ಹೆಚ್ಚಿದ ಮತ ಪ್ರಮಾಣ ಯಾರ ಗೆಲುವಿಗೆ ಬುತ್ತಿ?

Team Udayavani, May 20, 2019, 11:08 AM IST

ಹುಬ್ಬಳ್ಳಿ: ಕುಂದಗೋಳ ವಿಧಾನಸಭೆ ಉಪ ಸಮರದಲ್ಲಿ ಬಿರುಬಿಸಿಲಿಗೂ ಸವಾಲೊಡ್ಡುವ ರೀತಿಯಲ್ಲಿ ದಾಖಲೆ ಮತದಾನವಾಗಿದೆ. ಮತಪ್ರಮಾಣ ಹೆಚ್ಚಳವನ್ನು ಮೈತ್ರಿಕೂಟ ಹಾಗೂ ಬಿಜೆಪಿ ಕಡೆಯವರು ತಮ್ಮ ಅಭ್ಯರ್ಥಿ ಗೆಲುವಿಗೆ ಅನುಕೂಲವಿದು ಎಂದು ವ್ಯಾಖ್ಯಾನಿಸತೊಡಗಿದ್ದಾರೆ.

ಸಿ.ಎಸ್‌. ಶಿವಳ್ಳಿ ಅವರ ಅಕಾಲಿಕ ನಿಧನದಿಂದ ಎದುರಾದ ಉಪ ಚುನಾವಣೆಯಲ್ಲಿ ಮೈತ್ರಿಕೂಟದ ಅಭ್ಯರ್ಥಿಯಾಗಿ ಸಿ.ಎಸ್‌. ಶಿವಳ್ಳಿ ಅವರ ಪತ್ನಿ ಕುಸುಮಾವತಿ ಶಿವಳ್ಳಿ ಹಾಗೂ ಬಿಜೆಪಿ ಅಭ್ಯರ್ಥಿಯಾಗಿ ಮಾಜಿ ಶಾಸಕ ಎಸ್‌.ಐ. ಚಿಕ್ಕನಗೌಡ್ರ ಸ್ಪರ್ಧಿಸಿದ್ದು, ರವಿವಾರ ಬಹುತೇಕ ಶಾಂತಿಯುತ ಮತದಾನ ನಡೆದಿದೆ. ಮತ ಪ್ರಮಾಣ ಹೆಚ್ಚಳವಾಗಬೇಕೆಂದು ಲೋಕಸಭೆ ಚುನಾವಣೆ ಹಾಗೂ ಮತಜಾಗೃತಿ ಬಗ್ಗೆ ಜಿಲ್ಲಾ ಚುನಾವಣಾ ವಿಭಾಗ ಹಾಗೂ ಸ್ವೀಪ್‌ ಕೈಗೊಂಡ ಪ್ರಚಾರ ಕಾರ್ಯಕ್ಕೆ ಉತ್ತಮ ಸ್ಪಂದನೆ ಎನ್ನುವಂತೆ ಶೇ.82.42 ದಾಖಲೆ ಮತದಾನವಾಗಿದೆ.

2018ರ ವಿಧಾನಸಭೆ ಚುನಾವಣೆ ಮತದಾನಕ್ಕೆ ಹೋಲಿಸಿದರೆ ಉಪ ಚುನಾವಣೆಯಲ್ಲಿ ಶೇ.3.75 ಮತದಾನ ಹೆಚ್ಚಳವಾಗಿದೆ. ಒಂದು ಕಡೆ ಉರಿಬಿಸಿಲು, ಮತ್ತೂಂದು ಕಡೆ ಕೆಲ ದಿನಗಳ ಹಿಂದೆಯಷ್ಟೇ ಲೋಕಸಭೆ ಚುನಾವಣೆಗೆ ಮತದಾನ ಮಾಡಲಾಗಿದ್ದು, ಉಪ ಚುನಾವಣೆಯಲ್ಲಿ ಹೆಚ್ಚಿನ ಜನ ಮತದಾನಕ್ಕೆ ಮುಂದಾಗಲಾರರು ಎಂಬ ಕೆಲವರ ನಿರೀಕ್ಷೆ ಹುಸಿಗೊಳಿಸಿ ಕುಂದಗೋಳ ಮತದಾರರು ಉತ್ತಮ ಸ್ಪಂದನೆ ತೋರಿದ್ದಾರೆ.

ಜಿದ್ದಾಜಿದ್ದಿಯ ಕಣ: ಕುಂದಗೋಳ ವಿಧಾನಸಭೆ ಉಪ ಚುನಾವಣೆ ಕಾಂಗ್ರೆಸ್‌-ಜೆಡಿಎಸ್‌ ಮೈತ್ರಿಕೂಟ ಹಾಗೂ ಬಿಜೆಪಿಗೆ ಜಿದ್ದಾಜಿದ್ದಿ ವೇದಿಕೆಯಾಗಿತ್ತು. ಸ್ಥಾನ ಉಳಿಸಿಕೊಳ್ಳಲು ಮೈತ್ರಿಕೂಟ, ಸ್ಥಾನ ಕಿತ್ತುಕೊಳ್ಳಲು ಬಿಜೆಪಿ ಸಾಕಷ್ಟು ಸರ್ಕಸ್‌ಗಿಳಿದಿದ್ದವು.

