ರಂಗಭೂಮಿಯಲ್ಲೀಗ ಮಾಸ್ಟರ್‌ ಮಾತಿಲ್ಲ

Team Udayavani, May 3, 2019, 10:23 AM IST

ಬೆಂಗಳೂರು: ಒಂದೆಡೆ ವಿಡಂಬಣಾತ್ಮಕ ರಂಗ ಪ್ರಯೋಗಗಳ ಮೂಲಕ ಹರಳು ಹುರಿದಂತೆ ಮಾತನಾಡಿ ಸಮಾಜದ ಹುಳುಕುಗಳನ್ನು ಎತ್ತಿ ತೋರುತ್ತಿದ್ದ ಮಹಾನ್‌ ರಂಗಕರ್ಮಿ ಮಾಸ್ಟರ್‌ ಹಿರಣ್ಣಯ್ಯ ತಮ್ಮ ಪ್ರೀತಿಯ ‘ರಂಗಭೂಮಿ’ ನಿವಾಸದಲ್ಲಿ ಮೌನಿಯಾಗಿ ಚಿರನಿದ್ರೆ ಜಾರಿದ್ದರೆ ಮತ್ತೂಂದೆಡೆ ಗಣ್ಯರು ಆ ಮಹಾನ್‌ ನಟನ ವ್ಯಕ್ತಿತ್ವದ ನುಡಿನಮನ ಸಾಗಿತ್ತು.

-ಇದು, ಗುರುವಾರ ಮಾಸ್ಟರ್‌ ಹಿರಣ್ಣಯ್ಯ ಅವರ ಮನೆಯ ಮುಂದೆ ಕಂಡುಬಂದ ದೃಶ್ಯಗಳು.

ಹಿರಣ್ಣಯ್ಯ ಅವರ ನಿಧನದ ಸುದ್ದಿ ತಿಳಿಯುತ್ತಿದ್ದಂತೆ ಸಾಕಷ್ಟು ಮಂದಿ ಬನಶಂಕರಿಯಲ್ಲಿರುವ ಅವರ ನಿವಾಸಕ್ಕೆ ಧಾವಿಸಿದರು. ಆಸ್ಪತ್ರೆಯಿಂದ ಬಂದ ಪಾರ್ಥಿವ ಶರೀರವನ್ನು 11.30ರ ವೇಳೆ ಮನೆಯಲ್ಲಿ ಕೆಲ ವಿಧಿ ವಿಧಾನಗಳನ್ನು ನೆರವೇರಿಸಿ ಅಂತಿಮ ದರ್ಶನಕ್ಕೆ ಇಡಲಾಯಿತು. ಅಂತಿಮ ನಮನ ಸಲ್ಲಿಸಲು ರಂಗಭೂರ್ಮಿ ಕಲಾವಿದರು, ಸಿನಿಮಾ ನಟರು, ರಾಜಕೀಯ ಮುಖಂಡರ ದಂಡೇ ಹರಿದುಬಂತು.

ಅವರ ಗರಡಿಯಲ್ಲಿ ಪಳಗಿದ ಯುವ ಕಲಾವಿದರು ತಮ್ಮ ಗುರುವಿಗೆ ಅಂತಿಮ ನಮನ ಸಲ್ಲಿಸಿ ಕಂಬನಿ ಮಿಡಿದರು. ಅವರೊಟ್ಟಿಗೆ ಕಳೆದ ದಿನಗಳನ್ನು ಅವರು ಕಲಿಸಿದ ಪಾಠಗಳನ್ನು ಮೆಲುಕು ಹಾಕಿದರು. ಪ್ರಮುಖವಾಗಿ ಅವರ ನೇರ ನುಡಿ, ಆಯಾ ಕಾಲದ ರಾಜಕೀಯ ಬೆಳವಣಿಗೆಗಳ ಕುರಿತು ವಿಡಂಬನಾತ್ಮಕ ಮಾತುಗಳು, ಸಮಾಜಕ್ಕೆ ನೀಡುತ್ತಿದ್ದ ಸಂದೇಶಗಳು, ಲಂಚಾವತಾರ ನಾಟಕದ ಸಂಭಾಷಣೆಗಳು, ರಾಜಕಾರಣಿಗಳ ಕುರಿತ ಮಾಡಿದ್ದ ಕಟು ಟೀಕೆಗಳನ್ನು ನೆನೆದರು.

