ಮಕ್ಕಳ ಅಶ್ಲೀಲ ದೃಶ್ಯ ವೀಕ್ಷಕರ ಮೇಲೆ ಸಿಐಡಿ ಕಣ್ಣು !

Team Udayavani, Jun 28, 2021, 10:55 AM IST

ಮಂಗಳೂರು: ಸಾಮಾಜಿಕ ಜಾಲತಾಣಗಳಲ್ಲಿ ಮಕ್ಕಳಿಗೆ ಸಂಬಂಧಿಸಿದ ಅಶ್ಲೀಲ ವೀಡಿಯೋ, ಚಿತ್ರಗಳ ವೀಕ್ಷಣೆ, ಡೌನ್‌ ಲೋಡ್‌ ಹಾಗೂ ಹಂಚುವವರ ಮೇಲೆ ಅಪರಾಧ ತನಿಖಾ ದಳ (ಸಿಐಡಿ) ಕಣ್ಣಿಟ್ಟಿದೆ.

ಅಂತಹವರ ಮೇಲೆ ಕಳೆದೊಂದು ವರ್ಷದಿಂದ ನಿಗಾ ಇಟ್ಟಿದ್ದ ಸಿಐಡಿ ಸಮಗ್ರ ಮಾಹಿತಿಯನ್ನು ಸ್ಥಳೀಯ ಪೊಲೀಸರಿಗೆ ನೀಡಿದೆ. ಅದರಂತೆ ಪೊಲೀಸರು ಆರೋಪಿಗಳನ್ನು ವಶಕ್ಕೆ ಪಡೆದುಕೊಳ್ಳುತ್ತಿದ್ದಾರೆ. ವಿಶೇಷವೆಂದರೆ ಅನೇಕ ಮಂದಿಗೆ ತಪ್ಪಿನ ಅರಿವೇ ಇಲ್ಲ. ಮನೆ ಬಾಗಿಲಲ್ಲಿ ಪೊಲೀಸರನ್ನು ಕಂಡು ದಂಗಾಗುತ್ತಿದ್ದಾರೆ.

ಮಕ್ಕಳ ಮೇಲಿನ ದೌರ್ಜನ್ಯ ತಡೆಯುವ ಉದ್ದೇಶದಿಂದ ಕೇಂದ್ರ ಸರಕಾರ ಕಠಿನ ಕಾಯಿದೆ ರೂಪಿಸಿದ್ದು, ಅಂತಹ ದೃಶ್ಯಗಳ ವೀಕ್ಷಣೆಯನ್ನೂ ನಿಷೇಧಿಸಲಾಗಿದೆ. ಆದಾಗ್ಯೂ ಸಾಮಾಜಿಕ ಜಾಲತಾಣದಲ್ಲಿ ಬೇರೆ ಬೇರೆ ರೂಪದಲ್ಲಿ ಲಭಿಸುತ್ತಿದ್ದು, ಅವುಗಳಿಂದ ದುಷೆøàರಣೆಗೊಂಡು ತಾವೇ ಮಕ್ಕಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗುವ ಪ್ರಕರಣಗಳು ನಡೆಯುತ್ತಿವೆ. ಆದ್ದರಿಂದ ಇಂತಹ ಸೈಟ್‌ಗಳನ್ನು ಜಾಲಾಡುವವರನ್ನು, ಮುಖ್ಯವಾಗಿ ಡೌನ್‌ಲೋಡ್‌ ಮಾಡಿ ಹಂಚುವವರ ವಿರುದ್ಧ ಕಲಂ 67(ಬಿ) ಐಟಿ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗುತ್ತಿದೆ.

ಎನ್‌ಸಿಎಂಇಸಿ ನೆರವು: ಕೇಂದ್ರ ಸರಕಾರ ಸ್ಥಾಪಿಸಿರುವ ಎನ್‌ಸಿಎಂಇಸಿ (ಕಾಣೆಯಾದ ಮತ್ತು ಶೋಷಿತ ಮಕ್ಕಳ ಕೇಂದ್ರ) ಮತ್ತು ಎನ್‌ಸಿಆರ್‌ಬಿ (ನ್ಯಾಶನಲ್‌ ಕ್ರೈಂ ರೆಕಾರ್ಡ್‌ ಬ್ಯೂರ್‌) ಮೂಲಕ ಸಿಐಡಿ ಮಾಹಿತಿ ಸಂಗ್ರಹಿಸುತ್ತಿದೆ.

