ಶೂನ್ಯದಿಂದ ಸೂತ್ರ ಹಿಡಿಯುವ ನಿರೀಕ್ಷೆಯಲ್ಲಿ ಬಿಜೆಪಿ!

ಆಗದ ಪಟ್ಟಣ ಪಂಚಾಯತ್‌ ವಿಸ್ತರಣಾ ಕಾರ್ಯ •ಪಪಂ ಆಡಳಿತಕ್ಕೆ ದೂರದೃಷ್ಟಿ ಕೊರತೆ

Team Udayavani, May 10, 2019, 12:31 PM IST

ಹೊಸನಗರ: ಪಟ್ಟಣ ಪಂಚಾಯತ್‌ ಕಾರ್ಯಾಲಯ.

ಹೊಸನಗರ: ಪಪಂ ಕಳೆದ ಆಡಳಿತ ಮಂಡಳಿಯಲ್ಲಿ ಒಂದೂ ಸ್ಥಾನ ಇಲ್ಲದ ಬಿಜೆಪಿ ವಿರುದ್ಧ ಕಾಂಗ್ರೆಸ್‌ ಹಾಗೂ ಜೆಡಿಎಸ್‌ ಮೈತ್ರಿಗೆ ಮುಂದಾಗಿರುವುದು ರಾಜಕೀಯ ವಲಯದಲ್ಲಿ ಆಶ್ಚರ್ಯ ಮೂಡಿಸಿದೆ.

ಹೊಸನಗರ ಪಪಂ ಆಡಳಿತ ಮಂಡಳಿಯು ಕಳೆದ 2 ಬಾರಿಯೂ ಜೆಡಿಎಸ್‌ ನಡೆಸಿದೆ. ವಿಸರ್ಜಿತ ಆಡಳಿತ ಮಂಡಳಿಯಲ್ಲಿ 11 ಸದಸ್ಯರಲ್ಲಿ ಜೆಡಿಎಸ್‌ನ 6 ಹಾಗೂ ಕಾಂಗ್ರೆಸ್‌ನ 5 ಸದಸ್ಯರು ಇದ್ದರು.

ಪಪಂ ಇತಿಹಾಸದಲ್ಲಿ ಬಿಜೆಪಿ ಒಮ್ಮೆ ಮಾತ್ರ ಪೂರ್ಣ ಪ್ರಮಾಣದ ಆಡಳಿತ ನಡೆಸಿದೆ. ಇನ್ನೊಮ್ಮೆ ಜೆಡಿಎಸ್‌ ಬೆಂಬಲದಿಂದ ಆಡಳಿತ ನಡೆಸಿರುವುದು ಕಂಡುಬರುತ್ತದೆ.

ಹೆಚ್ಚಾಗದ ಮತದಾರರು: ವಿಶೇಷ ಎಂದರೆ ಕಳೆದ 2 ದಶಕಗಳಿಂದ ಹೊಸನಗರ ಪಟ್ಟಣದ ಮತದಾರರ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಹೆಚ್ಚಾಗಿಲ್ಲ.

ದೂರದೃಷ್ಟಿ ಇಲ್ಲದ ಪಟ್ಟಣ ಪಂಚಾಯತ್‌ ಆಡಳಿತ ಮಂಡಳಿಯು ಪಟ್ಟಣ ಪಂಚಾಯತ್‌ ವಿಸ್ತರಣಾ ಕಾರ್ಯ ನಡೆಸಿಲ್ಲ. ವಿಸ್ತರಣೆಗೆ ಅವಕಾಶ ಇರುವ ಪಟ್ಟಣದ ಹೊರ ವಲಯದ ಬಹುತೇಕ ಪ್ರದೇಶಗಳು ಈಗಲೂ ಗ್ರಾಪಂ ತೆಕ್ಕೆಯಲ್ಲಿವೆ.

ಇದರ ಪರಿಣಾಮ ಹೊಸನಗರ ಪಟ್ಟಣವು ಸ್ಥಳಾಭಾವದಿಂದ ಕಿಷ್ಕಿಂಧೆ ಆಗಿದೆ. ಈ ಕಾರಣದಿಂದಾಗಿ ಇಲ್ಲಿನ ಮತದಾರರ ಸಂಖ್ಯೆ ಕೇವಲ 4837ಕ್ಕೆ ಸ್ಥಗಿತ ಆಗಿದೆ. ಈ ವರ್ಷ ಕೇವಲ 102 ನವ ಮತದಾರರು ಸೇರ್ಪಡೆಯಾಗಿದ್ದಾರೆ.

