ಪತಿಗೆ ಮಂಗಳಮುಖಿ ಜತೆ ಸಂಪರ್ಕ: ಗಗನಸಖಿ ದೂರು

Team Udayavani, Aug 24, 2022, 4:46 PM IST

ಬೆಂಗಳೂರು: ಗಗನಸಖಿಯೊಬ್ಬಳು ಮೆಚ್ಚಿ ವಿವಾಹವಾಗಿದ್ದ ಪೈಲೆಟ್‌ ಮಂಗಳಮುಖಿಗಳ ಜತೆ ಸಂಪರ್ಕ ಬೆಳೆಸಿ ಪತ್ನಿಯ ಬೆರಳು ಮುರಿದಿದ್ದು, ನ್ಯಾಯಕ್ಕಾಗಿ ಗಗನಸಖಿ ಇದೀಗ ಪೊಲೀಸ್‌ ಠಾಣೆ ಮೆಟ್ಟಿಲೇರಿದ್ದಾಳೆ.

ಯಲಹಂಕ ನಿವಾಸಿ 30 ವರ್ಷದ ಗಗನಸಖಿ ನೀಡಿದ ದೂರಿನ ಆಧಾರದ ಮೇಲೆ ಆಕೆಯ ಪತಿ ಉತ್ತರ ಭಾರತ ಮೂಲದ 34 ವರ್ಷದ ಪೈಲೆಟ್‌ ವಿರುದ್ಧ ಪೂರ್ವ ವಿಭಾಗದ ಮಹಿಳಾ ಠಾಣೆಯಲ್ಲಿ ಎಫ್ಐಆರ್‌ ದಾಖಲಾಗಿದೆ.

ದೂರು ನೀಡಿದ ಸಂತ್ರಸ್ತೆ ವಿಮಾನವೊಂದರಲ್ಲಿ ಗಗನಸಖಿಯಾಗಿದ್ದಾರೆ. ಈಕೆಯ ಪತಿ ಪ್ರಸಿದ್ಧ ಸಂಸ್ಥೆಗೆ ಸೇರಿದ ವಿಮಾನದಲ್ಲಿ ಪೈಲೆಟ್‌ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾನೆ. 2020 ನವೆಂಬರ್‌ನಲ್ಲಿ ಪಂಜಾಬ್‌ನ ಜಲಂಧರ್‌ನಲ್ಲಿ ಇಬ್ಬರೂ ಪಾಲಕರ ಸಮ್ಮುಖದಲ್ಲೇ ವಿವಾಹವಾಗಿದ್ದರು. ವಿವಾಹವಾದ ಆರಂಭದಲ್ಲಿ ದಂಪತಿ ಅನ್ಯೋನ್ಯವಾಗಿದ್ದರು.

ಇದಾದ ಕೆಲ ಸಮಯದ ಬಳಿಕ ಪೈಲೆಟ್‌, ಮನೆಯ ಖರ್ಚು ವೆಚ್ಚಗಳನ್ನು ಪತ್ನಿಗೆ ವಹಿಸಿ ಸಣ್ಣ-ಪುಟ್ಟ ವಿಚಾರಕ್ಕೂ ಪತ್ನಿ ಜತೆ ಜಗಳ ಮಾಡಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಮಾನಸಿಕ ಹಾಗೂ ದೈಹಿಕವಾಗಿ ಕಿರುಕುಳ ನೀಡುತ್ತಿದ್ದ.

ಇದಲ್ಲದೇ, ಪತಿ ತನ್ನ ಜತೆ ದೈಹಿಕ ಸಂಪರ್ಕ ಹೊಂದಲು ನಿಶಕ್ತನಾಗಿದ್ದ. ಇತ್ತೀಚೆಗೆ ಅನುಮಾನದ ಮೇರೆಗೆ ಪತಿಯ ಮೊಬೈಲ್‌ ಪರಿಶೀಲಿಸಿದಾಗ, ಅಶ್ಲೀಲ ವಿಡಿಯೋ ನೋಡುವ ಚಟ ಹೊಂದಿರುವುದು ಹಾಗೂ ಹಲವಾರು ಟ್ರಾನ್ಸ್‌ಜೆಂಡರ್ಸ್‌ಗಳ ಜತೆ ವಿಡಿಯೋ ಕರೆ ಮೂಲಕ ಮಾತನಾಡಿರುವ ವಿಚಾರ ಗೊತ್ತಾಗಿದೆ. ಮಂಗಳಮುಖಿಗಳ ಸಂಪರ್ಕದಲ್ಲಿ ಇರುವುದಲ್ಲದೇ, ಹಲವು ಯುವತಿಯರಿಗೆ ಹಣ ವರ್ಗಾವಣೆ ಮಾಡಿರುವ ಸ್ಟ್ರೀನ್‌ ಶಾಟ್‌ಗಳು ಪತಿಯ ಫೋನ್‌ನಲ್ಲಿರುವುದನ್ನು ನೋಡಿ ಆಘಾತ ಉಂಟಾಗಿದೆ ಎಂದು ಗಗನಸಖಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ಉಲ್ಲೇಖೀಸಿದ್ದಾಳೆ.