ಸೋಂಕು ತಡೆಗೆ ಔಷಧಕ್ಕೆ ಮೊರೆ ಹೋದ ಪಾಲಿಕೆ

Team Udayavani, Mar 25, 2020, 12:16 PM IST

ಬೆಂಗಳೂರು: ಪಾಲಿಕೆ ವ್ಯಾಪ್ತಿಯಲ್ಲಿ ಕೋವಿಡ್ 19 ವೈರಸ್‌ ಹಾಗೂ ಸಾಂಕ್ರಾಮಿಕ ರೋಗಗಳನ್ನು ತಡೆಗಟ್ಟುವ ಉದ್ದೇಶದಿಂದ ಜೆಟ್ಟಿಂಗ್‌ ಯಂತ್ರ ಮತ್ತು ಡ್ರೋಣ್‌ಗಳ ಮೂಲಕ ಸೋಡಿಯಂ ಹೈಪೋ ಕ್ಲೋರೈಡ್‌ ( ಸೋಂಕು ನಿವಾರಕ ದ್ರಾವಣ) ಸಿಂಪಡಣೆಗೆ ಮೇಯರ್‌ ಎಂ.ಗೌತಮ್‌ಕುಮಾರ್‌ ಅವರು ಮಂಗಳವಾರ ಪಾಲಿಕೆಯ ಕೇಂದ್ರ ಕಚೇರಿಯ ಆವರಣದಲ್ಲಿ ಚಾಲನೆ ನೀಡಿದರು.

ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಮೇಯರ್‌, ಏಳು ಸಾವಿರ ಲೀಟರ್‌ ಸಾಮರ್ಥ್ಯದ 10 ಜೆಟ್ಟಿಂಗ್‌ ಯಂತ್ರಗಳನ್ನು ತಾತ್ಕಾಲಿಕ ಬಳಕೆಗೆ ತೆಗೆದುಕೊಳ್ಳಲಾಗಿದೆ. ಈ ಯಂತ್ರಗಳ ಮೂಲಕ ಪಾಲಿಕೆ ವ್ಯಾಪ್ತಿಯಲ್ಲಿ ಸೋಂಕು ನಿವಾರಣೆ ಸಿಂಪಡಣೆ ಮಾಡಲಾಗುವುದು ಎಂದರು. ಮಂಗಳವಾರ ಹಡ್ಸನ್‌ ಸರ್ಕಲ್‌, ಸರ್‌.ಪುಟ್ಟಣ್ಣ ಚೆಟ್ಟಿ ಪುರಭವನ, ಕೆ.ಆರ್‌. ಮಾರುಕಟ್ಟೆ ಸೇರಿದಂತೆ ಪ್ರಮುಖ ರಸ್ತೆಗಳಲ್ಲಿ ಔಷಧಿ ಸಿಂಪಡಣೆ ಮಾಡಲಾಯಿತು.

ನಗರ ಪ್ರಮುಖ ಭಾಗದಲ್ಲಿ ಸಿಂಪಡಣೆ: ನಗರದ ಪ್ರಮುಖ ಮಾರುಕಟ್ಟೆಗಳು, ಕಚೇರಿಗಳು ಹಾಗೂ ಕೋವಿಡ್ 19  ಸೋಂಕು ದೃಢಪಟ್ಟ ಪ್ರದೇಶಗಳಲ್ಲಿ ಜಟ್ಟಿಂಗ್‌ ಯಂತ್ರ ಮತ್ತು ದ್ರೋಣ್‌ನ ಮೂಲಕ ಸೋಂಕು ನಿವಾರಣ ದ್ರಾವಣ ಸಿಂಪಡಣೆ ಮಾಡಲು ಪಾಲಿಕೆಯ ಅಧಿಕಾರಿಗಳು ಸಿದ್ಧತೆ ಮಾಡಿಕೊಂಡಿದ್ದಾರೆ. ಈ ವೇಳೆ ಪಾಲಿಕೆ ಆಯುಕ್ತ ಬಿ.ಎಚ್‌.ಅನಿಲ್‌ ಕುಮಾರ್‌, ಬಿಬಿಎಂಪಿ ವಿಶೇಷ ಆಯುಕ್ತ (ಘನತ್ಯಾಜ್ಯ ನಿರ್ವಹಣೆ) ರಂದೀಪ್‌, ಜಂಟಿ ಆಯುಕ್ತ (ಘನತ್ಯಾಜ್ಯ ನಿರ್ವಹಣೆ) ಸರ್ಪರಾಜ್‌ ಖಾನ್‌ ಮತ್ತಿತರರು ಹಾಜರಿದ್ದರು.

ಸೋಂಕಿತರ ಕಟ್ಟಡಗಳಿಗೆ ಸಿಂಪಡಣೆ: ಕೋವಿಡ್ 19 ಸೋಂಕಿತರು ಹಾಗೂ ಹೋಂ ಕ್ವಾರಂಟೈನ್‌ ನಲ್ಲಿರುವವರ ಮನೆಗಳು, ಕಟ್ಟಡಗಳು ಹಾಗೂ ಅವರು ಸಂಚಾರ ಮಾಡಿರುವ ಪ್ರದೇಶಗಳನ್ನು ಗುರುತಿಸಿ ಔಷಧ ಸಿಂಪಡಿಸಲು ಮೊದಲ ಆದ್ಯತೆ ನೀಡಲಾಗುವುದು. ಇಂತಹ ಪ್ರದೇಶಗಳಲ್ಲಿ 15 ಲೀ. ಔಷಧ ಸಿಂಪಡಣೆ ಸಾಮರ್ಥ್ಯದ ಡ್ರೋಣ್‌ಗಳ ಬಳಸಲಾಗುವುದು. ತಲಾ 4 ಗಂಟೆಯಂತೆ ಔಷಧ ಸಿಂಪಡಣೆ ಸಾಮರ್ಥ್ಯ ಹೊಂದಿರುವ 3 ಡ್ರೋಣ್‌ ಗಳನ್ನು ಬಳಸಲಾಗುತ್ತಿದೆ ಎಂದು ಘನತ್ಯಾಜ್ಯ ವಿಭಾಗದ ಜಂಟಿ ಆಯುಕ್ತ ಸರ್ಪರಾಜ್‌ ಖಾನ್‌ ಮಾಹಿತಿ ನೀಡಿದರು.