ಉಪ ಚುನಾವಣೆ ಫ‌ಲಿತಾಂಶ ರಾಜ್ಯ ಸಮ್ಮಿಶ್ರ ಸರಕಾರದ ಮೇಲೆ ತನ್ನದೇ ಪರಿಣಾಮ ಬೀರಬಹುದಾಗಿದೆ ಎಂಬ ಅನಿಸಿಕೆ ಹಿನ್ನೆಲೆಯಲ್ಲಿ ಕ್ಷೇತ್ರದ ಗೆಲುವು ಎರಡು ಕಡೆಯವರಿಗೂ ತೀವ್ರತೆ ಸೃಷ್ಟಿಸಿತ್ತು. ಗೆಲುವು ತಮ್ಮದಾಗಲೇಬೇಕೆಂಬ ಜಿದ್ದಿನೊಂದಿಗೆ ಎರಡು ಕಡೆಯ ನಾಯಕರು, ಮುಖಂಡರು, ಕಾರ್ಯಕರ್ತರು, ಬೆಂಬಲಿಗರು ಪೈಪೋಟಿ ರೂಪದಲ್ಲಿ ಪ್ರಚಾರ, ಮತದಾರರ ಮನವೊಲಿಕೆ ಕಾರ್ಯ ಕೈಗೊಂಡಿದ್ದರು.

ಗೆಲುವಿನ ವ್ಯಾಖ್ಯಾನ: ಕುಂದಗೋಳ ವಿಧಾನಸಭೆ ಉಪ ಚುನಾವಣೆ ಮತ ಸಮರ ಮುಗಿದಿದೆ. ಮತದಾರರ ತೀರ್ಪು ಮತಯಂತ್ರಗಳನ್ನು ಸೇರಿಯಾಗಿದೆ. ಇನ್ನೇನಿದ್ದರೂ ಫ‌ಲಿತಾಂಶ ಏನೆಂಬುದನ್ನು ಎದುರು ನೋಡುವುದಷ್ಟೆ.

ಎರಡು ಕಡೆಯವರು ಗೆಲುವು ತಮ್ಮದೇ ಎಂದು ಹೇಳುತ್ತಿದ್ದಾರೆ. ಕಾಂಗ್ರೆಸ್‌ನವರು ಮೈತ್ರಿ ಅಭ್ಯರ್ಥಿ ಕುಸುಮಾವತಿ ಶಿವಳ್ಳಿ ಅವರಿಗೆ ಅನುಕಂಪ ದೊಡ್ಡ ಮಟ್ಟದಲ್ಲಿ ಕೈ ಹಿಡಿಯಲಿದೆ. ಸಿ.ಎಸ್‌. ಶಿವಳ್ಳಿ ಅವರು ಕ್ಷೇತ್ರದ ಅಭಿವೃದ್ಧಿ ಹಾಗೂ ಎಲ್ಲ ಜಾತಿಯ ಬಡವರ ಸಮಸ್ಯೆ, ನೋವುಗಳಿಗೆ ಸ್ಪಂದಿಸಿದ್ದು, ಕುಟುಂಬ ಸದಸ್ಯನ ರೀತಿಯಲ್ಲಿ ನೆರವು ನೀಡಿದ್ದು ಸಹ ಜನರ ಮನಸ್ಸಿನಲ್ಲಿದ್ದು, ಅದು ಪಕ್ಷದ ಅಭ್ಯರ್ಥಿ ಗೆಲುವನ್ನು ಸುಲಭವಾಗಲಿದೆ ಎಂಬುದಾಗಿದೆ.

ದಾಖಲೆ ಮತದಾನವೂ ನಮಗೆ ವರವಾಗಲಿದೆ ಎಂಬುದು ಮೈತ್ರಿಕೂಟ ಮುಖಂಡರ ಅನಿಸಿಕೆ. ಶಿವಳ್ಳಿ ಅವರ ಮೇಲಿನ ಅನುಕಂಪವೇ ಹೆಚ್ಚು ಹೆಚ್ಚು ಜನರನ್ನು ಮತಕೇಂದ್ರಗಳಿಗೆ ಕರೆತಂದಿದ್ದು, ದಾಖಲೆ ಮತದಾನಕ್ಕೆ ಕಾರಣವಾಗಿದೆ. ನಮ್ಮ ಅಭ್ಯರ್ಥಿ ಗೆಲುವು ಖಚಿತ ಎಂಬುದು ಹಲವು ಮುಖಂಡರ ವಾದವಾದರೆ, ಇನ್ನು ಕೆಲವರು ಮತದಾನ ಹೆಚ್ಚಳ ಯಾರಿಗೆ ಲಾಭ ಎಂಬ ಗೊಂದಲ ಕಾಡುತ್ತಿದೆ ಎನ್ನುತ್ತಿದ್ದಾರೆ.

