ಜ್ಞಾನದ ದೇಗುಲ ಹಡಗಲಿ ಗ್ರಂಥಾಲಯ!

Team Udayavani, Oct 31, 2019, 6:15 PM IST

ಹೂವಿನಹಡಗಲಿ: ಪಟ್ಟಣದಲ್ಲಿರುವ ಕೇಂದ್ರ ಗ್ರಂಥಾಲಯ ಇಲ್ಲಿರುವ ಜನರ ಪಾಲಿಗೆ ಜ್ಞಾನಕೇಂದ್ರವಾಗಿದೆ. ಪ್ರಚಲಿತ ವಿದ್ಯಮಾನಗಳಿರುವ ದಿನಪತ್ರಿಕೆಯಿಂದ ಹಿಡಿದು ನಾಡಿನ ಹಿರಿಯರ ಸಾಹಿತಿಗಳ, ಜ್ಞಾನ ಪೀಠ ಪ್ರಶಸ್ತಿ ತಂದು ಕೊಟ್ಟ ಮಹನೀಯರ ಬಗ್ಗೆ ಸಮಗ್ರ ಮಾಹಿತಿ ಇರುವ ಪುಸ್ತಕಗಳು ಇಲ್ಲಿದ್ದು, ಗ್ರಂಥಾಲಯ ಜನರ ಓದುವ ದಾಹ ನೀಗಿಸುತ್ತಿದೆ.

ಹಡಗಲಿ ಗ್ರಂಥಾಲಯಕ್ಕೆ ದೀರ್ಘ‌ ಕಾಲದ ಇತಿಹಾಸವಿದೆ. 1965ರಲ್ಲಿ ಸ್ಥಾಪಿತಗೊಂಡಿದ್ದ ಗ್ರಂಥಾಲಯ ಮೊದಲು ಪಟ್ಟಣದ ಡಾ|ಬಿ.ಆರ್‌. ಅಂಬೇಡ್ಕರ್‌ ವೃತ್ತದಲ್ಲಿರುವ ಬಾಡಿಗೆ ಕಟ್ಟಡದಲ್ಲಿ ಇತ್ತು. ನಂತರದಲ್ಲಿ ಇಲಾಖೆಯ ಸ್ವಂತ ಜಾಗದಲ್ಲಿ 2000-01ರಲ್ಲಿ ನೌಕರರ ಭವನದ ಪಕ್ಕದಲ್ಲಿ ಸುಸಜ್ಜಿತ ಕಟ್ಟಡ ಹೊಂದಿದೆ. ಜತೆಗೆ ಓದುವ ವಾತಾವರಣ ಕಲ್ಪಿಸಲು ಗಿಡ ಮರಗಳನ್ನು ಬೆಳೆಸಿ ಓದುಗರಿಗೆ ಆಹ್ಲಾದಕರ ವಾತಾವರಣ ಸೃಷ್ಟಿಸಿದೆ.

ಹಡಗಲಿ ಗ್ರಂಥಾಲಯದಲ್ಲಿ ಒಟ್ಟು 3 ವಿಭಾಗಗಳಿದ್ದು, ಗ್ರಂಥಾಲಯದಲ್ಲೇ ಕುಳಿತು ವಿಶೇಷ ಪುಸ್ತಕ ಓದಲು ಸಂದರ್ಭ ಸೇವಾ ವಿಭಾಗ, ವಿದ್ಯಾರ್ಥಿಗಳಿಗೆ ಸ್ಪರ್ಧಾತ್ಮಕ ಪರೀಕ್ಷೆಗೆ ಸಹಕಾರಿಯಾಗಲು ಸ್ಪರ್ಧಾತ್ಮಕ ವಿಭಾಗ, ನಿಯತಕಾಲಿಕ ಹಾಗೂ ಸಮಗ್ರ ಮಾಹಿತಿ ಒಳಗೊಂಡಂತೆ ಪುಸ್ತಕಗಳು, ಇತರೆ ಓದುಗರಿಗೆ ಅವಶ್ಯವಿರುವ ದಿನ ಪತ್ರಿಕೆಗಳು ಹೀಗೆ ಮೂರು ವಿಭಾಗದಲ್ಲಿ ಸುಮಾರು 35 ಸಾವಿರ ಪುಸ್ತಕಗಳನ್ನೊಳಗೊಂಡಿದೆ.

