ಕೇಂದ್ರದ ವಿರುದ್ಧ ಕಾಂಗ್ರೆಸ್‌ ಪ್ರತಿಭಟನೆ

Team Udayavani, May 27, 2018, 4:04 PM IST

ವಿಜಯಪುರ: ಪೆಟ್ರೋಲ್‌, ಡೀಸೆಲ್‌ ಬೆಲೆ ಏರಿಕೆ ನಿಯಂತ್ರಿಸಲು ಕೇಂದ್ರ ಸರ್ಕಾರ ವಿಫಲವಾಗಿದೆ ಎಂದು ಆರೋಪಿಸಿ ಜಿಲ್ಲಾ ಯುವ ಕಾಂಗ್ರೆಸ್‌ ಕಾರ್ಯಕರ್ತರು ಹಾಗೂ ಕಾರ್ಯಕರ್ತೆಯರು ಶನಿವಾರ ಪ್ರತಿಭಟನೆ ನಡೆಸಿದರು. ಗಾಂಧಿ ವೃತ್ತದ ಮುಂಭಾಗದಲ್ಲಿ ಜಮಾಯಿಸಿದ ಕಾರ್ಯಕರ್ತರು ಪ್ರಧಾನಿ ಮೋದಿ ಅವರ ಭಾವಚಿತ್ರ ದಹಿಸಿ ಆಕ್ರೋಶ ವ್ಯಕ್ತಪಡಿಸಿದರು.

ನೇತೃತ್ವ ವಹಿಸಿದ್ದ ಜಿಲ್ಲಾ ಯುವ ಕಾಂಗ್ರೆಸ್‌ ಅಧ್ಯಕ್ಷ ಅಬ್ದುಲ್‌ ಖಾದರ್‌ ಖಾದೀಮ್‌ ಮಾತನಾಡಿ, ದೇಶದಲ್ಲಿ ಪೆಟ್ರೋಲ್‌ ಮತ್ತು ಡಿಸೇಲ್‌ ಬೆಲೆ ಏರಿಕೆಯಿಂದಾಗಿ ಜನಸಾಮಾನ್ಯರು ತತ್ತರಿಸುವಂತಾಗಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತೈಲ ಬೆಲೆ ಕುಸಿತ ಕಂಡಿದೆ. ಆದರೆ ಭಾರತದಲ್ಲಿ ಮಾತ್ರ ತೈಲ ಬೆಲೆ ಕಡಿಮೆಯಾಗುವ ಬದಲು ಹೆಚ್ಚಾಗುತ್ತಲೇ ಇದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಪೆಟ್ರೋಲ್‌ ಬೆಲೆ ಏರಿಕೆಯಿಂದಾಗಿ ಪರೋಕ್ಷವಾಗಿ ಹಾಗೂ ಪ್ರತ್ಯಕ್ಷವಾಗಿ ದಿನಬಳಕೆಯ ವಸ್ತುಗಳು ಗಗನಕ್ಕೇರುತ್ತವೆ. ಅವುಗಳಲ್ಲಿ ಮುಖ್ಯವಾಗಿ ತರಕಾರಿ, ಹಣು ಹಂಪಲು, ಔಷ ಧಗಳ ಬೆಲೆಗಳು ಏರಿಕೆಯಾಗಿ ಜನಸಾಮಾನ್ಯರ ಜೇಬಿಗೆ ಹೊರೆಯಾಗುತ್ತದೆ ಎಂದರು. ಕಾಂಗ್ರೆಸ್‌ ವಕ್ತಾರ ವೈಜನಾಥ ಕರ್ಪೂರಮಠ ಮಾತನಾಡಿ, ಬಿಜೆಪಿಯ ನರೇಂದ್ರ ಮೋದಿ ಸರ್ಕಾರದಿಂದ ದೇಶದಲ್ಲಿ ಯಾವುದೇ ಪ್ರಗತಿಯಾಗಿಲ್ಲ, ಹಳೆಯ ಯೋಜನೆಗಳನ್ನೇ ಹೊಸ ನಾಮಕರಣ ಮಾಡಿ ಮುಂದುವರಿಸಿದ್ದಾರೆ. ಮತ್ತು ಜನರಿಗೆ ವಂಚನೆ, ಮೋಸ, ಅತ್ಯಾಚಾರಿಗಳಿಗೆ ರಕ್ಷಣೆ, ದೇಶದ ಹಣವನ್ನು ಕೊಳ್ಳೆ ಹೊಡೆದವರಿಗೆ ರಕ್ಷಣೆ, ಮಾಡುತ್ತಿರುವುದು ನೋಡಿದರೆ ಮೋದಿ ಅವರು ಹಿಟ್ಲರ್‌ ನೀತಿ ಅನುಸರಿಸುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಮಹಿಳಾ ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷೆ ಮಹಾದೇವಿ ಗೋಕಾಕ ಮಾತನಾಡಿ, ಪ್ರಧಾನಿ ಮೋದಿ ಅವರ ನೇತೃತ್ವದ ಬಿಜೆಪಿ ಸರ್ಕಾರ ನಾಲ್ಕು ವರ್ಷದಿಂದ ಅಧಿಕಾರದಲ್ಲಿದ್ದರೂ ಯಾವುದೇ ರಂಗದಲ್ಲಿಯೂ ಬೆಳವಣಿಗೆಗಳು ಆಗಿಲ್ಲ. ಕಪ್ಪು ಹಣ ವಾಪಸ್‌ ತಂದು ಪ್ರತಿಯೊಬ್ಬರ ಖಾತೆಗೂ 15 ಲಕ್ಷ ರೂ. ಹಾಕುವುದಾಗಿ ಹೇಳಿದ್ದ ಪ್ರಧಾನಿ ಅವರು ತಮ್ಮ ಮಾತಿಗೆ ತಪ್ಪಿದ್ದಾರೆ. ನೋಟು ಅಮಾನ್ಯಿಕರಣ ಹೆಸರಿನಲ್ಲಿ ಬಡವರಿಗೆ ಬ್ಯಾಂಕ್‌ ಮುಂದೆ ದಿನಗಟ್ಟಲೇ ನಿಲ್ಲಿಸಿದ್ದು ಮಾತ್ರ ಮೋದಿ ಸರ್ಕಾರದ ಕೊಡುಗೆ ಎಂದು ವ್ಯಂಗ್ಯವಾಡಿದರು.