ಅವರ ಅಭಿನಯಿಸಿದ ನಡುಬೀದಿ ನಾರಾಯಣದ ‘ತೀರ್ಥರೂಪು’, ಭ್ರಷ್ಟಾಚಾರದ ದಫೇದಾರ್‌ ‘ಮುರಾರಿ’, ಸದಾರಮೆಯ ‘ಕಳ್ಳ’ ಆದಿಮೂರ್ತಿ, ಕಪಿಮುಷ್ಠಿಯ ‘ಜಾರ್ಜ್‌’, ಮಕ್ಮಲ್ ಟೋಪಿಯ ‘ನಾಣಿ’ ಪಾತ್ರಗಳ ಕುರಿತು ಅಭಿಮಾನಿಯೊಬ್ಬರು ನೆನೆದು ಕಣ್ಣಿರು ಹಾಕಿದರು.

ರಾಜಕಾರಣಿಗಳ ಮೆಚ್ಚುಗೆ ನುಡಿ: ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಸಚಿವ ಡಿ.ಕೆ.ಶಿವಕುಮಾರ್‌, ಆರ್‌.ಅಶೋಕ್‌, ವಾಟಾಳ್‌ ನಾಗರಾಜ್‌ ಸೇರಿದಂತೆ ಸಾಕಷ್ಟು ರಾಜಕಾರಣಿಗಳು ಹಿರಣ್ಣಯ್ಯ ಅವರಿಗೆ ಅಂತಿನ ನಮನ ಸಲ್ಲಿಸಿದರು. ನಾಟಕಗಳ ಮೂಲಕ ನಮ್ಮ ತಪ್ಪು ಎತ್ತಿ ತೋರಿಸುತ್ತಿದ್ದ ಮಾರ್ಗದರ್ಶಕರು ಎಂದು ಬಣ್ಣಿಸಿದರು.

ಸರಳವಾಗಿ ನಡೆದ ಅಂತಿಮ ನಮನ: ಮಾಸ್ಟರ್‌ ಹಿರಣ್ಣಯ್ಯ ಅವರು ದೊಡ್ಡ ರಂಗಕರ್ಮಿಯಾಗಿದ್ದರು ಕೂಡಾ ಎಂದಿಗೂ ಸರಳತೆಯ ಅಂಶವನ್ನೇ ತಮ್ಮ ಭಾಷಣಗಳಲ್ಲಿ ನಮೂದಿಸುತ್ತಿದ್ದರು. ಅಂತೆಯೇ ಸರಳ ಜೀವನ ಸಾಗಿಸುತ್ತಿದ್ದವರು. ಅವರು ಆರೋಗ್ಯದಿಂದಿರುವಷ್ಟು ಕಾಲ ಸಾಮಾನ್ಯರಂತೆ ಬಿಎಂಟಿಸಿ ಬಸ್‌ನಲ್ಲಿಯೇ ಓಡಾಡುತ್ತಿದ್ದರು. ಇನ್ನು ಅದೇ ರೀತಿ ಅವರ ಅಂತಿಮ ದರ್ಶನ, ಯಾತ್ರೆ, ವಿಧಿ ವಿಧಾನಗಳು ದೊಡ್ಡಮಟ್ಟದಲ್ಲಿ ವಿಜೃಂಭಣೆಯಿಂದ ನಡೆಯಲಿಲ್ಲ. ತೀರ ಸಾಮಾನ್ಯರಂತೆಯೇ ಅವರು ಲೋಕದ ಪಯಣ ಮುಗಿಸಿದರು. ಬೆಳಗ್ಗೆ 11ಗಂಟೆ ಸುಮಾರಿಗೆ ಮನೆಗೆ ಬಂದ ಪಾರ್ಥಿವ ಶರೀರವನ್ನು ನಾಲ್ಕು ತಾಸು ಮನೆಯಲ್ಲಿಯೇ ಸಾರ್ವಜನಿಕರ ದರ್ಶನಕ್ಕಿಡಲಾಗಿತ್ತು. ಆನಂತರ ಆ್ಯಂಬುಲೆನ್ಸ್‌ನಲ್ಲಿ ಬನಶಂಕರಿ ವಿದ್ಯುತ್‌ ಚಿತಾಗಾರಕ್ಕೆ ತೆಗೆದುಕೊಂಡು ಹೋಗಿ ಬ್ರಾಹ್ಮಣ ಸಂಪ್ರದಾಯದಂತೆ ಅಂತಿಮ ವಿಧಿವಿಧಾನ ನೆರವೇರಿಸಲಾಯಿತು.

