂ.ಗಳಷ್ಟು ಆರೋಗ್ಯಕ್ಕೆ ಲಾಭವಾಗಲಿದೆ ಎಂದು ಜರ್ಮನಿಯ ಹವಾಮಾನ ಬದಲಾವಣೆ ಕುರಿತ ಸಂಶೋಧನ ತಜ್ಞರು ವರದಿಯೊಂದರಲ್ಲಿ ಹೇಳಿದ್ದಾರೆ. ಕೋವಿಡ್ ಬಳಿಕ ಯುರೋಪ್‌ನ 106 ನಗರಗಳಲ್ಲಿ ಸೈಕ್ಲಿಂಗ್‌ ಲೇನ್‌ಗಳನ್ನು ಸ್ಥಾಪನೆ ಮಾಡಲಾಗಿದೆ. ಅಲ್ಲದೇ ಇಲ್ಲಿ ಶೇ.7ರಷ್ಟು ಸೈಕ್ಲಿಂಗ್‌ ಹೆಚ್ಚಾಗಿದೆ. ಜತೆಗೆ ಪ್ರತಿ ನಗರಗಳಲ್ಲಿ ಸೈಕಲ್‌ಗಾಗಿ ಸ್ಥಳ ಕಾದಿರಿಸುವ ಪ್ರಮಾಣವೂ ಶೇ.0.6ರಷ್ಟು ಹೆಚ್ಚಾಗಿದೆ.

ಸದ್ಯ ಸೈಕಲ್‌ ಸವಾರರಿಗಾಗಿ ಮಾಡಿದ ಮಾರ್ಗ, ಪಾರ್ಕಿಂಗ್‌ ವ್ಯವಸ್ಥೆ ಇತ್ಯಾದಿಗಳಿಂದ ಆರೋಗ್ಯ ವಲಯದಲ್ಲಿ 21 ಸಾವಿರ ಕೋಟಿ ರೂ.ಗಳಷ್ಟು ಲಾಭವಾಗಲಿದೆ. ಕೋವಿಡ್ ಸಂದರ್ಭದಲ್ಲಿ ಯುರೋಪ್‌ನಲ್ಲಿ 2315 ಕಿ.ಮೀ. ಸೈಕಲ್‌ ಲೇನ್‌ಗಳು ನಿರ್ಮಾಣವಾಗಿದ್ದು, ಬಳಕೆಯಾಗುತ್ತಿದೆ. ಸೈಕ್ಲಿಂಗ್‌, ನಡೆದಾಡುವುದರಿಂದ ದೈಹಿಕ ವ್ಯಾಯಾಮ ಹೆಚ್ಚಿ ರೋಗ ನಿರೋಧಕ ಶಕ್ತಿ ಬೆಳೆಯಲು ಕಾರಣವಾಗುತ್ತದೆ. ಇದು ಪರಿಸರ ಸಹ್ಯ, ಕಡಿಮೆ ಖರ್ಚು ಸಾಕಾಗುತ್ತದೆ. ಜತೆಗೆ ಮೋಟಾರು ವಾಹನಗಳಿಗೆ ಬಳಕೆಯಾಗುವ ಇಂಧನ, ಹೊಗೆ ಸೂಸುವ ಪ್ರಮಾಣ ಇಳಿಕೆಯಾಗುತ್ತದೆ. ಜನರು ಆರೋಗ್ಯವಂತರಾದಷ್ಟು, ಸರಕಾರ ಆರೋಗ್ಯ ವಲಯಕ್ಕೆ ಹೂಡಿಕೆ ಮಾಡುವುದು ತಪ್ಪುತ್ತದೆ ಎಂದು ಸಂಶೋಧನ ವರದಿಯಲ್ಲಿ ಹೇಳಲಾಗಿದೆ.