ಅವೈಜ್ಞಾನಿಕ ವಾರ್ಡ್‌ ವಿಂಗಡಣೆ: ಒಟ್ಟು 11 ವಾರ್ಡ್‌ಗಳು ಇರುವ ಈ ಪಟ್ಟಣ ಪಂಚಾಯತ್‌ನ 11ನೇ ವಾರ್ಡ್‌ನಲ್ಲಿ ಅತ್ಯಧಿಕ 784 ಮತದಾರರು ಇದ್ದರೆ, 4ನೇ ವಾರ್ಡ್‌ನಲ್ಲಿ 3 ಪಟ್ಟು ಕಡಿಮೆ ಅಂದರೆ ಕೇವಲ 220 ಮತದಾರರು ಇದ್ದಾರೆ.

ಕೆಲವರು ತಮ್ಮ ರಾಜಕೀಯ ಬೇಳೆ ಬೇಯಿಸಲು ತಮಗೆ ಬೇಕಾದ ಹಾಗೆ ವಾರ್ಡ್‌ಗಳನ್ನು ಮಾಡಿದ್ದಾರೆ ಎಂಬ ದೂರು ಕೇಳಿಬಂದಿದೆ. ವಾರ್ಡ್‌ ಸಂಖ್ಯೆ 1, 5 ಹಾಗೂ 10ರಲ್ಲಿ ಮಾತ್ರ ಪುರುಷ ಮತದಾರರು ಹೆಚ್ಚಾಗಿದ್ದು, ಉಳಿದಂತೆ ಎಲ್ಲಾ ವಾರ್ಡ್‌ಗಳಲ್ಲಿ ಮಹಿಳಾ ಮತದಾರರ ಸಂಖ್ಯೆ ಅಧಿಕವಾಗಿದೆ. ಚುನಾವಣಾ ವೇಳಾಪಟ್ಟಿ: ನಾಮಪತ್ರ ಸಲ್ಲಿಸುವ ಕೊನೆಯ ದಿನಾಂಕ ಮೇ 16, ಮೇ.17 ಪರಿಶೀಲನೆ, ಮೇ 20 ನಾಮಪತ್ರ ಹಿಂಪಡೆಯಲು ಕೊನೆಯ ದಿನ.

ಮತದಾನ: ಮೇ 29ರ ಬೆಳಗ್ಗೆ 7ರಿಂದ ಸಂಜೆ 5ರ ತನಕ, ಮತ ಎಣಿಕೆ ತಾಲೂಕು ಕೇಂದ್ರದಲ್ಲಿ ಆರಂಭವಾಗಲಿದೆ ಎಂದು ಚುನಾವಣಾಧಿಕಾರಿ ತಿಳಿಸಿದ್ದಾರೆ.

ನೋಟಾಗೆ ಅವಕಾಶ: ಪಟ್ಟಣ ಪಂಚಾಯತ್‌ ಚುನಾವಣೆಯಲ್ಲಿ ಮೊದಲ ಬಾರಿಗೆ ಕಣದಲ್ಲಿರುವ ಯಾರೊಬ್ಬ ಅಭ್ಯರ್ಥಿಗೆ ತನ್ನ ಮತ ನೀಡಲು ಇಚ್ಛೆ ಇಲ್ಲದಿದ್ದಲ್ಲಿ ‘ನೋಟಾ’ (ಮೇಲ್ಕಂಡ ಯಾರು ಇಲ್ಲ) ಮತ ಚಲಾಯಿಸುವ ಅಧಿಕಾರ ಚುನಾವಣಾ ಆಯೋಗ ನೀಡಿದೆ.

Disclaimer:The views expressed in comments section published on Udayavani.com are those of comment writers alone. They do not represent the views or opinions of Udayavani.com, its staff or The Manipal Group, or any entity associated with The Manipal Group. Udayavani.com reserves rights to remove a comment or all the comments any time.

To report any comment you can email us at udayavani.response@manipalgroup.info. We will review the request and delete the comments.



ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