ಬಹು ಅಂಗಾಂಗ ವೈಫ‌ಲ್ಯ: ಹಿರಣ್ಯಯ್ಯ ಅವರಿಗೆ ನೀಡಿದ್ದ ಚಿಕಿತ್ಸೆ ಕುರಿತಂತೆ ಮಾಹಿತಿ ನೀಡಿದ ಬಿಜಿಎಸ್‌ ಗ್ಲೋಬಲ್ ಆಸ್ಪತ್ರೆಯ ಹಿರಿಯ ಹೆಪಟಾಲಜಿಸ್ಟ್‌ ಡಾ. ಸಂದೀಪ್‌ ಸತ್ಸಂಗಿ ಅವರು, ಹಿರಣ್ಣಯ್ಯ ಅವರಿಗೆ ಯಕೃತ್‌ ಸಿರಾಸಿಸ್‌ ಕಾಯಿಲೆ ಉಂಟಾಗಿತ್ತು. ಬಳಿಕ ಅದು ಯಕೃತ್‌ ಕ್ಯಾನ್ಸರ್‌ ಆಗಿ ಉಲ್ಬಣಗೊಂಡಿದ್ದು, ಇದಕ್ಕಾಗಿ ‘ಟೇಸ್‌’ ಚಿಕಿತ್ಸೆ ನೀಡಲಾಗುತ್ತಿತ್ತು. ವೈದ್ಯರು ಯಕೃತ್‌ ಒಳ ಭಾಗದಲ್ಲಿ ಕಿಮೋಥೆರಪಿ ಚಿಕಿತ್ಸೆ ನೀಡಲಾಗುತ್ತು. ವಯೋಸಹಜ ಬೆಳವಣಿಗೆಯಿಂದ ಮತ್ತೂಂದು ಯಕೃತ್‌ನಲ್ಲಿ ಸಮಸ್ಯೆ ಕಾಣಿಸಿಕೊಂಡಿದ್ದು, ಪರಿಣಾಮ ಕಳೆದ ಮೂರು ತಿಂಗಳಿಂದ ಒಂದೊಂದಾಗಿ ಆರೋಗ್ಯ ಸಮಸ್ಯೆ ಆರಂಭವಾದವು. ಮೊದಲು ಜಾಂಡೀಸ್‌, ಕಾಲುಗಳಲ್ಲಿ ಊತ, ಹೊಟ್ಟೆಯಲ್ಲಿ ನೀರು ತುಂಬಿಕೊಂಡಿತು. ಒಟ್ಟಾರೆ ಕಳೆದ ಮೂರು ತಿಂಗಳಿಂದ ಬಹು ಅಂಗಾಂಗ ವೈಫ‌ಲ್ಯದ ಸಮಸ್ಯೆಗಳೊಂದಿಗೆ ಸೆಣಸಾಟ ನಡೆಸಿದ್ದರು ಎಂದು ತಿಳಿಸಿದರು.

