ಸುರತ್ಕಲ್‌: ಕೊಪ್ಪಳ ಮೂಲದ ವ್ಯಕ್ತಿಯ ಕಡಿದು ಕೊಲೆ

Team Udayavani, Jun 3, 2018, 6:00 AM IST

ಸುರತ್ಕಲ್‌: ಕೂಲಿ ಕಾರ್ಮಿಕನೋರ್ವನನ್ನು ಕೊಲೆಗೈದು ಶವವನ್ನು ಎರಡು ಭಾಗವಾಗಿ ಕತ್ತರಿಸಿ ಸುರತ್ಕಲ್‌ – ಕೃಷ್ಣಾಪುರಕ್ಕೆ ಸಾಗುವ ಮಧ್ಯೆ ಇರುವ ತೋಡಿಗೆ ಎಸೆದ ಘಟನೆ ಶನಿವಾರ ಸಂಭವಿಸಿದೆ. ಮೃತ ವ್ಯಕ್ತಿಯನ್ನು ಕೊಪ್ಪಳ ಜಿಲ್ಲೆಯ ಕಬ್ಬರಗಿ ನಿವಾಸಿ ಮರಿಯಪ್ಪ (45) ಎಂದು ಗುರುತಿಸಲಾಗಿದೆ. ಇವರು ಮಂಗಳಪೇಟೆಯಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಿದ್ದರು. 

ಶನಿವಾರ ಬೆಳಗ್ಗೆ ತೋಡಿನ ನೀರಿನಲ್ಲಿ ತೇಲುತ್ತಿದ್ದ  ಮೃತದೇಹವನ್ನು ಕಂಡ ಸ್ಥಳೀಯರು  ಪೊಲೀಸರಿಗೆ ಮಾಹಿತಿ ನೀಡಿದರು. ತತ್‌ಕ್ಷಣ ಸ್ಥಳಕ್ಕೆ ಆಗಮಿಸಿದ ಪೊಲೀಸರು  ಮೃತದೇಹವನ್ನು ಪರಿಶೀಲಿಸಿದಾಗ ಮೇಲಿನ ಅರ್ಧ ಭಾಗ ಮಾತ್ರ ಬೆಡ್‌ ಶೀಟ್‌ನಲ್ಲಿ ಸುತ್ತಿದ ಸ್ಥಿತಿಯಲ್ಲಿ ಪತ್ತೆಯಾಯಿತು. ಬಳಿಕ ಅಗ್ನಿಶಾಮಕ ದಳವನ್ನು ಕರೆಸಿ ಹುಡುಕಾಡಿದಾಗ ಸಂಜೆ ವೇಳೆಗೆ ಶರೀರಿದ ಕೆಳಗಿನ ಭಾಗ ಪತ್ತೆಯಾಯಿತು.  ಕೊಲೆಗೆ ಸ್ಪಷ್ಟ ಕಾರಣ ತಿಳಿದು ಬಂದಿಲ್ಲ ಹಾಗೂ ಆರೋಪಿಗಳ ಕುರಿತು ಮಾಹಿತಿ ಸಿಕ್ಕಿಲ್ಲ. ಅಕ್ರಮ ಸಂಬಂಧ ಸಹಿತ ವಿವಿಧ ಕೋನಗಳಲ್ಲಿ ತನಿಖೆ ನಡೆಯುತ್ತಿದೆ ಎಂದು ತಿಳಿದು ಬಂದಿದೆ. ಕುತ್ತಿಗೆ ಮತ್ತು ತಲೆಯ ಹಿಂಭಾಗಕ್ಕೆ ಬಲವಾದ ಏಟು ಬಿದ್ದಿರುವುದರಿಂದ ಸಾವು ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಗುರುತಿಸಲು ನೆರವಾದ ಆಧಾರ್‌!
ಮರಿಯಪ್ಪನನ್ನು ಕೊಂದ ಆರೋಪಿಗಳು ಶವವನ್ನು ಈತನ ಬ್ಯಾಗ್‌ ಸಹಿತ ತೋಡಿಗೆ ಎಸೆದ ಕಾರಣ  ಅದರಲ್ಲಿದ್ದ ಆಧಾರ್‌, ಮತದಾರರ ಗುರುತು ಚೀಟಿ, ಬ್ಯಾಂಕ್‌ ಪಾಸ್‌ಬುಕ್‌  ಮುಂತಾದವು ಮೃತ ವ್ಯಕ್ತಿಯ ಗುರುತು ಪತ್ತೆಗೆ ಸಹಕಾರಿಯಾಯಿತು. ಸ್ಥಳಕ್ಕೆ ಹಿರಿಯ ಪೊಲೀಸ್‌ ಅಧಿಕಾರಿಗಳಾದ ಹನುಮಂತರಾಯ, ಉಮಾಪ್ರಶಾಂತ್‌ ಭೇಟಿ ನೀಡಿ ತನಿಖೆಗೆ ಮಾರ್ಗದರ್ಶನ ನೀಡಿದರು. ಸುರತ್ಕಲ್‌ ಇನ್‌ಸ್ಪೆಕ್ಟರ್‌ ರಾಮಕೃಷ್ಣ ನೇತೃತ್ವದಲ್ಲಿ  ಪೊಲೀಸರು ಹಾಗೂ ಅಗ್ನಿಶಾಮಕ ದಳ ಸಿಬಂದಿ ಮೃತ ದೇಹವನ್ನು ಮರಣೋತ್ತರ ಪರೀಕ್ಷೆಗೆ ಸಾಗಿಸಲು ನೆರವಾದರು.