ತಂಡದಿಂದ ಹಲ್ಲೆ; ಒಬ್ಬರಿಗೆ ಗಾಯ 

Team Udayavani, Dec 19, 2017, 1:56 AM IST

ಮಂಗಳೂರು: ನಗರದ ರಾವ್‌ ಆ್ಯಂಡ್‌ ರಾವ್‌ ಸರ್ಕಲ್‌ ಬಳಿ ತಂಡವೊಂದು 4 ಮಂದಿಗೆ ತಲವಾರಿನಿಂದ ಮಾರಣಾಂತಿಕವಾಗಿ ಹಲ್ಲೆಗೈದ ಘಟನೆ ಸೋಮವಾರ ರಾತ್ರಿ ನಡೆದಿದ್ದು, ಇದರಿಂದ ವ್ಯಕ್ತಿಯೊಬ್ಬರಿಗೆ ಗಂಭೀರ ಗಾಯವಾಗಿದ್ದು, ಉಳಿದ ಮೂವರು ಸಣ್ಣಪುಟ್ಟ ಗಾಯದಿಂದ ಪಾರಾಗಿದ್ದಾರೆ. ಬಂದರ್‌ನ ಶಫೀಕ್‌ (45), ಅನೀಸ್‌ (22), ಹಫೀಝ್ (22) ಗಾಯಗೊಂಡವರು. ಪಾನ್‌ ಅಂಗಡಿ ವ್ಯಾಪಾರಿಯೊಬ್ಬರಿಗೂ ಗಾಯವಾಗಿದೆ.

ಸೋಮವಾರ ಬಂದರ್‌ನ ಹರ್ಷ ಬಾರ್‌ ಬಳಿ ಶಫೀಕ್‌ ಅವರಿಗೆ ಮೂವರ ತಂಡ ಹಿಗ್ಗಾಮುಗ್ಗ ಥಳಿಸುತ್ತಿತ್ತು. ಈ ಸಂದರ್ಭ ಅದೇ ದಾರಿಯಾಗಿ ಶಫೀಕ್‌ ಅವರ ಪರಿಚಯದ ಅನೀಸ್‌ ಪಾಂಡೇಶ್ವರ ಕಡೆಗೆ ತೆರಳುತ್ತಿದ್ದರು. ತಂಡವು ಹಲ್ಲೆ ನಡೆಸುವುದನ್ನು ಕಂಡು ಬಿಡಿಸಲು ಹೋದಾಗ ಮೂವರು ದುಷ್ಕರ್ಮಿಗಳು ತಮ್ಮ ಕಾರಿನಲ್ಲಿದ್ದ ತಲವಾರು ತೆಗೆದು ಅವರ ಮೇಲೆಯೂ ಹಲ್ಲೆಗೆ ಮುಂದಾಗಿದ್ದಾರೆ. ಆವಾಗ ಶಫೀಕ್‌ರ ತಲೆಗೆ ಗಂಭೀರ ಗಾಯವಾದರೆ, ಅನೀಸ್‌ರ ಬಲಕೈಗೆ ಗಾಯವಾಗಿದೆ. ಅನೀಸ್‌ ಜತೆ ಇದ್ದ ವಿದ್ಯಾರ್ಥಿ ಹಫೀಝ್, ಮಧ್ಯೆ ಬಾರ್‌ ಸಮೀಪದ ಪಾನ್‌ ಅಂಗಡಿ ವ್ಯಾಪಾರಿಗೂ ಗಾಯವಾಗಿದೆ ಎನ್ನಲಾಗಿದೆ. ಅವರ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿದು ಬಂದಿಲ್ಲ.

ಮೂವರು ಗಾಯಾಳುಗಳನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪೊಲೀಸರು ಸ್ಥಳಕ್ಕೆ ತೆರಳಿ ತನಿಖೆ ನಡೆಸುತ್ತಿದ್ದಾರೆ.