ಶಿರಾ: ಗಂಗನಹಳ್ಳಿಯ ಪುರಾತನ ಕೋಟೆ ರಕ್ಷಿಸಿ; ಶಾಸಕರಿಗೆ ಗ್ರಾಮಸ್ಥರ ಮನವಿ

Team Udayavani, Nov 20, 2021, 12:38 PM IST

ಶಿರಾ : ಕಳೆದ ಕೆಲವು ದಿನಗಳಿಂದ ಸುರಿದ ಭಾರೀ ಮಳೆಗೆ ತಾಲೂಕಿನ ಗಂಗನಹಳ್ಳಿ ಗ್ರಾಮದಲ್ಲಿರುವ ಪುರಾತನ ಕೋಟೆ (ಬುರ್ಜು) ಶಿಥಿಲಗೊಂಡಿದೆ. ಈ ಕೋಟೆಯ ಪಕ್ಕದಲ್ಲಿಯೇ ‘ಮುದ್ದೆ ಮಾರಮ್ಮ’ ದೇವಿಯ ದೇವಾಲಯ ಇದ್ದು, ಕೋಟೆಯ ಕಲ್ಲುಗಳು ದೇವಾಸ್ಥಾನದ ಮೇಲೆ ಬಿದ್ದಿರುವುದರಿಂದ, ದೇವಾಲಯ ಕೂಡ ನೆಲಕ್ಕುರುಳಿದೆ.

ಸುಮಾರು 350-400 ವರ್ಷಗಳ ಪುರಾತನ ಕೋಟೆಯನ್ನು ರಕ್ಷಣೆ ಮಾಡಬೇಕು ಎಂದು ಗ್ರಾಮಸ್ಥರು ಶಾಸಕರಾದ ಸಿ.ಎಂ ರಾಜೇಶ್ ಗೌಡ ಅವರಲ್ಲಿ ಮನವಿ ಮಾಡಿದ್ದಾರೆ.

ಈ ಕೋಟೆ ಅಥವಾ ಬುರ್ಜಿನ ವಿಶೇಷತೆ :

ಅಪರೂಪದ ಕಟ್ಟಡಗಳ ಮಧ್ಯೆ ಈ ಬುರ್ಜು ಕೂಡ ವಿಶೇಷ. ಇದು ಸುಮಾರು 350-400 ವರ್ಷಗಳ ಹಳೆಯದು ಎಂಬುದು ಸ್ಥಳೀಯರ ನಂಬಿಕೆ. ಕೆಲವರು ಸುಮಾರು 500 ವರ್ಷಗಳ ಹಳೆಯದು ಅಂತಾರೆ.

ಈ ಹಿಂದೆ ದಾಳಿಕೋರರು ಊರುಗಳಿಗೆ ಲಗ್ಗೆ ಇಟ್ಟಾಗ ತಮ್ಮನ್ನು ತಾವು ರಕ್ಷಣೆ ಮಾಡಿಕೊಳ್ಳುವ ಉದ್ದೇಶದಿಂದ,  ಹಾಗೂ ತಮ್ಮ ಆಹಾರ ಧಾನ್ಯಗಳನ್ನು ದರೋಡೆಕೋರರು ಮತ್ತು ಕಳ್ಳರಿಂದ ರಕ್ಷಣೆ ಮಾಡಿಕೊಳ್ಳುವ ಉದ್ದೇಶದಿಂದ ಈ ಕೋಟೆಯುನ್ನು (ಬುರ್ಜ) ನಿರ್ಮಾಣ ಮಾಡಿದ್ದರಂತೆ.

ಕಳ್ಳರು ಈ ಕೋಟೆ ಹತ್ತಲು ಪ್ರಯತ್ನಿಸಿದರೆ ಬಿಸಿ ರಾಗಿಯ ಅಂಬಲಿಯನ್ನು ದರೋಡೆಕೋರರ ತಲೆಯ ಮೇಲೆ ಸುರಿದು ತಮ್ಮನ್ನು ತಮ್ಮ ಆಹಾರ ಧಾನ್ಯಗಳನ್ನು ರಕ್ಷಣೆ ಮಾಡಿಕೊಳ್ಳುತ್ತಿದ್ದರು ಎಂದು ಊರಿನ ಹಿರಿಯರ ಹೇಳುತ್ತಾರೆ.

ಮತ್ತೊಂದು ವಿಷಯ ಅಂದ್ರೆ ಈ ಬುರ್ಜಿನ ಪಕ್ಕದಲ್ಲಿಯೇ ‘ಮುದ್ದೆ ಮಾರಮ್ಮ’ನ ದೇವಾಲಯವಿದೆ. ಕೋಟೆಯ ಕಲ್ಲುಗಳು ದೇವಸ್ಥಾನದ ಮೇಲೆ ಬಿದ್ದಿರುವುದರಿಂದ ಆ ದೇವಾಲಯ ಕೂಡ ನೆಲಕ್ಕುರುಳಿದೆ.

ಪ್ರತಿ ಊರಿನಲ್ಲಿ ಏನಾದರೂ ಇಂತಹ ಕುತೂಹಲಭರಿತ ಕಟ್ಟಡಗಳು, ಪುರಾತನ ದೇವಾಲಗಳು, ಸ್ತಂಭಗಳು ಇವೆ. ಇಂತಹವುಗಳನ್ನು ಸರ್ಕಾರ, ಪುರಾತತ್ವ ಇಲಾಖೆ ರಕ್ಷಣೆ ಮಾಡಿದರೆ ಮುಂದಿನ ಪೀಳಿಗೆಗೆ ಕೂಡ ನಮ್ಮ ಸಂಸ್ಕೃತಿಯನ್ನು ಪರಿಚಯಿಸಿದಂತಾಗುತ್ತದೆ ಎಂಬುದು ಗಂಗನಹಳ್ಳಿ ಗ್ರಾಮಸ್ಥರ ಆಶಯ.