ಸರಕಾರಿ ಕಚೇರಿಗಳ ಮುಂಭಾಗ ರಸ್ತೆಯಲ್ಲೇ ವಾಹನ ನಿಲುಗಡೆ

Team Udayavani, Jun 26, 2018, 3:45 AM IST

ನಗರ: ನಗರದ ಹೃದಯ ಭಾಗದ ಕಿಲ್ಲೆ ಮೈದಾನದ ಸುತ್ತಲಿನ ರಸ್ತೆಗಳಲ್ಲಿ ವಾಹನಗಳನ್ನು ಪಾರ್ಕಿಂಗ್‌ ಮಾಡುವ ಪ್ರವೃತ್ತಿ ಮತ್ತೆ ಉಲ್ಬಣಿಸಿದೆ. ಸರಕಾರಿ ಕಚೇರಿಗಳಿರುವ ಈ ಪರಿಸರದಲ್ಲಿ ಜನರ ಓಡಾಟವೂ ಅಧಿಕವಾಗಿದ್ದು, ರಸ್ತೆಯ ಎರಡೂ ಬದಿಗಳಲ್ಲಿ ವಾಹನ ಗಳನ್ನು ನಿಲ್ಲಿಸುವುದರಿಂದ ನಿರಂತರ ಸಮಸ್ಯೆಯಾಗುತ್ತಿದೆ. ಈ ಪರಿಸರದಲ್ಲಿ ಮಿನಿ ವಿಧಾನಸೌಧ, ನಗರಸಭೆ ಕಚೇರಿ, ತಾ.ಪಂ. ಕಚೇರಿ, ಕೋರ್ಟು ಸಂಕೀರ್ಣ, ಪುರಭವನ, ಸರಕಾರಿ ಆಸ್ಪತ್ರೆ, ಉಪನೋಂದಣಿ ಕಚೇರಿ, ಲೋಕೋಪಯೋಗಿ ಇಲಾಖೆ ಕಚೇರಿ, ಸರಕಾರಿ ಮಹಿಳಾ ಪ್ರಥಮ ದರ್ಜೆ ಕಾಲೇಜು, ಮೆಸ್ಕಾಂ ವಿದ್ಯುತ್‌ ಬಿಲ್‌ ಪಾವತಿ ಕೇಂದ್ರ ಸಹಿತ ಜನರಿಗೆ ಅತಿ ಅಗತ್ಯವಾದ ಕಚೇರಿಗಳಿವೆ. ಈ ಕಾರಣದಿಂದ ವಾರವಿಡೀ ಜನನಿಬಿಡ ಪರಿಸರವಿದು.

ಸೋಮವಾರ ಸಂತೆಗೆ ಬರುವವರು ವಾಹನಗಳನ್ನು ಇಲ್ಲಿ ನಿಲ್ಲಿಸುತ್ತಾರೆ ಎಂಬುದನ್ನು ಒಪ್ಪಬಹುದು. ಆದರೆ ಉಳಿದ ದಿನಗಳಲ್ಲೂ ಬೆಳಗ್ಗೆ ವಾಹನಗಳನ್ನು ಈ ಕಿರಿದಾದ ರಸ್ತೆಗಳ ಬದಿಯಲ್ಲಿ ಪಾರ್ಕ್‌ ಮಾಡಿ ಹೋದರೆ ಮರಳಿ ಬರುವುದು ಸಂಜೆಯೇ. ಈ ಕಾರಣದಿಂದ ಕೆಲವೊಮ್ಮೆ ಪಾದಚಾರಿಗಳಿಗೆ ನಡೆದುಕೊಂಡು ಹೋಗಲೂ ಸಾಧ್ಯವಾಗದಂತೆ ಪಾರ್ಕಿಂಗ್‌ ಮಾಡಿದ ವಾಹನಗಳು ರಸ್ತೆಯನ್ನೇ ಆಕ್ರಮಿಸುತ್ತವೆ.

