ಭಾರತೀಯ ಸಂಸ್ಕೃತಿ ಜಗತ್ತಿಗೆ ಮಾದರಿ: ಕುಸುಗಲ್‌

Team Udayavani, May 21, 2018, 5:36 PM IST

ಕುಳಗೇರಿ ಕ್ರಾಸ್‌: ಮಠಗಳು ಸಂಸ್ಕೃತಿಯ ಪ್ರತೀಕ. ಇಡೀ ಜಗತ್ತಿಗೆ ಭವ್ಯ ಸಂಸ್ಕೃತಿಯನ್ನು ಪಸರಿಸಿದ ವಿಶ್ವಗುರು ಭಾರತ ಸಾಮಾಜಿಕ, ಸಾಂಸ್ಕೃತಿಕ, ಶೈಕ್ಷಣಿಕವಾಗಿ ಅಭಿವೃದ್ಧಿ ಹೊಂದಲು ನಾಡಿನ ಸಾಧು-ಸಂತರ ಪಾತ್ರ ಹಿರಿದಾದುದು ಎಂದು ಪ್ರೊ.ಎಂ.ಎಸ್‌. ಕುಸುಗಲ್‌ ಅಭಿಪ್ರಾಯಪಟ್ಟರು.

ಸುಕ್ಷೇತ್ರ ಭೈರನಹಟ್ಟಿ ದೊರೆಸ್ವಾಮಿ ವಿರಕ್ತಮಠದ ಶ್ರೀಗುರು ಬ್ರಹ್ಮಾನಂದ ಶಿವಾನುಭವ ಧರ್ಮಸಂಸ್ಥೆ ಆಶ್ರಯದಲ್ಲಿ ಹಮ್ಮಿಕೊಂಡಿದ್ದ 279ನೇ ಮಾಸಿಕ ಶಿವಾನುಭವದಲ್ಲಿ ಮಾತನಾಡಿದ ಅವರು, ಜಗತ್ತಿಗೆ ಸಮಾನತೆಯ ತತ್ವ ಸಾರಿದ ಬುದ್ಧ, ಬಸವ, ಯೇಸು, ಪೈಗಂಬರ್‌, ಅಂಬೇಡ್ಕರಂತಹ ಮಹಾನ್‌ ವ್ಯಕ್ತಿಗಳು ನೀಡಿದ ಸಿದ್ಧಾಂತಗಳು ಇಂದಿಗೂ ಪ್ರಸ್ತುತ ಮತ್ತು ಸರ್ವಕಾಲಿಕ. ಒಬ್ಬ ವ್ಯಕ್ತಿ ಉನ್ನತ ಸ್ಥಾನಕ್ಕೇರಲು ಕೇವಲ ಐಶ್ವರ್ಯದಿಂದ ಸಾಧ್ಯವಿಲ್ಲ. ಬದಲಾಗಿ ಉತ್ತಮ ಆಚಾರ-ವಿಚಾರ ಸನ್ನಡತೆಯಿಂದ ಮಾತ್ರ ಉತ್ತಮ ಪ್ರಜೆಯಾಗಲು ಸಾಧ್ಯ. ಬೆಂಕಿ ಇಲ್ಲದೇ ಮೇಣದ ಬತ್ತಿ ಹೇಗೆ ಉರಿಯಲು ಸಾಧ್ಯವಿಲ್ಲವೋ ಹಾಗೆ ಆಧ್ಯಾತ್ಮಿಕ ಎಂಬ ಜ್ಯೋತಿ ಇಲ್ಲದೇ ಮನುಜನ ಬಾಳು ಬೆಳಗಲು ಸಾಧ್ಯವಿಲ್ಲ. ಹೀಗಾಗಿ ಪ್ರತಿಯೊಬ್ಬರು ಶಿವಾನುಭದಂತಹ ಆಧ್ಯಾತ್ಮಿಕ ಗೋಷ್ಠಿಗಳಲ್ಲಿ ಪಾಲ್ಗೊಂಡು ಜೀವನವನ್ನು ಸಾರ್ಥಕ ಮಾಡಿಕೊಳ್ಳಬೇಕು ಎಂದು ಕರೆಕೊಟ್ಟರು.

