ಭಿವಂಡಿಯಲ್ಲಿ ವೋಲ್ವೋ ಕಾರ್‌ ಬಿಡಿಭಾಗಗಳ ಮಳಿಗೆ 

Team Udayavani, May 11, 2018, 3:08 PM IST

ಸ್ವೀಡನ್‌ನ ಐಷಾರಾಮಿ ಕಾರು ತಯಾರಕ ಕಂಪೆನಿ ವೋಲ್ವೋ ಕಾರ್ ಥಾಣೆ ಜಿಲ್ಲೆಯ ಭಿವಂಡಿಯಲ್ಲಿ ಕಾರಿನ ಬಿಡಿಭಾಗಗಳ ದೊಡ್ಡ ಮಳಿಗೆ ಸೌಲಭ್ಯವನ್ನು ಪ್ರಾರಂಭಿಸಿದೆ.

ಸಾರಿಗೆ ಮತ್ತು ಲಾಜಿಸ್ಟಿಕ್ಸ್‌ ಸೇವೆ, ಬಿಡಿಭಾಗಗಳಿಗೆ ಹೆಚ್ಚುತ್ತಿರುವ ಬೇಡಿಕೆಗೆ ಪೂರಕವಾಗಿ ಈ ಸೇವೆಯನ್ನು ಆರಂಭಿಸಲಾಗಿದೆ. ಇದರಿಂದ ಗ್ರಾಹಕರು ಹೊಸ ಕಾರಿಗೆ ಮತ್ತು ಕಾರು ರಿಪೇರಿಗೆ ಕಾಯುವ ಸಮಯ ಕಡಿಮೆಯಾಗಲಿದೆ ಎಂದು ಕಂಪೆನಿ ಹೇಳಿಕೊಂಡಿದೆ. ಭಾರತದಲ್ಲಿ ವೋಲ್ವೋ ತನ್ನ ಕಾರು ಮಾರಾಟವನ್ನು 2020ರ ವೇಳೆಗೆ ದ್ವಿಗುಣಗೊಳಿಸುವ ಇರಾದೆಯನ್ನು ಹೊಂದಿದ್ದು, ಈ ನಿಟ್ಟಿನಲ್ಲಿ
ಮುಂದುವರಿಯುತ್ತಿದೆ.

ವೋಲ್ವೋ ಕಾರ್ ಇಂಡಿಯಾ ಸೆಡಾನ್‌ ಎಸ್‌ 60 ಮತ್ತು ಎಸ್‌ 90, ಕ್ರಾಸ್‌ ಕಂಟ್ರಿ ವಿ 40, ವಿ 90 ಮತ್ತು ಎಸ್‌ 60, ಎಸ್ಯುವಿಗಳು ಎಕ್ಸ್‌ ಸಿ 60 ಮತ್ತು ಎಕ್ಸ್‌ ಸಿ 90 ಮತ್ತು ಹ್ಯಾಚ್ಬ್ಯಾಕ್‌ ವಿ 40 ಒಳಗೊಂಡಿದ್ದು, ಈಗಾಗಲೇ ಭಾರತೀಯರ ಆಸಕ್ತಿಗೆ ಕಾರಣವಾಗಿದೆ. 2016ರಲ್ಲಿ ವೋಲ್ವೋ ಒಟ್ಟು 1,585 ಕಾರುಗಳನ್ನು ಭಾರತದಲ್ಲಿ ಮಾರಾಟ ಮಾಡಿದ್ದು, ಸದ್ಯ ಮಾರಾಟ 2,029 ಕಾರುಗಳಿಗೆ ತಲುಪಿದೆ. ಇದರೊಂದಿಗೆ ವಿತರಕರು ಗ್ರಾಹಕರ ಬೇಡಿಕೆ ಈಡೇರಿಸಲು ಶಕ್ತರಾಗಿದ್ದಾರೆ ಎಂದು ಸಂಸ್ಥೆಯ ಮುಖ್ಯಸ್ಥರು ತಿಳಿಸಿದ್ದಾರೆ. ಭಾರತದಲ್ಲಿ 2007ರಲ್ಲಿ ಶುರುವಾದ ವೋಲ್ವೋ ಕಾರು ಮಾರಾಟ, ದೇಶದ 19 ಕಡೆಗಳಲ್ಲಿ ಡೀಲರ್‌ಶಿಪ್‌ ಗಳನ್ನು ಹೊಂದಿದೆ.