ಸಂತೆ ಸ್ಥಳಾಂತರದ ವಿಚಾರ
ಈ ಪರಿಸರದಲ್ಲಿ ಸೋಮವಾರ ವಾಹನ ದಟ್ಟಣೆ ಉಂಟಾಗಿ ಸಂಚಾರಕ್ಕೆ ತೊಂದರೆ ಯಾಗುತ್ತದೆ, ಸರಕಾರಿ ಕಚೇರಿಗಳಿಗೆ ಬರುವವರಿಗೆ ಸಮಸ್ಯೆಯಾಗುತ್ತದೆ ಎಂಬ ಕಾರಣಕ್ಕೆ ಈ ಹಿಂದೆ ಪುತ್ತೂರು ಕಿಲ್ಲೆ ಮೈದಾನದ ಸಂತೆಯನ್ನು ಉಪವಿಭಾಗಾ ಧಿಕಾರಿಯವರು ತಮ್ಮ ಅಧಿಕಾರ ಬಳಸಿ ಎಪಿಎಂಸಿಗೆ ಸ್ಥಳಾಂತರ ಮಾಡಿದ್ದರು. ಅನಂತರದಲ್ಲಿ ಅನೇಕ ವಾದ – ವಿವಾದಗಳು ನಡೆದು ಸಂತೆ ವ್ಯಾಪಾರ ಮರಳಿ ಕಿಲ್ಲೆ ಮೈದಾನಕ್ಕೆ ಸ್ಥಳಾಂತರಗೊಂಡಿತ್ತು. ಸಂತೆ ಸ್ಥಳಾಂತರಗೊಂಡ ಅವಧಿಯಲ್ಲಿ ಸೋಮವಾರದ ದಿನ ಈ ಪರಿಸರದಲ್ಲಿ ವಾಹನ ದಟ್ಟಣೆಯೂ ಕಡಿಮೆಯಾಗಿತ್ತು. 

ಪರಿಸರದಲ್ಲಿ ಉಂಟಾಗುವ ವಾಹನ ದಟ್ಟಣೆಯನ್ನು ನಿಭಾಯಿಸಲು ಕಷ್ಟವಾಗುತ್ತಿರುವ ಹಿನ್ನೆಲೆಯಲ್ಲಿ ಆಗಿನ ಸಂಚಾರ ಪೊಲೀಸ್‌ ಠಾಣೆಯ ಪಿಎಸ್‌ಐ ಸಹಾಯಕ ಕಮಿಷನರ್‌ಗೆ ವರದಿಯನ್ನೂ ನೀಡಿದ್ದರು. ಆದರೆ ಸಂತೆ ಮರಳಿ ಬರುವುದರೊಂದಿಗೆ ಸಮಸ್ಯೆಯೂ ತೀವ್ರಗೊಂಡಿದೆ. ಈ ರಸ್ತೆಯ ಮೂಲಕ ತೆಂಕಿಲ ವಿದ್ಯಾಸಂಸ್ಥೆ, ಸರಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜಿಗೆ ನೂರಾರು ವಿದ್ಯಾರ್ಥಿಗಳೂ ತೆರಳುತ್ತಾರೆ. ಈ ರಸ್ತೆಗಳು ಅವೈಜ್ಞಾನಿಕ ತಿರುವುಗಳಿಂದಲೂ ಕೂಡಿದ್ದು, ವಾಹನಗಳ ಭರಾಟೆಯ ಮಧ್ಯೆ ನಡೆದುಕೊಂಡು ಹೋಗುವುದೂ ಅಪಾಯಕಾರಿಯಾಗಿದೆ.