ಕಳೆದ 10 ದಿನದಲ್ಲಿ ಎಡಗಾಲಿನಲ್ಲಿ ಚರ್ಮ ಸಂಬಂಧಿ ಸೋಂಕು ಕಾಣಿಸಿಕೊಂಡಿತ್ತು. ರೋಗ ನಿರೋಧಕ ಶಕ್ತಿ ಕಡಿಮೆ ಆಗಿ ಉಂಟಾಗಿದ್ದ ಈ ಸೋಂಕು ರಕ್ತಕ್ಕೂ ವ್ಯಾಪಿಸಿತ್ತು. ಇನ್ನು ಗುರುವಾರ ಬೆಳಗ್ಗೆ ಮತ್ತೂಂದು ಯಕೃತ್‌ ಕಾರ್ಯ ನಿರ್ವಹಣೆ ಸ್ಥಗಿತಗೊಳಿಸಿತ್ತು. ಬೆಳಗ್ಗೆ ಯಕೃತ್‌, ಹೃದಯದಿಂದ ರಕ್ತ ಹರಿಯುವಿಕೆ ಕಡಿತವಾಗಿ ಆಗಿ ಮಾಸ್ಟರ್‌ ಹಿರಣ್ಣಯ್ಯ ಮೃತಪಟ್ಟರು ಎಂದು ಡಾ. ಸಂದೀಪ್‌ ಸತ್ಸಂಗಿ ಅವರು ಮಾಹಿತಿ ನೀಡಿದರು.

ಮಾಧ್ವ ಮಹಾಸಭಾ ಸಂತಾಪ: ಖ್ಯಾತ ರಂಗಕರ್ಮಿ ಮಾಸ್ಟರ್‌ ಹಿರಣ್ಣಯ್ಯ ಅವರು ನಾಟಕದ ಮೂಲಕ ರಾಜ್ಯದಲ್ಲೇ ಪ್ರಸಿದ್ಧಿ ಗಳಿಸಿದ್ದಾರೆ. ಅಖೀಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾದ ಸಂಸ್ಥಾಪಕ ಅಧ್ಯಕ್ಷರಾಗಿದ್ದ ಅವರು, ಬ್ರಾಹ್ಮಣರ ಸಂಘಟನೆಯ ಅಭಿವೃದ್ಧಿಗೆ ಅಪಾರವಾಗಿ ಶ್ರಮಿಸಿದ್ದಾರೆ. ಮೃತರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಅಖೀಲ ಕರ್ನಾಟಕ ಮಾಧ್ವ ಮಹಾಸಭಾ ಸಂತಾಪ ಸೂಚಿಸಿದೆ.

ಚಿತ್ರರಂಗ, ಅಭಿಮಾನಿ ಬಳಗ ಬಡವಾಗಿದೆ
ಬೆಂಗಳೂರು:
ಹಿರಿಯ ರಂಗಕರ್ಮಿ ಮಾಸ್ಟರ್‌ ಹಿರಣ್ಣಯ್ಯ ಅವರ ನಿಧನಕ್ಕೆ ನಾನಾ ಕ್ಷೇತ್ರದ ಗಣ್ಯರು, ಬಿಜೆಪಿ ಮುಖಂಡರು ಕಂಬನಿ ಮಿಡಿದಿದ್ದಾರೆ. ಕನ್ನಡ ಚಿತ್ರರಂಗದ ಹಿರಿಯ ನಟ ಮಾಸ್ಟರ್‌ ಹಿರಣ್ಣಯ್ಯ ಅವರ ನಿಧನ ಸುದ್ದಿ ತಿಳಿದು ತೀವ್ರ ದುಃಖವಾಗಿದ್ದು, ಸಂತಾಪ ವ್ಯಕ್ತಪಡಿಸುತ್ತೇನೆ. ‘ಲಂಚಾವತಾರ’ ನಾಟಕದ ಮೂಲಕ ಮನೆ ಮಾತಾಗಿದ್ದ ಹಿರಿಯ ಕಲಾವಿದರು ನಮ್ಮನ್ನು ಅಗಲಿದ್ದು, ಚಿತ್ರರಂಗದಲ್ಲಿ ಮರೆಯಲಾಗದ ಛಾಪು ಬಿಟ್ಟು ಹೋಗಿದ್ದಾರೆ. ಅವರನ್ನು ಕಳೆದುಕೊಂಡ ಚಿತ್ರರಂಗ ಹಾಗೂ ಅಭಿಮಾನಿಗಳ ಬಳಗ ಬಡವಾಗಿದೆ.

