ದುಪ್ಪಟ್ಟು ದರ ಕೊಟ್ಟರೂ ಸಿಕ್ಕಿಲ್ಲ ಮಾಸ್ಕ್

Team Udayavani, Mar 15, 2020, 12:45 PM IST

ಬಳ್ಳಾರಿ: ಗಣಿನಾಡು ಬಳ್ಳಾರಿ ಜಿಲ್ಲೆಯಲ್ಲೂ ಆತಂಕ ಮೂಡಿಸಿರುವ ಕೊರೊನಾ ವೈರಸ್‌ ಎಫೆಕ್ಟ್ನಿಂದಾಗಿ ಸುರಕ್ಷತಾ ಕ್ರಮಕೈಗೊಳ್ಳಲು ಮುಂದಾಗುತ್ತಿರುವ ಜನರಿಗೆ ಔಷಧ ಅಂಗಡಿಗಳಲ್ಲಿ ಮಾಸ್ಕ್ಗಳ ಕೊರತೆ ಎದುರಾಗಿದೆ. ಒಂದುವೇಳೆ ಇದ್ದರೂ ಈ ಮೊದಲು ಇದ್ದ 10 ರೂ. ಬದಲಾಗಿ 30 ರೂ. ಅಥವಾ ಅದಕ್ಕೂ ಹೆಚ್ಚು ಬೆಲೆಗೆ ಮಾರಾಟ ಮಾಡಲಾಗುತ್ತಿದೆ.

ಕೊರೊನಾ ವೈರಸ್‌ ಜಗತ್ತನೇ ಬೆಚ್ಚಿ ಬೀಳಿಸಿದೆ. ಭಾರತಕ್ಕೂ ಆವರಿಸಿರುವ ಈ ವೈರಸ್‌ ರಾಜ್ಯದಲ್ಲಿ ಈಗಾಗಲೇ ಒಬ್ಬರನ್ನು ಬಲಿ ತೆಗೆದುಕೊಂಡಿದ್ದು ಗಣಿನಾಡು ಬಳ್ಳಾರಿ ಜಿಲ್ಲೆಯಲ್ಲಿ ಆತಂಕ ಸೃಷ್ಟಿಸಿದೆ. ಮಾರಣಾಂತಿಕ ಕೊರೊನಾ ವೈರಸ್‌ ವ್ಯಾಪಿಸದಂತೆ ಈಗಾಗಲೇ ಸಾಕಷ್ಟು ಮುಂಜಾಗ್ರತಾ ಕ್ರಮಕೈಗೊಂಡಿರುವ ಜಿಲ್ಲಾಡಳಿತ, ಸಾರ್ವಜನಿಕರಲ್ಲೂ ಕೊರೊನಾ ವೈರಸ್‌ ಬಗ್ಗೆ ಎಚ್ಚರಿಕೆ ವಹಿಸಿ, ಆತಂಕ ಬೇಡ ಎಂದು ಜಾಗೃತಿ ಮೂಡಿಸುತ್ತಿದೆ. ಅದರಂತೆ ಸುರಕ್ಷತಾ ಕ್ರಮಕ್ಕೆ ಮುಂದಾಗುತ್ತಿರುವ ಜನರಿಗೆ ಔಷಧ ಮಳಿಗೆಗಳಲ್ಲಿ ಮಾಸ್ಕ್ಗಳು ಲಭಿಸುತ್ತಿಲ್ಲ. ಕೇಳಿದರೆ ಸ್ಟಾಕ್‌ ಇಲ್ಲ, ಖಾಲಿಯಾಗಿದೆ ಎಂಬ ಉತ್ತರ ಔಷಧ ಮಳಿಗೆಗಳ ಮಾಲೀಕರಿಂದ ಬರುತ್ತದೆ. ಇದು ಜನರಲ್ಲಿನ ಆತಂಕವನ್ನು ಮತ್ತಷ್ಟು ಹೆಚ್ಚಿಸಲು ಕಾರಣವಾಗಲಿದೆ.