ಎಮರ್ಜೆನ್ಸಿ ರಸ್ತೆ
ಈ ಪರಿಸರದಲ್ಲಿ ಸರಕಾರಿ ಆಸ್ಪತ್ರೆಗೆ ಹೋಗುವ ರಸ್ತೆ ಎಮರ್ಜೆನ್ಸಿ ರಸ್ತೆ. ದಿನಂಪ್ರತಿ ತುರ್ತು ಚಿಕಿತ್ಸೆ ಅಗತ್ಯವಿರುವ ರೋಗಿಗಳನ್ನು ಆ್ಯಂಬುಲೆನ್ಸ್‌ ಮೂಲಕ ತರುವುದರಿಂದ ಈ ರಸ್ತೆ ವಾಹನ ದಟ್ಟಣೆಯಿಂದ ಕೂಡಿರಬಾರದು ಎನ್ನುವ ಕಾರಣಕ್ಕೆ ರಸ್ತೆಯ ಎರಡೂ ಬದಿಗಳಲ್ಲಿ ವಾಹನಗಳ ನಿಲುಗಡೆಯನ್ನು ನಿಷೇಧಿಸಿ ಸಂಚಾರ ಪೊಲೀಸ್‌ ಇಲಾಖೆ ಸೂಚನೆ ಹೊರಡಿಸಿದೆ. ಆದರೆ ವಾಹನಗಳನ್ನು ಬೇಕಾಬಿಟ್ಟಿ ನಿಲ್ಲಿಸಿ ತೆರಳುವವರಿಗೆ ಮಾತ್ರ ಈ ವಿವೇಚನೆಯೇ ಇಲ್ಲ.

ಎಚ್ಚರಿಕೆ, ದಂಡ
ಈ ಪರಿಸರದಲ್ಲಿ ವಾಹನಗಳನ್ನು ಪಾರ್ಕಿಂಗ್‌ ಮಾಡುವವರಿಗೆ ಎಚ್ಚರಿಕೆ ನೀಡಿದರೂ ಎಚ್ಚೆತ್ತುಕೊಳ್ಳುತ್ತಿಲ್ಲ. ಸೋಮವಾರವಂತೂ ಹೆಚ್ಚಿನ ಸಿಬಂದಿಯನ್ನು ನೇಮಿಸಿ ವಾಹನಗಳನ್ನು ಪಾರ್ಕಿಂಗ್‌ ಮಾಡುವವರಿಗೆ ದಂಡ ವಿಧಿಸಲಾಗುತ್ತಿದೆ. ಸರಕಾರಿ ಆಸ್ಪತ್ರೆ ರಸ್ತೆಯನ್ನು ಎಮರ್ಜೆನ್ಸಿ ರಸ್ತೆ ಎಂದು ಪರಿಗಣಿಸಿ ನಿಲುಗಡೆ ನಿಷೇಧಿಸಲಾಗಿದೆ. 
– ನಾರಾಯಣ ರೈ, PSI, ಸಂಚಾರ ಪೊಲೀಸ್‌ ಠಾಣೆ, ಪುತ್ತೂರು

ಸಂಚರಿಸಲು ಭಯ
ಈ ರಸ್ತೆಗಳಲ್ಲಿ ಸಂಚರಿಸುವುದೆಂದರೆ ಭಯವಾಗುತ್ತದೆ. ವಾಹನಗಳ ಓಡಾಟವೂ ಹೆಚ್ಚಾಗಿರುತ್ತದೆ. ಪುತ್ತೂರಿನಿಂದ ಮಂಗಳೂರು, ಉಪ್ಪಿನಂಗಡಿಗೆ ತೆರಳುವ ಬಸ್ಸುಗಳೂ ಇದೇ ದಾರಿ ಬಳಸುತ್ತಿವೆ. ಮುಖ್ಯವಾಗಿ ರಸ್ತೆಯ ಬದಿಗಳಲ್ಲಿ ವಿಪರೀತ ಸಂಖ್ಯೆಯಲ್ಲಿ ವಾಹನಗಳನ್ನು ಪಾರ್ಕ್‌ ಮಾಡುವುದರಿಂದ ಸಮಸ್ಯೆ ದೊಡ್ಡದಾಗಿದೆ. 
– ಹೇಮಲತಾ ಪರ್ಪುಂಜ, ಸರಕಾರಿ ಆಸ್ಪತ್ರೆಗೆ ಬಂದ ಮಹಿಳೆ

— ರಾಜೇಶ್‌ ಪಟ್ಟೆ