ರಸ್ತೆಗಳಲ್ಲಿ ಬಿಡಾಡಿ ದನಗಳ ಪಾರುಪತ್ಯ

Team Udayavani, Jan 22, 2018, 11:47 AM IST

ಶಹಾಬಾದ: ನಗರದ ಬಹುತೇಖ ಮುಖ್ಯ ರಸ್ತೆಗಳಲ್ಲಿ ಹಗಲು ರಾತ್ರಿ ಎನ್ನದೇ ಎಲ್ಲೆಂದರಲ್ಲಿ ತಿರುಗಾಡುವ ಮತ್ತು ಕುಳಿತೇಳುವ ಬಿಡಾಡಿ ದನಗಳಿಂದಾಗಿ ಇಲ್ಲಿನ ಸಾರಿಗೆ ಮತ್ತು ಸಾರ್ವಜನಿಕರ ಸಂಚಾರಕ್ಕೆ ತೀವ್ರ ತೊಂದರೆ ಉಂಟಾಗುತ್ತಿದೆ. ಅದರಲ್ಲೂ ನಗರದ ಮುಖ್ಯ ರಸ್ತೆಗಳ ಮೇಲೆ ಈ ದನಗಳು ರಸ್ತೆ ಮಧ್ಯೆ ಕುಳಿತುಕೊಳ್ಳುವುದರಿಂದ ಸಂಚಾರ ವ್ಯವಸ್ಥೆಗೆ ತೀವ್ರ ಸಮಸ್ಯೆ ಕಾಡುತ್ತಿದೆ.

ಎಲ್ಲೆಂದರಲ್ಲಿ ಹಂದಿಗಳು ವಾಹನಗಳ ಕೆಳಗೆ ನುಗ್ಗಿ ಬರುವುದನ್ನು ತಪ್ಪಿಸಬೇಕೆಂದು ಸಾರ್ವಜನಿಕರು ಇಲ್ಲಿನ ನಗರಸಭೆಗೆ ಪದೇ ಪದೇ ಮನವಿ ಮಾಡಿಕೊಂಡರೂ ಯಾವುದೇ ಪ್ರಯೋಜನವಾಗಿಲ್ಲ. ಪರಿಸ್ಥಿತಿ ಹೀಗಿರುವಾಗ ಇದೀಗ ಬೀಡಾಡಿ ದನಗಳು ರಸ್ತೆಯನ್ನು ಆಕ್ರಮಿಸಿಕೊಳ್ಳುತ್ತಿರುವುದರಿಂದ ವಾಹನಗಳು ಹಾಗೂ ಸಾರ್ವಜನಿಕರ ಸಂಚಾರಕ್ಕೆ ಸಂಚಕಾರ ಉಂಟಾಗುತ್ತಿದೆ ಎಂದು ಇಲ್ಲಿನ ಜನರು ಬೇಸರ ವ್ಯಕ್ತಪಡಿಸಿದ್ದಾರೆ.

ಸಂಚಾರಕ್ಕೆ ಉಂಟಾಗುತ್ತಿರುವ ತಾಪತ್ರಯ ಒಂದೆಡೆಯಾದರೆ, ರಸ್ತೆ ಪಕ್ಕದ ಹಾಗೂ ಮಾರ್ಕೆಟ್‌ನಲ್ಲಿ ಹಣ್ಣು -ತರಕಾರಿ ಮಾರುವ ವ್ಯಾಪಾರಿಗಳ ಪಾಲಿಗಂತೂ ಈ ದನಗಳು ಸದಾ ಕಾಡುತ್ತಲೇ ಇರುತ್ತವೆ. ಒಂದು ಕ್ಷಣ ಮೈಮರೆತರೂ ತರಕಾರಿ ಮತ್ತು ಹಣ್ಣುಗಳತ್ತ ನುಗ್ಗುತ್ತವೆ. ದಿನ ಬೆಳಗಾದರೆ ಸಂಸಾರ ಹೊರೆ ನಿಬಾಯಿಸಲು ಹೆಣಗುವ ಮಧ್ಯದಲ್ಲಿಯೇ ಬಿಡಾಡಿ ದನಗಳ ಬಾಯಿಗೆ ತಮ್ಮ ಪಾಲಿನ ದುಡಿಮೆ ಇಟ್ಟು ಹೋಗುವುದಾದರೆ ತಮ್ಮ ಸಂಸಾರಗಳನ್ನು ನಿರ್ವಹಿಸುವುದಾದರೂ ಹೇಗೆ ಎಂದು ಇಲ್ಲಿನ ವ್ಯಾಪಾರಿಗಳು ಪ್ರಶ್ನಿಸುತ್ತಾರೆ. 

