ಮಳೆಗಾಲ ಬಂತೆಂದರೆ ಸಮುದ್ರದ ಅಲೆ ಮನೆಗೆ ನುಗ್ಗುವ ಚಿಂತೆ
ಬಗೆಹರಿಯದ ಕಡಲ್ಕೊರತ ಸಮಸ್ಯೆ
Team Udayavani, Jun 13, 2019, 4:17 PM IST
ಅಂಕೋಲಾ: ಹಾರವಾಡಾದಲ್ಲಿ ಕಳೆದ ವರ್ಷ ಕಡಲ್ಕೊರೆತ ಆಗಿರುವುದು.
ಅರುಣ ಶೆಟ್ಟಿ
ಅಂಕೋಲಾ: ಮಳೆಗಾಲ ಬಂತೆಂದರೆ ಸಾಕು ಸಮುದ್ರ ತೀರದ ನಿವಾಸಿಗಳಿಗೆ ಎಲ್ಲಿಲ್ಲದ ಭಯ ಆವರಿಸುತ್ತೆ. ಎಲ್ಲಿ ಸಮುದ್ರದ ಅಲೆಗಳು ಮನೆಗೆ ನುಗ್ಗುತ್ತವೆ ಎನ್ನುವುದೆ ಚಿಂತೆ. ಹೀಗಾಗಿ ಮಳೆಗಾಲ ಎಂದರೆ ಸಮುದ್ರ ತಟದ ನಿವಾಸಿಗಳು ಯಾವಾಗ, ಎಲ್ಲಿ ಏನು ಅನಾಹುತ ಆಗುತ್ತದೆ ಎಂದು ಭಯಭೀತರಾಗುತ್ತಾರೆ.
ಮಳೆಗಾಲ ಸಮಿಪಿಸುತ್ತಿದ್ದಾಗ ಮಾತ್ರ ಕಡಲ್ಕೊರೆತ ಸಮಸ್ಯೆ ಬಗ್ಗೆ ಜನಪ್ರತಿನಿಧಿಗಳಿಗೆ ಮತ್ತು ಸಂಬಂಧಪಟ್ಟ ಇಲಾಖೆಗೆ ನೆನಪಾಗುತ್ತದೆ. ಬೇಸಿಗೆಯಲ್ಲಿಯೇ ಈ ಸಮಸ್ಯೆಗೆ ಪರಿಹಾರ ಕೈಗೊಳ್ಳುವ ಬದಲು ಇಲಾಖೆ ನಿದ್ದೆಗೆ ಜಾರಿರುತ್ತದೆ. ಹೀಗಾಗಿ ಕಡಲ ಮಕ್ಕಳ ಆತಂಕಕ್ಕೆ ಕೊನೆಯೇ ಇಲ್ಲದಂತಾಗಿದೆ.
ಭಾವಿಕೇರಿ ಗಣೇಶಭಾಗದ ಕಡಲ ತಟದಲ್ಲಿ ಅಪೂರ್ಣ ಕಾಮಗಾರಿಯಿಂದಾಗಿ ನಿರಂತರ ಕಡಲ್ಕೊರೆತ ಉಂಟಾಗುತ್ತಿದೆ. ಹಾರವಾಡದಲ್ಲಿಯೂ ತಡೆಗೊಡೆ ನಿರ್ಮಿಸಿದರು ಇನ್ನೊಂದು ಬಾಗದಲ್ಲಿ ನೀರು ಒಳ ಹೊಕ್ಕುವ ಸಂಭವವು ಇದೆ. ಇಲ್ಲಿ ಹತ್ತಾರು ತೆಂಗಿನ ಮರಗಳ ಬುಡದಲ್ಲಿ ಕೊರಕಲು ಉಂಟಾಗಿ, ಮರಗಳು ನೆಲಕ್ಕುರುಳುವ ಹಂತದಲ್ಲಿವೆ. ಈ ಬಾರಿಯೂ ಕಡಲ ಕೊರೆತದಿಂದ ಮನೆಗಳಿಗೆ ನೀರು ನುಗ್ಗುವ ಸಂಭವವು ಇದೆ.