ಮಾಸ್ಟರ್‌ ಹಿರಣ್ಣಯ್ಯ ಅವರಿಗೆ ಹೃತ್ಫೂರ್ವಕ ಶ್ರದ್ಧಾಂಜಲಿ ಸಲ್ಲಿಸುತ್ತೇನೆ. ಅವರ ಕುಟುಂಬ, ಬಂಧುಮಿತ್ರರು ಹಾಗೂ ಅಭಿಮಾನಿಗಳಿಗೆ ದೇವರು ದುಃಖ ಭರಿಸುವ ಶಕ್ತಿ ನೀಡಲಿ ಎಂದು ಪ್ರಾರ್ಥಿಸುತ್ತೇನೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷರಾದ ವಿಧಾನಸಭೆ ಪ್ರತಿಪಕ್ಷ ನಾಯಕ ಬಿ.ಎಸ್‌. ಯಡಿಯೂರಪ್ಪ ಸಂತಾಪ ಸಲ್ಲಿಸಿದ್ದಾರೆ. ರಾಜ್ಯ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಸಿ.ಟಿ.ರವಿ, ಚಿತ್ರರಂಗದ ಹಿರಿಯ ನಟ, ಅಭಿನಯ ಚತುರ, ರಂಗಭೂಮಿ ಹಿರಿಯ ಹಾಸ್ಯ ಕಲಾವಿದ ಮಾಸ್ಟರ್‌ ಹಿರಣ್ಣಯ್ಯ ಅವರು ನಿಧನರಾದ ಸುದ್ದಿ ತಿಳಿದು ತೀವ್ರ ದುಃಖವಾಯಿತು. ಸುಮಾರು 30ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿರುವ ಅವರು ಹಾಸ್ಯದಲ್ಲಿ ಅಭಿಮಾನಿಗಳ ಮನರಂಜಿಸಿ ಮನಸ್ಸು ಗೆದ್ದವರು. ಇವರನ್ನು ಕಳೆದುಕೊಂಡು ಇಡೀ ಚಿತ್ರರಂಗ ಹಾಗೂ ಅಭಿಮಾನಿಗಳ ಬಳಗ ಬಡವಾಗಿದೆ. ಅವರ ಕುಟುಂಬ, ಬಂಧುಮಿತ್ರರು ಹಾಗೂ ಅಭಿಮಾನಿಗಳಿಗೆ ದುಃಖ ಭರಿಸುವ ಶಕ್ತಿಯನ್ನು ಭಗವಂತ ನೀಡಲಿ ಎಂದು ಪ್ರಾರ್ಥಿಸುತ್ತೇನೆ ಎಂದು ಸಂತಾಪ ಸಂದೇಶದಲ್ಲಿ ತಿಳಿಸಿದ್ದಾರೆ.

ರಾಜ್ಯ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಅರವಿಂದ ಲಿಂಬಾವಳಿ, ‘ಲಂಚಾವತಾರ’ ನಾಟಕದ ಮೂಲಕ ರಾಜ್ಯದ ಮನೆ ಮಾತಾಗಿದ್ದ ರಂಗಕರ್ಮಿ, ಹಿರಿಯ ನಟ ಮಾಸ್ಟರ್‌ ಹಿರಣ್ಣಯ್ಯ ಅವರು ಅನಾರೋಗ್ಯದ ಕಾರಣ ನಮ್ಮೆಲ್ಲರನ್ನು ಅಗಲಿದ್ದು, ನೋವಿನ ಸಂಗತಿ. ಇವರ ನಿಧನದಿಂದ ರಂಗಭೂಮಿಯ ಅಪೂರ್ವ ರತ್ನವೊಂದು ಕಳಚಿದೆ. ಅವರ ಆತ್ಮಕ್ಕೆ ದೇವರು ಶಾಂತಿ ಕರುಣಿಸಲಿ’ ಎಂದು ಟ್ವೀಟ್‌ನಲ್ಲಿ ಸಂತಾಪ ಹೇಳಿದ್ದಾರೆ. ಸಂಸದೆ ಶೋಭಾ ಕರಂದ್ಲಾಜೆ, ‘ನಟ ರತ್ನಾಕರ, ಕಲ್ಚರ್ಡ್‌ ಕಮೆಡಿಯನ್‌ ಮಾಸ್ಟರ್‌ ಹಿರಣ್ಣಯ್ಯ ಅವರು ಇನ್ನಿಲ್ಲ. ಕನ್ನಡ ಚಿತ್ರರಂಗಕ್ಕೆ ಅವರು ನೀಡಿದ ಕೊಡುಗೆ ಸದಾ ಸ್ಮರಣೀಯ. ಅವರ ಆತ್ಮಕ್ಕೆ ಸದ್ಗತಿ ಸಿಗಲಿ’ ಎಂದು ಟ್ವಿಟ್ಟರ್‌ನಲ್ಲಿ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.