ನಗರದ ಬಸ್‌ ನಿಲ್ದಾಣ,ತರಕಾರಿ ಮಾರುಕಟ್ಟೆ, ವಿಪಿ ವೃತ್ತ, ಪೊಲೀಸ್‌ ಠಾಣೆ ಸೇರಿದಂತೆ ನಗರದ ಬಹುತೇಕ ಮುಖ್ಯ ರಸ್ತೆಗಳ ಮೇಲೆಯೇ ಬೀಡಾಡಿ ದನಗಳು ಠಿಕಾಣಿ ಹೂಡುವುದರಿಂದ ಸಾರ್ವಜನಿಕರು ಹಾಗೂ ವ್ಯಾಪಾರಿಗಳು
ಸಂಕಟ ಅನುಭವಿಸುತ್ತಿದ್ದಾರೆ ಎಂಬ ಅಸಮಾಧಾನ ವ್ಯಾಪಕವಾಗಿ ಕೇಳಿ ಬರುತ್ತಿದೆ.ಆದ್ದರಿಂದ ನಗರಸಭೆಯ
ಪೌರಾಯುಕ್ತರು ಹಾಗೂ ಅಧ್ಯಕ್ಷರು ಈ ಬಗ್ಗೆ ಗಮನ ಹರಿಸಿ ಬೀಡಾಡಿ ದನಗಳನ್ನು ನಿಯಂತ್ರಿಸುವಲ್ಲಿ ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರ ಆಗ್ರಹವಾಗಿದೆ.

ನಿಯಂತ್ರಿಸಲು ಕ್ರಮ ಕೈಗೊಳ್ಳಿ ಬಿಡಾಡಿ ದನಗಳು ನಗರದಲ್ಲಿ ಹೆಚ್ಚಾಗುತ್ತಿವೆ. ಇದರಿಂದ ಸಾರ್ವಜನಿಕರ ಸಂಚಾರಕ್ಕೆ ತೊಂದರೆಯಾಗುತ್ತಿದೆ. ಅಲ್ಲದೇ ಅನೇಕ ಬಾರಿ ದನಗಳು ಅಡ್ಡಲಾಗಿ ಬಂದಿದ್ದರಿಂದ ಬಿದ್ದು ಆಸ್ಪತ್ರೆಗೆ ಸೇರಿದ ಅನೇಕ ಘಟನೆಗಳು ನಡೆದಿವೆ. ಕೂಡಲೇ ನಿಯಂತ್ರಣ ಮಾಡಿ. 
ಕಿರಣ ಕೋರೆ, ಮಾದಿಗ ಸಮಾಜದ ಮುಖಂಡರು

ಡಿಸಿ ಸಮಸ್ಯೆ ಬಗೆಹರಿಸಲಿ ನಗರಸಭೆಯಲ್ಲಿ ಕೆಲಸಕ್ಕೆ ಬಾರದ ಅಧಿಕಾರಿಗಳು ಸೇರಿದ್ದರಿಂದ ಅಭಿವೃದ್ಧಿಯೂ ಆಗುತ್ತಿಲ್ಲ. ಇತ್ತ ಜನರ ಯಾವ ಸಮಸ್ಯೆಯೂ ಕೇಳುತ್ತಿಲ್ಲ. ಆದ್ದರಿಂದ ಜಿಲ್ಲಾಧಿಕಾರಿಗಳೇ ಈ ಬಗ್ಗೆ ಕ್ರಮಕೈಗೊಳ್ಳಬೇಕು.
ಬಸವರಾಜ ಮಯೂರ, ದಲಿತ ಮುಖಂಡ

„ಮಲ್ಲಿನಾಥ ಪಾಟೀಲ