ಆಹಾರ ಸಾಮಗ್ರಿ ಕಿಟ್‌ ವಿತರಣೆ

Team Udayavani, Apr 26, 2020, 2:16 PM IST

ಹುಬ್ಬಳ್ಳಿ: ಕೋವಿಡ್‌-19 ಸಾಂಕ್ರಾಮಿಕ ರೋಗ ತಡೆಗಟ್ಟುವ ನಿಟ್ಟಿನಲ್ಲಿ ಶ್ರಮಿಸುತ್ತಿರುವ ಹು-ಧಾ ಮಹಾನಗರ ಪಾಲಿಕೆ ಪೌರ ಕಾರ್ಮಿಕರಿಗೆ ಇನ್ಫೋಸಿಸ್‌ ಫೌಂಡೇಶನ್‌ ವತಿಯಿಂದ ಆಹಾರ ಸಾಮಗ್ರಿಗಳ ಕಿಟ್‌ ವಿತರಿಸಲಾಯಿತು.

ಪಾಲಿಕೆಯ ಪೌರ ಕಾರ್ಮಿಕರು, ಆಟೋ ಟಿಪ್ಪರ್‌ ಚಾಲಕರು ಹಾಗೂ ಸಹಾಯಕರು, ಟ್ರ್ಯಾಕ್ಟರ್‌ ಚಾಲಕರು, ಲೋಡರ್ಸ್‌, ಜೆಟ್ಟಿಂಗ್‌ ಯಂತ್ರದ ಸಿಬ್ಬಂದಿಗೆ ಆಯಾ ವಲಯವಾರು ವಿತರಣೆ ಮಾಡಲಾಯಿತು. ಸುಮಾರು 2,800 ಸಿಬ್ಬಂದಿಗೆ ಕಿಟ್‌ ವಿತರಣೆ ಮಾಡಲಾಯಿತು. ಕಿಟ್‌ನಲ್ಲಿ 5 ಕೆಜಿ ಅಕ್ಕಿ, 1 ಕೆಜಿ ತೊಗರಿಬೇಳೆ, 1ಲೀ. ಎಣ್ಣೆ, ಮಸಾಲೆ ಪದಾರ್ಥಗಳು, ಅರ್ಧ ಕೆಜಿ ಕಡಲೆಬೇಳೆ ಸೇರಿದಂತೆ ಹತ್ತು ಪದಾರ್ಥಗಳನ್ನು ಒಳಗೊಂಡಿರುತ್ತದೆ.

ಇನ್ಫೋಸಿಸ್‌ ಫೌಂಡೇಶನ್‌ನ ಅಮೋಲ್‌ ಕುಲಕರ್ಣಿ ಅವರು ಕಿಟ್‌ಗಳನ್ನು ಪಾಲಿಕೆ ಆಯುಕ್ತ ಡಾ| ಸುರೇಶ ಇಟ್ನಾಳ ಅವರಿಗೆ ಹಸ್ತಾಂತರಿಸಿದರು. ಪಾಲಿಕೆ ಆಯುಕ್ತ ಇಟ್ನಾಳ ಮಾತನಾಡಿದರು. ಪಾಲಿಕೆ ಹೆಚ್ಚುವರಿ ಆಯುಕ್ತ ಅಜೀಜ್‌ ದೇಸಾಯಿ, ಘನತ್ಯಾಜ್ಯ ವಸ್ತು ನಿರ್ವಹಣೆ ವಿಭಾಗದ ಕಾರ್ಯಪಾಲಕ ಅಭಿಯಂತರ ವಿಜಯಕುಮಾರ್‌, ಪಾಲಿಕೆ ಹಾಗೂ ಫೌಂಡೇಶನ್‌ ಸಿಬ್ಬಂದಿ ಇದ್ದರು.