ನೋಟು ಅಮಾನ್ಯಿಕರಣ ಸಂದರ್ಭದಲ್ಲಿ ದೇಶದ ಯಾವೊಬ್ಬ ಶ್ರೀಮಂತರು ಬ್ಯಾಂಕ್‌ ಮುಂದೆ ನಿಲ್ಲಲಿಲ್ಲ. ಯಾವುದೇ ಕಪ್ಪು ಹಣ ಸಿಗಲಿಲ್ಲ. ರಿಸರ್ವ್‌ ಬ್ಯಾಂಕ್‌ ಲೆಕ್ಕದ ಪ್ರಕಾರ ಬರುಷ್ಟು ಹಣ ವಾಪಸ್‌ ಬಂತು. ಪುನಃ ಮುದ್ರಣಕ್ಕೆ ಸುಮಾರು 46 ಸಾವಿರ ಕೋಟಿ ರೂ. ಖರ್ಚಾಯಿತು. ಈ ಎಲ್ಲ ಸಂಗತಿಗಳಿದ್ದರೂ ನೋಟು ಅಮಾನ್ಯಿàಕರಣ ನಿರ್ಧಾರ ಕೈಗೊಳ್ಳುವ ಅನಿವಾರ್ಯತೆಯಾದರೂ ಏನಿತ್ತು ಎಂದು ಪ್ರಶ್ನಿಸಿದರು. 

ರೈತರು ಬೆಳೆದಂತ ಬೆಳೆಗಳಿಗೆ ಬೆಂಬಲ ಬೆಲೆ ಇಲ್ಲ, ಇದರಿಂದಾಗಿ ಅನ್ನದಾತನ ಬದುಕು ಅತಂತ್ರವಾಗಿದೆ. ಮಹಿಳೆಯ ಮೇಲೆ ದೌರ್ಜನ್ಯಗಳು ನಿಂತಿಲ್ಲ, ಮಹಿಳಾ ದೌರ್ಜನ್ಯ ಎಸಗುವವರ ರಕ್ಷಣೆಗಾಗಿ ಕೇಂದ್ರ ಸರ್ಕಾರವೇ ನಿಂತಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.  ಕಾಂಗ್ರೆಸ್‌ ಮುಖಂಡ ಅಬ್ದುಲ್‌ ಹಮೀದ್‌ ಮುಶ್ರೀಫ್‌, ಮೊಹ್ಮದ್‌ ರಫೀಕ್‌ ಟಪಾಲ್‌ ಮಾತನಾಡಿದರು. ಕಾಂಗ್ರೆಸ್‌ ಮುಖಂಡರಾದ ಚಾಂದಸಾಬ ಗಡಗಲಾವ, ಕಿಶೋರ ಪಾಟೀಲ, ಫೈರೋಜ್‌ ಜಮಾದಾರ, ಎಂ.ಆರ್‌. ಪಾಟೀಲ, ಅನೂಪ್‌ ಬಬಲೇಶ್ವರ, ಫೈರೋಜ್‌ ಬಳಬಟ್ಟಿ, ಪೈಗಂಬರ್‌ ಹಚ್ಚಾಳ, ಅಬುಬಕರ ಬಿಜಾಪುರ, ವಿದ್ಯಾದರ ವಾಲೀಕಾರ, ಸುಂದರಪಾಲ ರಾಠೊಡ, ಹಮೀದ್‌ ಅವಟಿ, ವಸಂತ ಹೊನಮೊಡೆ, ಜ್ಯೋತಿರಾಮ ಪವಾರ, ಅಕºರ್‌ ನಾಯಕ, ತಾಜುದ್ದೀನ್‌ ಖಲೀಪಾ, ಗಂಗುಬಾಯಿ ಧುಮಾಳೆ, ಕುಸಮಾ ಪವಾರ, ಜಯಶ್ರೀ ಶಿವಣಗಿ, ಭೀಮವ್ವ ಬಿಸನಾಳ, ರಾಜೇಶ್ವರಿ ಚೊಳಕೆ, ಸವಿತಾ, ಸುಜಾತಾ ಗಾಂಜಾನವರ, ರುಕ್ಮಿಣಿ ರಾಠೊಡ, ಸಂಜನಾ, ಅಶ್ವಿ‌ನಿ ಬಿಜ್ಜರಗಿ, ಭಾರತಿ ಮ್ಯಾಗೇರಿ, ಶ್ರೀದೇವಿ ಉತ್ಲಾಸರ, ಲಕ್ಷ್ಮೀ ದೇಸಾಯಿ, ಆಶಾ ಕಟ್ಟಿಮನಿ, ಭಾರತಿ ದೊಡಮನಿ, ಅಪ್ಸರಾ ಚಪ್ಪರಬಂದ, ಅನ್ನಪೂರ್ಣ ಬೀಳಗಿಕರ, ಆರತಿ ಪಾಲ್ಗೊಂಡಿದ್ದರು.