ಜೋಗದ ಪ್ರಪಾತಕ್ಕೆ ಜಿಗಿದು ಮಹಿಳೆ ಆತ್ಮಹತ್ಯೆ
Team Udayavani, Jul 9, 2018, 7:00 AM IST
ಸಾಗರ: ಜೋಗ ಜಲಪಾತದ ಮುಂಬೈ ಬಂಗಲೆಯ ಸಮೀಪದಿಂದ ಧುಮ್ಮಿಕ್ಕುವ ರಾಜಾ ಫಾಲ್ಸ್ ನೆತ್ತಿಯ ಮೇಲಿನ ಪ್ರದೇಶದಿಂದ ಬುರ್ಖಾಧಾರಿ ಮಹಿಳೆಯೊಬ್ಬರು ಪ್ರಪಾತದ ಆಳಕ್ಕೆ ಜಿಗಿದು ನಾಪತ್ತೆಯಾದ ಪ್ರಕರಣ 2 ದಿನಗಳ ಹಿಂದೆ ನಡೆದಿದ್ದು ತಡವಾಗಿ ಬೆಳಕಿಗೆ ಬಂದಿದೆ.
ಜಲಪಾತದ ನೆತ್ತಿಯ ಪ್ರದೇಶಕ್ಕೆ ತೆರಳಲು ಪ್ರವಾಸಿಗರಿಗೆ ನಿರ್ಬಂಧಿಸಲಾಗಿದೆ. ಆದಾಗ್ಯೂ ಮಹಿಳೆ ಅತಿಕ್ರಮವಾಗಿ ಅಲ್ಲಿಗೆ ತೆರಳಿದ್ದಾಳೆ. ಇದನ್ನು ಗಮನಿಸಿದ ಕೆಲವರು ಅತ್ತ ಹೋಗದಂತೆ ಎಚ್ಚರಿಸಿದ್ದಾರೆ. ಆದರೆ ಪ್ರವಾಸಿಗರು ನೋಡುತ್ತಿದ್ದಂತೆಯೇ ಮಹಿಳೆ ತನ್ನ ವ್ಯಾನಿಟಿ ಬ್ಯಾಗ್, ಚಪ್ಪಲಿ, ಬುರ್ಖಾ ಸಮೇತ ಪ್ರಪಾತದ ಆಳಕ್ಕೆ ಜಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ. ಭಾನುವಾರ ಕೂಡ ಮಹಿಳೆಯ ಶವ ಪತ್ತೆಯಾಗಿಲ್ಲ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.