ಪ್ರವಾಹ ನಿಂತರೂ ಸಂಕಷ್ಟ ತಪ್ಪಿಲ್ಲ: ಊರಿಗೆ ಬಂದ 9 ಅಡಿ, 35 ಕೆ.ಜಿ. ಹೆಬ್ಬಾವು

Team Udayavani, Oct 4, 2019, 8:48 AM IST

ಬೆಳಗಾವಿ: ಪ್ರವಾಹದ ಅಬ್ಬರದಿಂದ ಜಲಚರ ಪ್ರಾಣಿಗಳು ಊರೊಳಗೆ ಪ್ರವೇಶಿಸುತ್ತಿದ್ದು, ಬಳ್ಳಾರಿ ನಾಲಾ ಪಕ್ಕದಲ್ಲಿರುವ ತಾಲೂಕಿನ ಸುಳೇಭಾವಿ ಗ್ರಾಮದಲ್ಲಿ 9 ಅಡಿ ಉದ್ದದ ಹೆಬ್ಬಾವು ಸಿಕ್ಕಿದೆ.

ಗ್ರಾಮದ ಅಶೋಕ ಮಂಡು ಎಂಬವರು ತಮ್ಮ ಹೊಲದಲ್ಲಿ ಕೃಷಿ ಚಟುವಟಿಕೆ ನಡೆಸುತ್ತಿದ್ದಾಗ ಹೆಬ್ಬಾವು ಕಣ್ಣಿಗೆ ಬಿದ್ದಿದೆ. ಸುಮಾರು 35 ಕೆ.ಜಿ.ಗೂ ಹೆಚ್ಚು ತೂಕವುಳ್ಳ ಈ ಹೆಬ್ಬಾವು ಕಂಡು ಭಯಭೀತರಾಗಿದ್ದಾರೆ. ಹಾವು ಹಿಡಿಯುವ ತಜ್ಞರಾದ ಆನಂದ ಚಿಟ್ನಿ, ನಿರ್ಧರಾ ಚಿಟ್ನಿ ದಂಪತಿ ಬಂದು ಹೆಬ್ಬಾವು ರಕ್ಷಿಸಿದ್ದಾರೆ.

ಹೆಬ್ಬಾವು ಕಂಡ ಕೂಡಲೇ ಆತಂಕಗೊಂಡ ಗ್ರಾಮಸ್ಥರು ಕೂಡಲೇ ಸಮೀಪದ ಮೋದಗಾ ಗ್ರಾಮದ ಮೈನು ಎಂಬ ವ್ಯಕ್ತಿಗೆ ವಿಷಯ ತಿಳಿಸಿದ್ದಾರೆ. ಸ್ಥಳಕ್ಕೆ ಬಂದ ಮೈನು ಹೆಬ್ಬಾವು ಹಿಡಿದಿದ್ದಾರೆ. ಅದನ್ನು ಚೀಲದಲ್ಲಿ ತುಂಬಿಕೊಂಡು ತಂದಿದ್ದಾರೆ. ಬಳಿಕ ಯಳ್ಳೂರ ಗ್ರಾಮದ ಚಿಟ್ನಿ ದಂಪತಿ ಬೃಹತ್ ಗಾತ್ರದ ಹೆಬ್ಬಾವನ್ನು ಖಾನಾಪುರದ ಕಾಡಿಗೆ ಬಿಟ್ಟಿದ್ದಾರೆ.