ಹೆಚ್ಚಿನ ಬೆಲೆಗೆ ಮಾರಾಟ: ಕೊರೊನಾ ವೈರಸ್‌ನಿಂದ ಆತಂಕಕ್ಕೊಳಗಾಗಿರುವ ಪೋಷಕರು ಶಾಲೆಗೆ ಹೋಗುವ ತಮ್ಮ ಮಕ್ಕಳ ಸುರಕ್ಷತೆಗಾಗಿ ಮಾಸ್ಕ್ ಗಳನ್ನು ಖರೀದಿಸಲು ಹೋದರೆ ಔಷಧ ಮಳಿಗೆಗಳಲ್ಲಿ ಇಲ್ಲ, ಸ್ಟಾಕ್‌ ಖಾಲಿಯಾಗಿದೆ ಎನ್ನಲಾಗುತ್ತಿದೆ. ಹಲವಾರು ಮಳಿಗೆಗಳಿಗೆ ಹೋದರೂ ಇದೇ ಸಿದ್ಧ ಉತ್ತರ ಕೇಳಿಬರುತ್ತಿದೆ. ಹೆಚ್ಚಿನ ಹಣವನ್ನು ನೀಡುವುದಾಗಿ ಹೇಳಿದಾಗ 10 ರೂ. ಮೌಲ್ಯದ ಮಾಸ್ಕ್ಗಳನ್ನು 30ರಿಂದ 50ರೂಗಳವರೆಗೆ ಮಾರಾಟ ಮಾಡಲಾಗುತ್ತಿದೆ. ಅಥವಾ ತಮ್ಮ ಪರಿಚಿತರಿಗಷ್ಟೇ ಮಾಸ್ಕ್ ಗಳನ್ನು ನೀಡಲಾಗುತ್ತಿದೆ. ಔಷಧ ಮಳಿಗೆಗಳ ಈ ತಾರತಮ್ಯ ಕೊರೊನಾ ವೈರಸ್‌ ಮಾಸ್ಕ್ಗಳ ಮಾರಾಟವನ್ನು ದಂಧೆಯನ್ನಾಗಿ ಬಳಸಿಕೊಳ್ಳಲಾಗುತ್ತಿದೆ ಎಂದು ಸ್ಥಳೀಯ ನಿವಾಸಿ ಸಿ. ಭೀಮಣ್ಣ ಬೇಸರ ವ್ಯಕ್ತಪಡಿಸಿದರು.

ಭಾರತದಲ್ಲಿ ಕೊರೊನಾ ವೈರಸ್‌ ಮೊದಲ ಪ್ರಕರಣ ಪತ್ತೆಯಾದ 24 ಗಂಟೆಗಳಲ್ಲೇ ಪ್ರತಿ ಮಾಸ್ಕ್ನ ಬೆಲೆ 12 ರೂಪಾಯಿ ಏರಿಕೆಯಾಗಿತ್ತು. ಈಗ ಸಾಮಾನ್ಯ ಮಾಸ್ಕ್ನ ದರ 28-30 ರೂಪಾಯಿಗಳಾಗಿದ್ದರೆ ಎನ್‌95 ಮಾಸ್ಕ್ನ ದರ 250-800 ರೂಪಾಯಿವರೆಗೆ ಏರಿಕೆಯಾಗಿದೆ. ಪ್ರತಿದಿನ 10-15 ಮಾಸ್ಕ್ಗಳು ಗರಿಷ್ಠ ಮಾರಾಟವಾಗುತ್ತಿದ್ದ ಮಾಸ್ಕ್ಗಳು ಕೊರೊನಾ ವೈರಸ್‌ ಎಫೆಕ್ಟ್ನಿಂದಾಗಿ ಮುಖಕ್ಕೆ ಧರಿಸುವ ಮಾಸ್ಕ್ ಎಲ್ಲೆಡೆ ಹೆಚ್ಚಾಗಿ ಬಳಕೆಯಾಗುತ್ತಿದೆ.

ಎಲ್ಲರೂ ಮಾಸ್ಕ್ ಕೊಳ್ಳಲು ಮಗಿಬೀಳುತ್ತಿದ್ದಾರೆ. ಪರಿಣಾಮ ಔಷಧ ಮಳಿಗೆಯಲ್ಲೇ ಮಾಸ್ಕ್ಗಳಿಗೆ ಬರ ಎದುರಾಗಲು ಕಾರಣವಾಗಿದೆ ಎಂದು ಔಷಧ ಮಳಿಗೆಯವರೊಬ್ಬರು ತಿಳಿಸುತ್ತಾರೆ.