ಕನ್ನಡ, ಇಂಗ್ಲಿಷ್‌ ಹಿಂದಿಯಲ್ಲದೇ ಉರ್ದು ಭಾಷೆಯ ಪುಸ್ತಕಗಳು ಲಭ್ಯವಿದೆ. ಒಟ್ಟು 2300 ಓದುಗರ ಸದಸ್ಯರ ಸಂಖ್ಯೆ ಒಳಗೊಂಡಿದೆ. ಇಷ್ಟೊಂದು ದೊಡ್ಡ ಸಂಖ್ಯೆಯ ಸದಸ್ಯತ್ವ ಹೊಂದಿದ ಗ್ರಂಥಾಲಯಕ್ಕೆ ಓದುಗರು ಕುಳಿತುಕೊಂಡು ಓದಲು ಆಸನದ ವ್ಯವಸ್ಥೆ ಸಹ ಮಾಡಲಾಗಿದೆ. ಒಂದೇ ಬಾರಿಗೆ 80-90 ಸಂಖ್ಯೆ ಓದುಗರು ಗ್ರಂಥಾಲಯದಲ್ಲಿ ಕುಳಿತುಕೊಂಡು ಓದಬಹುದಾಗಿದ್ದು, ಮಹಿಳಾ ಓದುಗರಿಗೆ ಪ್ರತ್ಯೇಕ ವ್ಯವಸ್ಥೆ ಸಹ ಮಾಡಲಾಗಿದೆ.

ಸದಸ್ಯತ್ವಕ್ಕಾಗಿ ಗ್ರಂಥಾಲಯವು ಶುಲ್ಕ ನಿಗದಿಪಡಿಸಿಡಿದ್ದು ಒಂದು ಪುಸ್ತಕಕ್ಕೆ 102 ರೂ.,
2 ಪುಸ್ತಕಕ್ಕೆ 152, 3 ಪುಸ್ತಕಕ್ಕೆ 202 ರೂ.ಗಳಂತೆ ಒಟ್ಟು ಒಬ್ಬ ಓದುಗ 3 ಪುಸ್ತಕಗಳನ್ನು 15 ದಿವಸಗಳ ಕಾಲ ಮಿತಿಯೊಳಗೆ ಪುಸ್ತಕವನ್ನು ತಮ್ಮ ಮನೆಗೆ ತೆಗೆದುಕೊಂಡು ಹೋಗಿ ಓದಬಹುದಾಗಿದೆ.

ಡಿಸಿ ಪ್ರಶಂಸನಾ ಪತ್ರ: ಇತ್ತೀಚೆಗೆ ಗ್ರಂಥಾಲಯದ ಮಾಹಿತಿಯನ್ನು ಸಮರ್ಪಕವಾಗಿ ಸಕಾಲದಲ್ಲಿ ಸಮಯಕ್ಕೆ ಸರಿಯಾಗಿ ಜಿಲ್ಲಾಧಿಕಾರಿಗಳಿಗೆ ಒದಗಿಸಿರುವುದರಿಂದಾಗಿ ಸಕಾಲ ಸೇವೆಗಳ ಅಧಿನಿಯಮದಲ್ಲಿ ರಾಜ್ಯದ ನಾಗರಿಕರ ಪರವಾಗಿ ಜಿಲ್ಲಾಧಿಕಾರಿ ನಕುಲ್‌ ಅವರು ಪ್ರಶಂಸನಾ ಪತ್ರ ನೀಡಿದ್ದಾರೆ.