Younis Zaroora: ಎಂಜಿ ರಸ್ತೇಲಿ ಇನ್‌ಸ್ಟಾಗ್ರಾಮ್‌ ಸ್ಟಾರ್‌ ಯೂನಿಸ್‌ ನೋಡಲು ಕಿಕ್ಕಿರಿದ ಜನ

Team Udayavani, Sep 7, 2024, 12:27 PM IST

ಬೆಂಗಳೂರು: ಅನುಮತಿ ಪಡೆಯದೆ ಜನರ ಗುಂಪು ಸೇರಿಸಿದ್ದ ಆರೋಪದಡಿ ಇನ್‌ಸ್ಟಾಗ್ರಾಮ್‌ ಸ್ಟಾರ್‌ ಯೂನೀಸ್‌ ಝರೂರಾ ಎಂಬಾತನನ್ನು ವಶಕ್ಕೆ ಪಡೆದ ಅಶೋಕ್‌ನಗರ ಠಾಣೆ ಪೊಲೀಸರು ಎಚ್ಚರಿಕೆ ನೀಡಿ ಬಿಟ್ಟು ಕಳಿಸಿದ್ದಾರೆ.

ಯೂನೀಸ್‌ ಝರೂರಾ ವಿವಿಧ ದೇಶಗಳಿಗೆ ತೆರಳಿ ಸರ್ಪೈಸ್ ಉಡುಗೊರೆ ಕೊಡುತ್ತಿದ್ದ. ಸರಿಯಾದ ಉತ್ತರ ನೀಡಿದವರಿಗೆ ದುಬಾರಿ ಬೆಲೆಯ ಐಫೋನ್‌ನನ್ನು ಉಡುಗೊರೆ ಕೊಡುತ್ತಿದ್ದ. ಎಂ.ಜಿ. ರಸ್ತೆಯಲ್ಲಿ ಶುಕ್ರವಾರ ದಿ.ಪುನೀತ್‌ ರಾಜ್‌ ಕುಮಾರ್‌ ಅವರ ಫೋಟೋ ಅನಾವರಣ ಮಾಡಿದ್ದ. ಈತ ಬಂದ ವಿಚಾರ ತಿಳಿದು ಈತನ ಅಭಿಮಾನಿಗಳು ನಡು ರಸ್ತೆಯಲ್ಲಿಯೇ ಗುಂಪು ಸೇರಿದ ಹಿನ್ನೆಲೆಯಲ್ಲಿ ಸಾರ್ವಜನಿಕರಿಗೆ ತೊಂದರೆಯಾಗಿತ್ತು. ಅನುಮತಿ ಪಡೆಯದೆ ಜನರ ಗುಂಪು ಸೇರಿಸಿದ್ದ ಕಾರಣ ಅಶೋಕನಗರ ಪೊಲೀಸರು ಆತನನ್ನು ವಶಕ್ಕೆ ಪಡೆದಿದ್ದಾರೆ. ಹೊಯ್ಸಳ ವಾಹನದ ಒಳಗೆ ಕೂಡ ವೀಡಿಯೋ ಮಾಡಿದ್ದ. ಠಾಣೆ ಒಳಗೂ ಫೋಟೋ ತೆಗೆದು “ತೊಂದರೆಯಲ್ಲಿದ್ದೀನಿ’ ಎಂದು ಇನ್‌ಸ್ಟಾಗ್ರಾಂನಲ್ಲಿ ಮೆಸೇಜ್‌ ಕಳುಹಿಸಿದ್ದ. ಪೊಲೀಸರು ಆತನಿಗೆ ಈ ರೀತಿಯಾಗಿ ಜನರ ಗುಂಪು ಸೇರುವಂತೆ ಮಾಡದಂತೆ ಎಚ್ಚರಿಕೆ ಕೊಟ್ಟು ಬಿಟ್ಟು ಕಳಿಸಿದ್ದಾರೆ.