ಗಣ್ಯರಿಂದ ಅಂತಿಮ ನಮನ

ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ, ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ, ಕೆಪಿಸಿಸಿ ಅಧ್ಯಕ್ಷ ದಿನೇಶ್‌ ಗುಂಡೂರಾವ್‌, ಸಚಿವ ಡಿ.ಕೆ.ಶಿವಕುಮಾರ್‌, ಶಾಸಕ ಆರ್‌.ಅಶೋಕ್‌, ಸಂಸದ ಪ್ರತಾಪ್‌ ಸಿಂಹ, ವಾಟಾಳ್‌ ನಾಗರಾಜ್‌, ಕವಿ ನಿಸಾರ್‌ ಅಹ್ಮದ್‌, ಹಿರಿಯ ಪತ್ರಕರ್ತೆ ವಿಜಯಮ್ಮ, ಎಚ್.ಎಸ್‌.ವೆಂಕಟೇಶ್‌ಮೂರ್ತಿ, ಬಿ.ಆರ್‌.ಲಕ್ಷ್ಮಣ್‌ರಾವ್‌, ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಅಧಯಕ್ಷ ಎಸ್‌.ಜಿ.ಸಿದ್ದರಾಮಯ್ಯ, ನಟರಾದ ದರ್ಶನ್‌, ರಾಕ್‌ಲೈನ್‌ ವೆಂಕಟೇಶ್‌, ಸುಮಲತಾ, ಪ್ರೇಮ್‌, ಎಸ್‌.ನಾರಾಯಣ್‌, ದತ್ತಣ್ಣ, ಗಿರಿಜಾ ಲೋಕೇಶ್‌, ಉಮಾಶ್ರೀ, ಶ್ರೀನಾಥ್‌, ಅನು ಪ್ರಭಾಕರ್‌, ಸುಂದರ್‌ ರಾಜ್‌, ದೇವರಾಜ್‌, ಪ್ರಜ್ವಲ್ ದೇವರಾಜ್‌, ಮಂಡ್ಯ ರಮೇಶ್‌, ಡಿಂಗ್ರಿ ನಾಗರಾಜ್‌, ಟಿ.ಎನ್‌.ಸೀತಾರಾಮ್‌, ಉಮೇಶ್‌, ವೈ.ಬಿರಾದಾರ್‌, ತಬಲ ನಾಣಿ, ಸೃಜನ್‌ ಲೋಕೇಶ್‌, ಸರಿಗಮ ವಿಜಿ, ಶಿವಮೊಗ್ಗ ಸುಬ್ಬಣ್ಣ, ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಚಿನ್ನೆಗೌಡ ಸೇರಿದಂತೆ ರಂಗಭೂಮಿ, ಸಿನಿಮಾ, ರಾಜಕೀಯ ಕ್ಷೇತ್ರದ ಅನೇಕ ಗಣ್ಯರು ಮಾಸ್ಟರ್‌ ಹಿರಣ್ಣಯ್ಯ ಅವರಿಗೆ ಅಂತಿಮ ನಮನ ಸಲ್ಲಿಸಿದರು.