ಗಣೇಶಭಾಗ ಕಡಲ ತೀರದಲ್ಲಿ 9-10 ವರ್ಷಗಳಿಂದ ಕಡಲ್ಕೊರೆತ ಉಂಟಾಗುತ್ತಿದೆ. ಬೇಲೇಕೇರಿ ಭಾಗದಲ್ಲಿ 2004ರಿಂದ ಅದಿರು ವಹಿವಾಟು ನಡೆಸಲು ಸಮುದ್ರವನ್ನು ಅತಿಕ್ರಮಿಸಿ ಜಟ್ಟಿಗಳನ್ನು ನಿರ್ಮಿಸಿದ ಪರಿಣಾಮ ಭಾವಿಕೇರಿ ಗಣೇಶಭಾಗ ಪ್ರದೇಶದ ಮೇಲೆ ಪರಿಸರ ವೈಪರೀತ್ಯ ಪರಿಣಾಮದಿಂದಾಗಿ ಕಡಲ್ಕೊರೆತ ಕಂಡು ಬಂದಿದೆ. ಸುಮಾರು 20 ಎಕರೆ ಪ್ರದೇಶವು ಸಮುದ್ರ ನೀರು ನುಂಗಿದ ಪರಿಣಾಮ ರೈತರ ಭೂಮಿ ಬಂಜರಾಗಿದೆ. 12 ವರ್ಷಗಳಿಂದ ಕಡಲ್ಕೊರೆತವನ್ನು ತಡೆಯಲು ಸಂಬಂಧಪಟ್ಟ ಇಲಾಖೆ ವಿಫಲವಾಗಿದೆ. ಚುನಾಯಿತ ಪ್ರತಿನಿಧಿಗಳ ಇಚ್ಛಾಶಕ್ತಿ ಕೊರತೆಯಿಂದಾಗಿ ಸಮಸ್ಯೆ ಮುಂದುವರೆದಿದೆ.
ತಾಲೂಕಿನಲ್ಲಿ ಫಲವತ್ತಾದ ಉಸುಕು ಮಿಶ್ರಿತ ಮಣ್ಣು ಭಾವಿಕೇರಿಯದಾಗಿದೆ. ಸಮುದ್ರದ ಉಪ್ಪು ನೀರು ನುಗ್ಗಿದ ಪರಿಣಾಮ ರೈತರು ಸಂಕಷ್ಟ ಪಡುವಂತಾಗಿದೆ. ಇನ್ನು 250 ಮೀ. ಪ್ರದೇಶದಿಂದ ನೀರು ನುಗ್ಗಲು ಆರಂಭಿಸಿದೆ. ಕೂಡಲೇ ಉಸುಕಿನ ಚೀಲವನ್ನಾದರೂ ಹಾಕಿ ರೈತರನ್ನು ರಕ್ಷಿಸಬೇಕೆಂದು ಭಾವಿಕೇರಿಯ ಉದಯ ನಾಯಕ ಡಿಸಿ ಹಾಗೂ ಸಂಬಂಧ ಪಟ್ಟ ಇಲಾಖೆಗೆ ಒತ್ತಾಯಿಸಿದ್ದಾರೆ.
ಸಮುದ್ರದ ಬೋರ್ಗರೆವ ಕಡಲ್ಕೊರೆತದಿಂದ ಜನರನ್ನು ರಕ್ಷಿಸಲು ಸರಕಾರ ಕೋಟಿ ಕೋಟಿ ಹಣ ಖರ್ಚು ಮಾಡುತ್ತಿದೆ. ಆದರೆ ಕರಾವಳಿ ತೀರದಲ್ಲಿ ಅನೇಕ ಕಡೆಗಳಲ್ಲಿ ಸಮುದ್ರ ಕೊರೆತಕ್ಕೆ ತಡೆಗೋಡೆ ಆಗಬೇಕಾದ ಅವಶ್ಯಕತೆ ಇದ್ದುದರಿಂದ ಸರಕಾರದಿಂದ ಬರುವ ಹಣ ಆನೆ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆಯಂತಾಗಿದೆ.
