ಯೋಗದಲ್ಲಿ ದಾಖಲೆ ಬರೆದ ದಯಾನಂದ

Team Udayavani, Jun 29, 2021, 5:46 PM IST

ಲೋಕಾಪುರ: ಯೋಗದಲ್ಲಿ ಸಾಧನೆ ಮಾಡಿದ್ದಕ್ಕಾಗಿ ಹೆಬ್ಟಾಳ ಗ್ರಾಮದ ಗ್ರಾಮೀಣ ಯುವ ಪ್ರತಿಭೆ ದಯಾನಂದ ಕಾಡಪ್ಪ ಅಂಕಲಗಿ ಅವರ ಹೆಸರು ಇಂಟರ್‌ನ್ಯಾಷನಲ್‌ ಬುಕ್‌ ಆಫ್‌ ರೆಕಾರ್ಡ್‌ನಲ್ಲಿ ಸೇರ್ಪಡೆಯಾಗಿದೆ.

ಇಟ್ಟಿಗೆಯ ಮೇಲೆ ತಲೆಕೆಳಗೆ ಮಾಡಿ ಸುಮಾರು 2 ನಿಮಿಷಗಳವರೆಗೆ ಶಿರಶಾಸನದಲ್ಲಿ ನಿಲ್ಲುವ ಮೂಲಕ ದಾಖಲೆ ಮಾಡಿದ್ದಾರೆ. ಅನೇಕ ರಾಜ್ಯ-ರಾಷ್ಟ್ರ ಮಟ್ಟದ ಯೋಗ ಸ್ಪರ್ಧೆಯಲ್ಲಿ ಭಾಗವಹಿಸಿ ಅನೇಕ ಪ್ರಶಸ್ತಿ ಪಡೆದಿರುವ ದಯಾನಂದ ಬೆಂಗಳೂರಿನಲ್ಲಿ ಯೋಗ ವ್ಯಾಸಂಗ ಮಾಡಿ ಅಧ್ಯಾತ್ಮ ಯೋಗ ಶಾಲೆಯಲ್ಲಿ ತರಬೇತಿದಾರನಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ನಮ್ಮ ತಂದೆಯವರ ಆಶೀರ್ವಾದ- ಪ್ರೇರಣೆಯಿಂದ ಏನಾದರೂ ಸಾಧನೆ ಮಾಡಬೇಕೆಂಬ ಹಂಬಲ ಇತ್ತು. ಭಾರತೀಯ ಯೋಗ ದೇಶ-ವಿದೇಶಗಳಲ್ಲಿ ಪ್ರಚಾರ ಪಡಿಸುವುದು ನನ್ನ ಗುರಿಯಾಗಿದೆ. ನನ್ನ ಗ್ರಾಮದ ಹೆಸರನ್ನು ರಾಷ್ಟ್ರ ಮಟ್ಟದಲ್ಲಿ ತೆಗೆದುಕೊಂಡು ಹೋಗುವುದು ನನ್ನ ಆಸೆ. ಯೋಗ ಶಿಕ್ಷಕರಾದ ಅಪ್ಪಣ್ಣ ಬೀಳಗಿ, ಡಾ| ಮಹಾಂತಲಿಂಗ ಶಿವಾಚಾರ್ಯ ಸ್ವಾಮೀಜಿ, ಉಚಿತ ಊಟ, ವಸತಿ, ಬಟ್ಟೆ, ನೀಡುವುದರ ಮೂಲಕ ನನ್ನ ಯೋಗ ಸಾಧನೆಗೆ ಸಹಕಾರ ನೀಡುತ್ತಿರುವ ಡಾ|ಸುಬ್ಬುಬಯ್ನಾ (ಆನಂದ ವೆಂಕಟ ಸುಬ್ರಮಣ್ಯ) ಅವರಿಗೆ ಕೃತಜ್ಞತೆ ಸಲ್ಲಿಸುವುದಾಗಿ ದಯಾನಂದ ಹೇಳುತ್ತಾರೆ.