ಕನ್ನಡ ರಂಗಭೂಮಿ, ಚಿತ್ರರಂಗಕ್ಕೆ ಹೊಸ ಆಯಾಮ ತುಂಬಿದ್ದರು. ರಾಜಕೀಯ ನಾಯಕರಿಗೆ ನೇರವಾಗಿ ತಿವಿಯುತ್ತಿದ್ದರು. ಇನ್ನೊಬ್ಬ ಮಾಸ್ಟರ್‌ ಹಿರಣ್ಣಯ್ಯ ಹುಟ್ಟಿ ಬರಲು ಸಾಧ್ಯವಿಲ್ಲ. ಪದ್ಮನಾಭ ಕ್ಷೇತ್ರದಲ್ಲಿ ನಿಲ್ಲುವಂತೆ ಮೊದಲು ಅವರೇ ಹೇಳಿದ್ದರು
● ಆರ್‌. ಅಶೋಕ್‌, ಬಿಜೆಪಿ ಮುಖಂಡ

ನಾನು ಅವರ ಒಂದು ಚಿತ್ರದಲ್ಲಿ ನಟಿಸಿದ್ದೆ. ಅಂಬರೀಶ್‌ ಅವರು ಹಿರಣ್ಣಯ್ಯ ಅವರೊಂದಿಗೆ ಮೂರು ಚಿತ್ರಗಳಲ್ಲಿ ನಟಿಸಿದ್ದರು. ಅಂಬರೀಶ್‌ ಅವರಿಗೆ ಹಿರಣ್ಣಯ್ಯ ಅವರ ಮೇಲೆ
ಅಪಾರ ಗೌರವವಿತ್ತು.
● ಸುಮಲತಾ ಅಂಬರೀಶ್‌

ನನ್ನನ್ನೂ ಸೇರಿದಂತೆ ಹಲವು ರಾಜಕೀಯ ನಾಯಕರನ್ನು ಟೀಕಿಸಿದ್ದರು. ಅದರಿಂದ ನಮ್ಮ ತಪ್ಪುಗಳನ್ನು ತಿದ್ದುಕೊಂಡಿದ್ದೇವೆ. ಸಮಾಜದಲ್ಲಿನ ತಪ್ಪುಗಳ ಬಗ್ಗೆ ಅವರ ನಾಟಕದಲ್ಲಿ ಉಲ್ಲೇಖೀಸುತ್ತಿದ್ದರು. ಇಡೀ ನಾಟಕ ಅವರ ನಟನೆ ಮೇಲೇ ನಿಂತಿರುತ್ತಿತ್ತು.
● ಡಿ.ಕೆ. ಶಿವಕುಮಾರ್‌, ಸಚಿವ

ಬದುಕಿಗೆ ಸಂಬಂಧಿಸಿದ ವಿಷಯಗಳನ್ನು ಹಾಸ್ಯಸ್ಪದವಾಗಿ ನಾಟಕಗಳ ಮೂಲಕ ತೋರಿಸುತ್ತಿದ್ದರು. ತಂದೆಗೆ ತೀರ ಆತ್ಮೀಯರಾಗಿದ್ದರು. ಸಣ್ಣವನಾಗಿದ್ದಾಗಲೇ ಅವರ ಲಂಚಾವತಾರ ನಾಟಕ ನೋಡಿದ್ದೆ
● ದಿನೇಶ್‌ ಗುಂಡುರಾವ್‌, ಕೆಪಿಸಿಸಿ ಅಧ್ಯಕ್ಷ

ಮಾಸ್ಟರ್‌ ಹಿರಣ್ಣಯ್ಯ ಅವರು ಯಾವಾಗಲೂ ಆಳುವ ಪಕ್ಷಕ್ಕೆ, ವಿರೋಧ ಪಕ್ಷದ ನಾಯಕನಾಗಿಯೇ ಇರುತ್ತಿದ್ದರು. ತಮ್ಮ ವಿಡಂಬನಾತ್ಮಕ ಮಾತುಗಳ ಮೂಲಕ ಜನರನ್ನು ಜಾಗೃತಗೊಳಿಸುತ್ತಿದ್ದರು.
● ಬಸವಲಿಂಗಯ್ಯ, ರಾಷ್ಟ್ರೀಯ ನಾಟಕ ಶಾಲೆ ನಿರ್ದೇಶಕ

