ಕಲಬುರಗಿ: 72 ವರ್ಷದ ವೃದ್ಧೆ ಸೇರಿ ಮೂವರು ಕೋವಿಡ್-19 ಸೋಂಕು ಮುಕ್ತ

Team Udayavani, Apr 24, 2020, 10:16 AM IST

ಕಲಬುರಗಿ: ಜಿಲ್ಲೆಯಲ್ಲಿ ದಿ‌ನದಿಂದ ದಿನಕ್ಕೆ ಕೋವಿಡ್-19 ಸೋಂಕಿನ ಆತಂಕ ಹೆಚ್ಚುತ್ತಿರುವ ನಡುವೆಯೂ‌ ಜನತೆಗೆ ಸಂತಸದ ಸುದ್ದಿಯೊಂದು ಬಂದಿದೆ.‌ ಮಹಾಮಾರಿ‌ ಸೋಂಕಿನಿಂದ ಬಳಲುತ್ತಿದ್ದ 72 ವರ್ಷದ ವೃದ್ಧೆ ಸೇರಿ ಮೂವರು ಮಹಿಳೆಯರು ಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.

ಜಿಲ್ಲೆಯಲ್ಲಿ ಇದುವರೆಗೆ ಒಟ್ಟು 36 ಜನರಿಗೆ ಕೋವಿಡ್-19 ಸೋಂಕು ದೃಢಪಟ್ಟಿದೆ. ಇದರಲ್ಲಿ ಈಗಾಗಲೇ ನಾಲ್ವರು ಸೋಂಕಿಗೆ ಬಲಿಯಾಗಿದ್ದಾರೆ. ಈ ಹಿಂದೆಯೇ ಮೂವರು ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ. ಇದೀಗ ಮತ್ತೆ ಮೂವರು ಸೋಂಕಿನಿಂದ ಗುಣಮುಖರಾಗಿದ್ದು, ಜನತೆ ನಿಟ್ಟುಸಿರು ಬಿಡುವಂತೆ ಆಗಿದೆ.

ತನ್ನ ಮಗನಿಂದ ಕೋವಿಡ್-19 ಸೋಂಕು ಪೀಡಿರಾಗಿದ್ದ ಕಲಬುರಗಿ ನಗರದ 72 ವರ್ಷದ ಅಜ್ಜಿ (ಪಿ-178) ಹೆಮ್ಮಾರಿ ರೋಗ ವಿರುದ್ಧದ ಹೋರಾಡಿ ಜಯಿಸಿದ್ದಾರೆ. ಅದೇ ರೀತಿ ಶಹಾಬಾದ್ ಪಟ್ಟಣದ 60 ವರ್ಷದ ವೃದ್ಧೆ (ಪಿ-124) ಹಾಗೂ ಈಕೆಯ 28 ವರ್ಷದ ಸೊಸೆ (ಪಿ-174) ಕೂಡ ಕೋವಿಡ್-19 ಸೋಂಕು ‌ಮುಕ್ತರಾಗಿದ್ದಾರೆ.

ಶಹಾಬಾದ್ ನ ವ್ಯಕ್ತಿ ದೆಹಲಿಯ ನಿಜಾಮುದ್ದೀನ್ ಮಸೀದಿಯಲ್ಲಿ ನಡೆದ ಧಾರ್ಮಿಕ ಸಭೆಯಲ್ಲಿ‌ ಪಾಲ್ಗೊಂಡು ಮರಳಿ ಬಂದಿದ್ದ. ಈತನಿಂದ ಪತ್ನಿ (ಪಿ-124)ಗೆ ಪತ್ತೆಯಾಗಿತ್ತು.‌ ನಂತರ ಈಕೆ ಸಂಪರ್ಕಕ್ಕೆ ಬಂದಿದ್ದ ಸೊಸೆಗೂ ಸೋಂಕು ಹರಡಿತ್ತು. ಆದರೆ, ದೆಹಲಿಗೆ ಹೋಗಿದ್ದ ವ್ಯಕ್ತಿಗೆ ಸೋಂಕು ಖಚಿತವಾಗಿಲ್ಲ.