ಶಾಶ್ವತ ಪರಿಹಾರಕ್ಕೆ ಜನರ ಒತ್ತಾಯ
ನೆರೆಯ ದ.ಕ. ಹಾಗೂ ಉಡುಪಿ ಜಿಲ್ಲೆಗಳಲ್ಲಿ ವಿಶೇಷ ಅನುದಾನ ಬಳಸಿ ಕಡಲ್ಕೊರೆತ ಸಮಸ್ಯೆಗೆ ಪರಿಹಾರ ಕಂಡು ಕೊಂಡಿರುವ ಹಾಗೆ ಇಲ್ಲೂ ಕಡಲ ಕೊರೆತ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ವಿಶೇಷ ಅನುದಾನ ಬಿಡುಗಡೆ ಮಾಡಲು ಜಿಲ್ಲೆಯ ಸಚಿವ ಆರ್.ವಿ. ದೇಶಪಾಂಡೆ, ಶಾಸಕಿ ರೂಪಾಲಿ ನಾಯ್ಕ, ಜಿಲ್ಲಾಧಿಕಾರಿ ಕಾರ್ಯಪ್ರವೃತ್ತರಾಗಬೇಕೆಂದು ಜನರು ಆಗ್ರಹಿಸಿದ್ದಾರೆ. ಇನ್ನಾದರೂ ಕಡಲ್ಕೊರೆತ ಸಮಸ್ಯೆಗೆ ಶಾಶ್ವತ ಮುಕ್ತಿ ಸಿಗಬಹುದೆಂದು ಇಲ್ಲಿನ ಜನತೆ ಕಾಯುತ್ತಿದ್ದಾರೆ.
ಟಾಪ್ ನ್ಯೂಸ್
ಈ ವಿಭಾಗದಿಂದ ಇನ್ನಷ್ಟು ಇನ್ನಷ್ಟು ಸುದ್ದಿಗಳು
Uttara Kannada ಸಮುದ್ರದಲ್ಲಿ ಮತ್ತೆ ಜೆಲ್ಲಿಫಿಶ್ಗಳು: ಪ್ರವಾಸಿಗರಿಗೆ ಭಯ
Kumta: ರಾಜಕೀಯದಲ್ಲಿ ಧರ್ಮ ಇರಬೇಕು, ಧರ್ಮದಲ್ಲಿ ರಾಜಕೀಯ ಇರಬಾರದು: ಡಿ.ಕೆ.ಶಿವಕುಮಾರ್
ಪಾದುಕೆ ದರ್ಶನ: ಸಂಭ್ರಮ ಹೆಚ್ಚಿಸಿದ ಮಂತ್ರಾಲಯ ಶ್ರೀಗಳ ಸಂಚಾರ
Karnataka Politics: ಜೆಡಿಎಸ್ ಸರ್ವನಾಶ, ಒಡೆದು ಮನೆಯಂತಾದ ಬಿಜೆಪಿ : ಡಿ.ಕೆ ಶಿವಕುಮಾರ್
Google Map: ಪೂರ್ಣಗೊಳ್ಳದ ಸೇತುವೆ… ಗೂಗಲ್ ಮ್ಯಾಪ್ ನಂಬಿ ಪರದಾಡಿದ ವಾಹನ ಸವಾರರು
MUST WATCH
ಹೊಸ ಸೇರ್ಪಡೆ
Australia; ಕೇಂದ್ರೀಯ ಗುತ್ತಿಗೆ ಪಟ್ಟಿ: ವಾರ್ನರ್, ಸ್ಟೋಯಿನಿಸ್, ಅಗರ್ ಹೊರಕ್ಕೆ
ACA ವಿರುದ್ಧ ಹೇಳಿಕೆ: ಕ್ರಿಕೆಟಿಗ ಹನುಮ ವಿಹಾರಿಗೆ ನೋಟಿಸ್
Rajasthan Royals; ಪ್ರಸಿದ್ಧ್ ಕೃಷ್ಣ ಬದಲಿಗೆ ಕೇಶವ ಮಹಾರಾಜ್
Uttara Kannada ಸಮುದ್ರದಲ್ಲಿ ಮತ್ತೆ ಜೆಲ್ಲಿಫಿಶ್ಗಳು: ಪ್ರವಾಸಿಗರಿಗೆ ಭಯ
IPL ;ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರಾಜಸ್ಥಾನ್ ರಾಯಲ್ಸ್ ಗೆ 12 ರನ್ಗಳ ಜಯ