ಮಾಸ್ಟರ್‌ ಹಿರಣ್ಣಯ್ಯ ಅವರು ಆಳುವ ಸರ್ಕಾರಕ್ಕೆ ರಂಗಭೂಮಿ ಪ್ರತಿಭಟನೆಯ ಸಂಕೇತವಾಗಿದ್ದರು. ತಮ್ಮ ವಿಭಿನ್ನ ಶೈಲಿಯ ಮಾತಿನ ಮೂಲಕ ರಾಜಕಾರಣಿಗಳಿಗೆ ಚಾಟಿ ಬೀಸುತ್ತಿದ್ದರು.
● ಶ್ರೀನಿವಾಸ್‌ ಜಿ.ಕಪ್ಪಣ್ಣ, ಹಿರಿಯ ರಂಗಕರ್ಮಿ

ರಂಗಭೂಮಿ ಸಮಾಜಕ್ಕೆ ಕನ್ನಡಿ ಹಿಡಿಯುವಂತಹ ಕೆಲಸ ಮಾಡಿದರೆ, ಹಿರಣ್ಣಯ್ಯ ಅವರು ಸಮಾಜದ ಮನಸ್ಸಿಗೆ ಕನ್ನಡಿ ಹಿಡಿಯುವ ಕೆಲಸ ಮಾಡಿದರು.
● ಲೋಕೇಶ್‌, ನಾಟಕ ಅಕಾಡೆಮಿ ಅಧ್ಯಕ್ಷ

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.



ಈ ವಿಭಾಗದಿಂದ ಇನ್ನಷ್ಟು

  • ಬೆಂಗಳೂರು: ನೋ ಪಾರ್ಕಿಂಗ್‌ ಸ್ಥಳದಲ್ಲಿ ನಿಂತಿದ್ದ ಬೈಕ್‌ ಅನ್ನು ಟೋಯಿಂಗ್‌ ಮಾಡಿದ್ದಕ್ಕೆ, ಟೋಯಿಂಗ್‌ ವಾಹನ ಚಾಲಕನಿಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿದಲ್ಲದೆ,...

  • ಬೆಂಗಳೂರು: ಪಾಲಿಕೆ ವ್ಯಾಪ್ತಿಯ ಕೆ.ಆರ್‌.ಪುರಂ, ಮಹಾಲಕ್ಷ್ಮೀ ಲೇಔಟ್‌, ಯಶವಂತಪುರ ಹಾಗೂ ಶಿವಾಜಿನಗರ ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆ ಅ.21ರಂದು ನಡೆಯಲಿದ್ದು,...

  • ಬೆಂಗಳೂರು: ಅನರ್ಹ ಶಾಸಕರ ಕ್ಷೇತ್ರಗಳಿಗೆ ನಡೆಯುವ ಉಪ ಚುನಾವಣೆಯಲ್ಲಿ ಕಾಂಗ್ರೆಸ್‌ ಏಕಾಂಗಿ ಸ್ಪರ್ಧೆಗೆ ಸಿದ್ಧತೆ ಮಾಡಿಕೊಂಡಿದೆ ಎಂದು ಕೆಪಿಸಿಸಿ ಅಧ್ಯಕ್ಷ...

  • ಬೆಂಗಳೂರು: ಹೈಕೋರ್ಟ್‌ ಕಟ್ಟಡ ಸ್ಫೋಟ ಮಾಡುವುದಾಗಿ ದೆಹಲಿ ಮೂಲದ ವ್ಯಕ್ತಿಯೋರ್ವನಿಂದ ಹೈಕೋರ್ಟ್‌ ರಿಜಿಸ್ಟ್ರಾರ್‌ಗೆ ಪತ್ರ ಬರೆದಿದ್ದು ಆತಂಕ ಸೃಷ್ಟಿಸಿದೆ....

  • ಬೆಂಗಳೂರು: "ಹಿಂದೆ ರಂಗ ಕ್ಷೇತ್ರದಲ್ಲಿ ಭಾಗವತರಿಗೆ ಭಾರೀ ಗೌರವ, ಮನ್ನಣೆಯಿತ್ತು. ಆ ಗೌರವ ಪಡೆಯಲು ನಾನು ಮೂಡಲಪಾಯ ಯಕ್ಷಗಾನ ಕ್ಷೇತ್ರದ ಭಾಗವತನಾದೆ,' ಎಂದು ಹಿರಿಯ...

ಹೊಸ ಸೇರ್ಪಡೆ