ಎಲ್ಲರೂ ಮಾಸ್ಕ್ ಧರಿಸುವ ಅಗತ್ಯವಿಲ್ಲ: ಕೊರೊನಾ ವೈರಸ್‌ನಿಂದ ರಕ್ಷಿಸಿಕೊಳ್ಳಲು ಎಲ್ಲರೂ ಮಾಸ್ಕ್ ಮೊರೆ ಹೋಗುವುದು ಸಾಮಾನ್ಯ. ಆದರೆ, ಈ ಮಾಸ್ಕ್ಗಳನ್ನು ಎಲ್ಲರೂ ಧರಿಸುವ ಅಗತ್ಯವಿಲ್ಲ. ಕೊರೊನಾ ಪ್ರಕರಣ ದೃಢಪಟ್ಟಾಗ ಸೋಂಕು ಹರಡಿರುವವರ ಸುತ್ತಮುತ್ತಲೂ ಇರುವವರು ಮಾಸ್ಕ್ ಸೇರಿ ಇತರೆ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಬೇಕು. ಅದನ್ನು ಹೊರತುಪಡಿಸಿ ಎಲ್ಲರೂ ಧರಿಸುವ ಅಗತ್ಯವಿಲ್ಲ. ಆದರೆ, ಸೋಂಕು ಹರಡಿಲ್ಲದಿದ್ದರೆ ಫೇಸ್‌ ಮಾಸ್ಕ್ ಬಳಸುವುದರಿಂದ ಯಾವುದೇ ಉಪಯೋಗವಿಲ್ಲ.

ಮಾಸ್ಕ್ ಧರಿಸಿದ್ದರೂ ಬೇರೆಯವರಿಂದ ನಿಮಗೆ ಕೊರೊನಾ ವೈರಸ್‌ ಸೋಂಕು ತಗುಲಬಹುದು. ಈಗಾಗಲೇ ಸೋಂಕಿತರಾಗಿದ್ದರೆ ನಿಮ್ಮಿಂದ ಇತರರಿಗೆ ವೈರಸ್‌ ಹರಡುವುದನ್ನು ನಿಯಂತ್ರಿಸಲು ಮಾಸ್ಕ್ ಧರಿಸಬೇಕು. ಹಾಗಾಗಿ ಎಲ್ಲರೂ ಮಾಸ್ಕ್ ಧರಿಸುವುದರಿಂದ ಉಪಯೋಗವಿಲ್ಲ.
ಡಾ| ಬಸಾರೆಡ್ಡಿ, ಜಿಲ್ಲಾ ತಜ್ಞವೈದ್ಯರು,
ಜಿಲ್ಲಾಸ್ಪತ್ರೆ ಬಳ್ಳಾರಿ

ಕೊರೊನಾ ವೈರಸ್‌ನಿಂದ ಎಚ್ಚರಿಕೆ ವಹಿಸಿ, ಆತಂಕ ಬೇಡ. ವೈರಸ್‌ನಿಂದ ರಕ್ಷಿಸಿಕೊಳ್ಳಲು ಎಲ್ಲರೂ ಮುಖಕ್ಕೆ ಮಾಸ್ಕ್ ಧರಿಸುವ ಅಗತ್ಯವಿಲ್ಲ. ಸೋಂಕಿತರ ಸುತ್ತಮುತ್ತಲೂ ಇರುವವರು ಮಾಸ್ಕ್ ಧರಿಸಬೇಕು. ಜತೆಗೆ ಸೋಂಕು ಇತರರಿಗೆ ಹರಡದಂತೆ ಸೋಂಕಿತರು ಮಾಸ್ಕ್ ಧರಿಸಬೇಕು. ಅಷ್ಟೇ ಹೊರತು ಎಲ್ಲರೂ ಮಾಸ್ಕ್ಧ ರಿಸುವುದು ಬೇಡ. ಇದರೊಂದಿಗೆ ಸ್ವತ್ಛತೆ ಸೇರಿ ಇನ್ನಿತರೆ ಮುಂಜಾಗ್ರತಾ ಕ್ರಮಕೈಗೊಳ್ಳಬೇಕು.
ಡಾ| ಎಚ್‌.ಎಲ್‌. ಜನಾರ್ದನ್‌,
ಜಿಲ್ಲಾ ಆರೋಗ್ಯಾಧಿಕಾರಿ, ಬಳ್ಳಾರಿ

ವೆಂಕೋಬಿ ಸಂಗನಕಲ್ಲು