ಮೂರ್ಜೆ: ಕಾರು ಢಿಕ್ಕಿ, ಮಗು ಸಾವು: ಮಹಿಳೆಗೂ ಗಾಯ, ಹಲವು ವಾಹನ ಜಖಂ

Team Udayavani, Feb 8, 2018, 6:00 AM IST

ಪುಂಜಾಲಕಟ್ಟೆ: ರಸ್ತೆ ಬದಿ ನಿಂತಿದ್ದ ತಾಯಿ-ಮಗುವಿಗೆ ಕಾರು ಢಿಕ್ಕಿ ಹೊಡೆದ ಪರಿಣಾಮ ಗಂಭೀರ ಗಾಯಗೊಂಡ ಮಗು ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ ಘಟನೆ ಮಂಗಳವಾರ ರಾತ್ರಿ ಬಂಟ್ವಾಳ ತಾಲೂಕು ಪಿಲಾತಬೆಟ್ಟು ಗ್ರಾಮದ ಮೂರ್ಜೆಯಲ್ಲಿ   ಸಂಭವಿಸಿದೆ.

ಮಂಗಳೂರು ವಾಮಂಜೂರು ನಿವಾಸಿ ಲೋಹಿತಾಕ್ಷ ಅವರ ಪುತ್ರಿ ವೈಷ್ಣವಿ (3) ಮೃತಪಟ್ಟ  ಮಗು. ಪ್ರಮೀಳಾ (26)  ಅವರು ಮೂರ್ಜೆ ಸಮೀಪದ ಮಣ್ಣೂರಿನಲ್ಲಿ ಬುಧವಾರ  ನಡೆಯಲಿದ್ದ ಸಂಬಂಧಿಕರ ಸೀಮಂತ ಕಾರ್ಯಕ್ರಮಕ್ಕೆ  ಪುತ್ರಿ ವೈಷ್ಣವಿ ಜತೆ ಆಗಮಿಸಿದ್ದರು. ಮಣ್ಣೂರಿಗೆ ತೆರಳಲು ರಸ್ತೆ ಬದಿ ನಿಂತಿದ್ದಾಗ ಕಾವಳಕಟ್ಟೆ ಕಡೆಯಿಂದ ಬಂದ ನ್ಯಾನೋ ಕಾರು ಅವರಿಗೆ ಹಾಗೂ ರಸ್ತೆ ಬದಿ ನಿಲ್ಲಿಸಿದ್ದ 5-6 ದ್ವಿಚಕ್ರ ವಾಹನಗಳಿಗೆ ಢಿಕ್ಕಿ ಹೊಡೆದಿತ್ತು. ಅಪಘಾತದಿಂದ ತಾಯಿ ಮತ್ತು ಮಗು ಗಾಯಗೊಂಡಿದ್ದು, ಅವರನ್ನು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. 

ಮಣ್ಣೂರಿನ ಸುರೇಶ್‌ ದೂರಿನಂತೆ ಪುಂಜಾಲಕಟ್ಟೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಕಾರು ಚಾಲಕ ಪುಂಜಾಲಕಟ್ಟೆ ನಿವಾಸಿ ಮೊದಿನ್‌ ಸಾಹೇಬ್‌ನನ್ನು  ವಶಕ್ಕೆ ಪಡೆದಿದ್ದಾರೆ.