ಬಿಜೆಪಿಯವರು ಸಹ ನಮ್ಮ ಅಭ್ಯರ್ಥಿ ಎರಡು ಬಾರಿ ಸೋತ ಅನುಕಂಪ ನಮ್ಮ ಕೈ ಹಿಡಿಯಲಿದೆ. ಬಿಜೆಪಿ ನಾಯಕರ ಸಂಘಟಿತ ಪ್ರಯತ್ನ, ಪ್ರಚಾರ ನಮಗೆ ಲಾಭವಾಗಲಿದ್ದು, ಗೆಲುವು ತಂದು ಕೊಡುವುದು ಖಚಿತ. ವಿಶೇಷವಾಗಿ ಮತದಾನ ಪ್ರಮಾಣ ಶೇ.82 ಆಗಿರುವುದು ಸಹಜವಾಗಿಯೇ ಬಿಜೆಪಿಗೆ ಲಾಭವಾಗಲಿದೆ. ಹೆಚ್ಚು ಮತದಾನವಾದರೆ ಅದು ಬಿಜೆಪಿಗೆ ಲಾಭ ಎಂಬುದು ಹಿಂದಿನ ಬೇರೆ ಬೇರೆ ಕಡೆಯ ಅನೇಕ ಚುನಾವಣೆಗಳಲ್ಲಿ ಸಾಬೀತಾಗಿದೆ. ಕುಂದಗೋಳದಲ್ಲೂ ಅದು ಮುಂದುವರಿಯಲಿದ್ದು, ನಮ್ಮ ಅಭ್ಯರ್ಥಿ ಗೆಲುವು ಖಚಿತ. ಅನುಮಾನವೇ ಬೇಡ ಎಂಬುದು ಬಿಜೆಪಿಯವರ ಅನಿಸಿಕೆ.

ಎರಡು ಕಡೆಯವರು ಮತದಾನ ಹೆಚ್ಚಳ ತಮ್ಮ ಪರ ಎಂದು ವ್ಯಾಖ್ಯಾನಿಸುತ್ತಿದ್ದಾರೆ. ಮತದಾರನ ಅನಿಸಿಕೆ ಏನಾಗಿದೆ ಎಂಬುದು ಮೇ 23ರಂದು ಬಯಲುಗೊಳ್ಳಲಿದೆ.

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.


ಈ ವಿಭಾಗದಿಂದ ಇನ್ನಷ್ಟು

  • ಹುಬ್ಬಳ್ಳಿ: ಇಂಟರ್‌ನ್ಯಾಷನಲ್ ಇನ್ಸ್‌ಟಿ ಟ್ಯೂಟ್ ಆಫ್‌ ಫ್ಯಾಶನ್‌ ಡಿಸೈನ್‌ (ಐಎನ್‌ಐಎಫ್‌ಡಿ- ಇನಿಫ್ಡ್)ದ ವಾರ್ಷಿಕ ಫ್ಯಾಶನ್‌ ಶೋ 'ಸಿಲ್ಹೌಟ್' 3ನೇ ಋತುವಿನಲ್ಲಿ...

  • ಹುಬ್ಬಳ್ಳಿ: ವಯೋವೃದ್ಧರು ಒಂದೆಡೆ ಕುಳಿತುಕೊಳ್ಳದೆ ಸದಾ ಕ್ರಿಯಾಶೀಲರಾಗಿರಬೇಕು ಎಂದು ಉಪವಿಭಾಗಾಧಿಕಾರಿ ಮಹಮ್ಮದ ಜುಬೇರ ಹೇಳಿದರು. ಹೊಸೂರ ವೃತ್ತದಲ್ಲಿರುವ...

  • ಹುಬ್ಬಳ್ಳಿ: ಸುಮಾರು 59 ವರ್ಷಗಳಿಂದ ವಾಸವಿದ್ದ ಮನೆಗಳ ತೆರವಿಗೆ ಅರಣ್ಯ ಇಲಾಖೆ ಮುಂದಾಗಿದ್ದು, ತೆರವು ಆದೇಶ ರದ್ಧತಿಗೆ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿ ಧಾರವಾಡ...

  • ಧಾರವಾಡ: ಕಾಂಗ್ರೆಸ್‌ ಪಕ್ಷದ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರನ್ನು ಬಂಧಿಸಿರುವ ಉತ್ತರ ಪ್ರದೇಶ ಸರಕಾರದ ಕ್ರಮ ಖಂಡಿಸಿ ಹು-ಧಾ ಮಹಾನಗರ ಜಿಲ್ಲಾ...

  • ಧಾರವಾಡ: ಕನ್ನಡ ನಾಡು ಕಟ್ಟುವಲ್ಲಿ ಕೊಡುಗೆ ನೀಡಿರುವ ಕವಿಸಂ ಕಳೆದ 130 ವರ್ಷಗಳಿಂದ ನಾಡು, ನುಡಿ, ಜಲ ವಿಷಯದಲ್ಲಿ ಸಾಕಷ್ಟು ಸೇವೆ ಸಲ್ಲಿಸಿದೆ. ನೂರಲ್ಲ, ಸಾವಿರ ವರ್ಷ...

ಹೊಸ ಸೇರ್ಪಡೆ