ಲಾಕ್‌ಡೌನ್‌ ಅವಧಿಯಲ್ಲಿ ಹೆಚ್ಚಳ: ಸಿಐಡಿ ಕಳೆದ 7 ತಿಂಗಳಲ್ಲಿ ಪತ್ತೆಹಚ್ಚಿ ನೀಡಿರುವ ದಾಖಲೆಗಳ ಆಧಾರದಲ್ಲಿ ಬಂಧನ ನಡೆಯುತ್ತಿದೆ. ಹೆಚ್ಚಿನವು ಕಳೆದ ಲಾಕ್‌ಡೌನ್‌ ಅವಧಿಯಲ್ಲಿ ನಡೆದಿರುವ ಪ್ರಕರಣಗಳು. ಹೊರ ಜಿಲ್ಲೆ / ರಾಜ್ಯದವರು ಇಲ್ಲಿನ ವಿಳಾಸದಲ್ಲಿ ಪಡೆದ ಸಿಮ್‌ ಮೂಲಕವೂ ಇಂತಹ ದೃಶ್ಯಗಳನ್ನು ಡೌನ್‌ಲೋಡ್‌ ಮಾಡಿ ಹಂಚಿರುವ ಪ್ರಕರಣಗಳೂ ಇವೆ.

ಮಕ್ಕಳಿಂದ ವೀಕ್ಷಣೆ; ಹೆತ್ತವರಿಗೆ ಗೋಳು! ಈಗ ಗುರುತಿಸಿರುವ, ಬಂಧಿಸಿರುವ ಆರೋಪಿಗಳ ಪೈಕಿ ಹಲವರು ಕಾರ್ಮಿಕರು. ಇನ್ನು ಕೆಲವು ಪ್ರಕರಣಗಳಲ್ಲಿ ಮನೆಯಲ್ಲಿ ಮಕ್ಕಳು, ಯುವಕರು ತಮ್ಮ ಹೆತ್ತವರ ಮೊಬೈಲ್‌ನಲ್ಲಿ ವೀಕ್ಷಣೆ, ಹಂಚಿಕೆ ಮಾಡಿದ್ದಾರೆ. ಆದರೆ ಸಿಮ್‌ಯಾರ ಹೆಸರಿನಲ್ಲಿದೆಯೋ ಅವರ ವಿರುದ್ಧವೇ ಪ್ರಕರಣ ದಾಖಲಾಗುತ್ತದೆ ಎನ್ನುತ್ತಾರೆ ಸೈಬರ್‌ ಪೊಲೀಸರು.

ಇದನ್ನೂ ಓದಿ:ರೇಖಾ ಕೊಲೆಗೆ 2-3 ತಿಂಗಳ ಸ್ಕೆಚ್: ಕದಿರೇಶ್ ಸಹೋದರಿ ಮಾಲಾ, ಆಕೆಯ ಪುತ್ರನ ಸೆರೆ

ಅಶ್ಲೀಲ ಸೈಟ್‌ಗಳನ್ನು ಸರಕಾರ ನಿಷೇಧಿಸಿದ್ದರೂ ಬೇರೆ ಬೇರೆ ರೂಪದಲ್ಲಿ ಲಭ್ಯವಾಗುತ್ತಿವೆ. ಯಾವುದೇ ಅಶ್ಲೀಲ ವೀಡಿಯೋಗಳ ವೀಕ್ಷಣೆ, ಹಂಚುವಿಕೆ ಅಪರಾಧ. ಇದನ್ನು ತಡೆಯುವುದಕ್ಕಾಗಿ ನಿಗಾ ವಹಿಸಲಾಗುತ್ತಿದೆ. ಮೊಬೈಲನ್ನು ಇತರರಿಗೆ ನೀಡುವುದು ಕೂಡ ಅಪಾಯಕಾರಿ.

– ಹೃಷಿಕೇಶ್‌ ಸೋನಾವಣೆ, ದ.ಕ. ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ

ಶಿಕ್ಷೆ ಏನು?

ಮಕ್ಕಳ ಅಶ್ಲೀಲ ಚಿತ್ರ / ವೀಡಿಯೋ ಪ್ರಕರಣ: 5 ವರ್ಷ ಜೈಲು, 10 ಲ.ರೂ. ದಂಡ

ಎರಡನೇ ಬಾರಿ ಎಸಗುವ ತಪ್ಪಿಗೆ 7 ವರ್ಷ ಜೈಲು, 10 ಲ.ರೂ. ದಂಡ

ಹಿರಿಯರಿಗೆ ಸಂಬಂಧಿಸಿದ ಚಿತ್ರ / ವೀಡಿಯೋ ಪ್ರಕರಣ: 3 ವರ್ಷ ಜೈಲು, 10 ಲ.ರೂ. ದಂಡ

ಎರಡನೇ ಬಾರಿ ಎಸಗುವ ತಪ್ಪಿಗೆ 7 ವರ್ಷ ಜೈಲು, 10 ಲ.ರೂ. ದಂಡ

ಎಲ್ಲಿ ಎಷ್ಟು ಪ್ರಕರಣ

ಮಂಗಳೂರು ಕಮಿಷನರೆಟ್‌ ವ್ಯಾಪ್ತಿ- 11

ದ.ಕ. ಜಿಲ್ಲಾ ಪೊಲೀಸ್‌ ವ್ಯಾಪ್ತಿ -15

ಉಡುಪಿ ಜಿಲ್ಲಾ ಪೊಲೀಸ್‌ ವ್ಯಾಪ್ತಿ- 15

ವರದಿ: ಸಂತೋಷ್ ಬೊಳ್ಳೊಟ್ಟು