ಪಿಪಿಇ ಕಿಟ್‌ ಇಲ್ಲದವರಿಂದ ಅಂತ್ಯ ಸಂಸ್ಕಾರ

Team Udayavani, Jun 11, 2021, 8:37 PM IST

ಕೊಪ್ಪಳ: ತಾಲೂಕಿನ ಶಿವಪುರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಕೋವಿಡ್‌ನಿಂದ ಮೃತಪಟ್ಟ ವ್ಯಕ್ತಿಯ ಅಂತ್ಯ ಸಂಸ್ಕಾರವನ್ನು ಕೋವಿಡ್‌ ನಿಯಮ ಉಲ್ಲಂಘಿಸಿ ಪಿಪಿಇ ಕಿಟ್‌ ಧರಿಸದೇ ಇರುವ ಇಬ್ಬರು ವ್ಯಕ್ತಿಗಳ ಮೂಲಕ ನೆರವೇರಿಸಿದ್ದಕ್ಕೆ ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಗ್ರಾಮದ ವ್ಯಕ್ತಿ ಕೋವಿಡ್‌ನಿಂದ ಮೃತಪಟ್ಟಿದ್ದ. ಅವರ ಅಂತ್ಯ ಸಂಸ್ಕಾರಕ್ಕೆ ಆರಂಭದಲ್ಲಿ ನಾಲ್ವರಿಗೆ ಪಿಪಿಇ ಕಿಟ್‌ ವಿತರಣೆ ಮಾಡಲಾಗಿತ್ತು. ಅವರು ಪಿಪಿಇ ಕಿಟ್‌ ಧರಿಸಿದ್ದರು. ಆದರೆ ಅಂತ್ಯ ಸಂಸ್ಕಾರಕ್ಕೆ ಮೃತದೇಹವನ್ನು ರುದ್ರಭೂಮಿಗೆ ತೆಗೆದುಕೊಂಡು ಬಂದಾಗ ಮೃತ ದೇಹವನ್ನು ಕಟ್ಟಿಗೆಯ ಮೇಲೆ ಪಿಪಿಇ ಕಿಟ್‌ ಧರಿಸದೇ ಇರುವ, ಮಾಸ್ಕ್ ಧರಿಸದ ಇಬ್ಬರು ವ್ಯಕ್ತಿಗಳ ಮೂಲಕ ಇಟ್ಟು, ಅಂತ್ಯ ಸಂಸ್ಕಾರ ನೆರವೇರಿಸಲಾಗಿದೆ.

ಈ ವೇಳೆ ಗ್ರಾಪಂ ಸರ್ಕಾರದ ಕೋವಿಡ್‌ ಅಂತ್ಯ ಸಂಸ್ಕಾರದ ನಿಯಮಗಳನ್ನೇ ಸರಿಯಾಗಿ ಪಾಲಿಸಿಲ್ಲ. ಆ ಇಬ್ಬರು ವ್ಯಕ್ತಿಗಳಿಗೆ ಸರಿಯಾದ ಮಾಸ್ಕ್ಗಳೂ ಇಲ್ಲ. ಅವರು ಅಂತ್ಯ ಸಂಸ್ಕಾರ ನೆರವೇರಿಸಿ ದ ನಂತರ ಊರಲ್ಲಿ ಸುತ್ತಾಡಿದ್ದಾರೆ. ಇವರಿಂದ ಸೋಂಕು ಉಲ್ಬಣವಾದರೆ ಇದಕ್ಕೆ ಯಾರು ಹೊಣೆ ಎಂದು ಗ್ರಾಮದ ವಕೀಲ ಕಲ್ಲೇಶ ಶಿವಪುರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.