ಉಪನ್ಯಾಸಕ ಆರ್‌.ಎಚ್‌.ತಿಗಡಿ ಮಾತನಾಡಿ, 12ನೇ ಶತಮಾನದಲ್ಲಿಯೇ ಸಮಾನತೆ ಸಂದೇಶ ಸಾರಿ ಸರ್ವರಿಗೂ ಸಮಪಾಲು, ಸರ್ವರಿಗೂ ಸಮಬಾಳು ಎಂಬಂತೆ ಕಾಯಕ ದಾಸೋಹದ ಪರಿಕಲ್ಪನೆಯನ್ನು ಜಗತ್ತಿಗೆ ಜಾತ್ಯತೀತೆಯ ಬೀಜವನ್ನು ಬಿತ್ತಿದ ಬಸವಾದಿ ಶರಣರ ಆದರ್ಶ ನಮಗೆಲ್ಲ ಮಾದರಿ ಎಂದರು.

ಶ್ರೀಮಠದ ಶಾಂತಲಿಂಗ ಶ್ರೀಗಳು ತಮ್ಮ ಆಶೀರ್ವಚನದ ಮೂಲಕ ಆಸೆ ಎಂಬುದು ಭವದ ಬೀಜ ನಿರಾಸೆಯೆಂಬುದು ನಿತ್ಯ ಮುಕ್ತಿ ಎಂಬಂತೆ ಮನುಷ್ಯನಲ್ಲಿ ಆಸೆ ಇರಬೇಕು. ಆದರೆ ದುರಾಸೆ ಇರಬಾರದು. ದುರಾಸೆ ಉಳ್ಳವರು ಜೀವನದಲ್ಲಿ ಸಫಲತೆ ಕಾಣಲು ಸಾಧ್ಯವಿಲ್ಲ. ಒಬ್ಬ ವ್ಯಕ್ತಿಯ ವ್ಯಕ್ತಿತ್ವ ಹಾಗೂ ಬದುಕು ರೂಪುಗೊಳ್ಳುವುದು ಅವನ ಚಿಂತನೆಗಳಿಂದ ಹೊರತು ಅವನ ಹಣದಿಂದಲ್ಲ. ಮನುಷ್ಯರಾದವರು ಏನನ್ನು
ಯೋಚಿಸುತ್ತೇವೆಯೋ ಅದೆ ನಾವಾಗುತ್ತೇವೆ. ಹೀಗಾಗಿ ಉತ್ತಮ ಚಿಂತನೆಗಳನ್ನು ಅಳವಡಿಸಿಕೊಂಡಾಗ ಮಾತ್ರ ದೊಡ್ಡವನಾಗಲು ಸಾಧ್ಯ ಎಂದರು.

ಇದೇ ಸಂದರ್ಭದಲ್ಲಿ ಮಲೇಷಿಯಾದಲ್ಲಿ ನಡೆಯುವ ಅಂತಾರಾಷ್ಟ್ರೀಯ ಕರಾಟೆ ಚಾಂಪಿಯನ್‌ ಶಿಪ್‌ಗೆ ಆಯ್ಕೆಯಾದ ಕುಮಾರ ಚಂದ್ರಶೇಖರಗೌಡ ತಮ್ಮನಗೌಡ್ರ ಅವರನ್ನು ಶ್ರೀಮಠದಿಂದ ಅಭಿನಂದಿಸಿ ಸತ್ಕರಿಸಲಾಯಿತು. ಪ್ರೊ.ಪಿ.ಎಸ್‌.ಅಣ್ಣಿಗೇರಿ, ಎಸ್‌.ಐ. ಅಂಕಲಿ, ಬಿ.ವೈ. ಕಲ್ಲನಗೌಡ್ರ, ಸಂಗನಗೌಡ್ರ ತಮ್ಮನಗೌಡ್ರ, ಶಿಕ್ಷಕರಾದ ಕುಂದರಗಿ ಇದ್ದರು. ಮಹಾಂತೇಶ ಹಿರೇಮಠ ನಿರೂಪಿಸಿದರು, ಉಮೇಶ ಹಾದಿಮನಿ ಸ್ವಾಗತಿಸಿದರು. ಶಿವಮೂರ್ತಿ ವಂದಿಸಿದರು.